Akwa Ibom state attack: Gunmen kill police, sojas, burn security vehicles for Akwa Ibom

Akwa Ibom police station attack

Wia dis foto come from, Dianaime Uko

Some unidentified gunmen don kill one senior police officer and some military officers for Akwa Ibom state.

E happun for Essien Udim Local Goment Area, inside di latest attack on police officers for southern Nigeria.

Dem kill Chief Superintendent of Police, Benedict Okoh Ajide and oda police officers during di early hours of Tuesday 30 March, 2021.

Tori be say di gunmen burn down CSP Ajide house. A passer-by wey bullet hit also die, BBC Pidgin find out.

Dem also burn down some of dia hilux vehicles, injure some odas but di exact number of officers no dey clear.

Di policemen and soldiers bin dey peacekeeping mission for di community wen di attacks happun.

Wia dis foto come from, Dianaime Uko

Akwa Ibom state gunmen attack background

About four weeks ago, some gunmen bin attack one police station and burn down some parts, including some old vehicles wey dey parked inside di premises.

Sake of dis attacks, Akwa Ibom State Goment on 26 March, 2021 ban di use of motorcycles and tricycles AKA Keke Napep from 6pm to 7am.

Di ban affect Essien Udim and two oda nearby local goment areas to check criminal activities.

Commissioner of Police Akwa Ibom State, Andrew Amiengheme don condemn di attack on security personnel wey lead to di death of Chief Superintendent of Police Ben Ajide.

For statement wey di Police tok tok pesin Odiko Macdon sign, di Police Commissioner dey condole wit families wey dia pesin die come add say dem don begin investigate di matter to bring evri pesin wey get hand to face justice.

Akwa Ibom Police attack: how unidentified gunmen burn my papa to death

Elijah Aniekan Obot, son of one di policemen wey some unidentified gunmen kill for Essien Udim LGA, tell BBC Pidgin how e happun.

Obot wey be slain Assistant Superintendent of Police [ASP] Aniekan Obot Umoh pikin, say na for school im receive call early Tuesday morning say some pipo don kill im papa.

Dem also say di killers burn down im papa house and vehicle for dia village. for Essien Udim local gomenr of Akwa Ibom State, im tok.

Elijha Aniekan Obot wey be student of Federal Polytechnic Nekede, Imo State say di pipo wey call am say dem no know di pipo wey dey kill im papa.

But by di time im come, di police authorities don carry di papa deadi body go put for mortuary for General Hospital Ikot Ekpene.

"My papa bin dey rest for im kontri house wen dem attack and burn down di house wen im dey sleep inside.

My sister Vivian Aniekan Obot narrowly escape becos she sleep for our neighbour house wen she return from school, na wetin save her if not she too for die inside di fire."

Di son of di dead police officer say "e dey very devastating for us. I never really understand wetin happen but make I see di body first.

Right now I dey go with my uncle to di General Hospital Ikot Ekpene so I fit see my papa corpse because na my uncle naim bin dey wen dem carry my father go mortuary."

Wia dis foto come from, Other

'My inlaw trap in between di gun battle between police and di oda pipo'

54 year old Aniekan Etim Udofia na anoda of di victims wey die for di crossfire of gunshots wey happen between police and some unidentified gunmen for Essien Udim local goment area of Akwa Ibom State.

Im inlaw Elisha Marcus Ekpenyong tell BBC Pidgin say Udofia bin dey ontop bike dey go Abia State to go buy goods for im business wen dem jam di gunmen wey dey attack and di policemen wey dey retaliate and unfortunately, bullet come hit am for two places: im left leg and right hand.

"Na pipo call me for phone say my inlaw dey hospital naim I rush go meet am for General Hospital Ikot Ekpene.

Wen I see my inlaw im be dey alive and im tell me say im bin dey bike dey go Abia State to go buy goods wen dem come jam di incident as di pipo wey carry gun dey shoot and police sef dey shoot dem.

Im say im carry about N200,000 dey go buy market so as dem shoot am one of di money fall from im pocket. As im try to pick di money, anoda shot hit am. Im say na oda pipo carry am go hospital."

Ekpenyong add say di hospital give dem paper to go do xray for di places di bullets hit im inlaw but wen dem reach, di xray pipo don close. Unfortunately around 10pm for night, im inlaw die and dem don carry am put for mortuary.

"Around 10pm dat night naim my inlaw die. Dis tin dey pain me becos my inlaw get eight pikins, one dey Polytechnic, three dey secondary school, di odas dey primary school.

How we go take care of dem? Make goment do sometin becos we don carry im deadibody go put for mortuary now." Im tok

Elisha Marcus Ekpenyong say apart from im inlaw, two oda women and anoda man follow die as dem sef be victims of stray bullets wey hit during di gun battle.

Akwa Ibom State Police Command never tok anytin about dis incident as wen BBC Pidgin call di Commissioner of Police, Andrew Amiemgheme, e refer us to di Police tok tok pesin Odiko Macdon, wey never respond to any phone calls.