Muhammadu Buhari UK medical trip: Nigerians for London continue protest as Onochie defend di president doctor visit

Protesters for UK

Wia dis foto come from, Other

Some Nigerians dey sustain di protest for Abuja House for London, United Kingdom wia dem dey do I-no-go-gree say "Buhari must go back to Nigeria."

Nigerian activist Bemigho Reno Omokri, wey dey lead some protesters go Abuja House for London for di #HarassBuharioutofLondon protest say make Buhari return to Nigeria to continue im medical treatment.

Oga Reno say na di double standards of President Buhari na im ginger am to come out do protest.

E say, "Buhari ban foreign rice for Nigeria, den e close Nigeria border for two years" and dis ban and closure cause serious hardship for Nigerians.

On top of dat, goment ban all Nigerian companies from doing advert for foreign media, ban Central Bank of Nigeria from giving forex to students wey dey school abroad, only to find out say di president don fly enta London to come receive treatment, im tok.

"Dat na double standard, dat na hypocrisy and we no stand for dat" e add.

Omokri question why Nigeria go be di number three most insecure kontri for world and di President still dey blame di former goment six years afta im enta office.

Omokri and some of di Nigerians wey dey live for London don stage back-to-back protest for Abuja house against Buhari trip to di UK for medical check up.

Di President bin comot Nigeria on Tuesday, 30, March 2021 on a two weeks medical checkup. Di protest begin afta di president land London.

Meanwhile, President Buhari social media aide, Lauretta Onochie don reply to pipo wey dey do dis protest say di president no go dump im doctor of over 40 years so dat 'wailers' go dey happy.

Wetin we call dis foto,

Nigerians in UK tanda for di front of President Buhari residence for UK dey demand im return to Nigeria

Why dem dey protest?

Dis protest dey come in di wake of residents doctor's strike for Nigeria wey start on 1 April, 2021- Some days afta Buhari land London for im medical check-up.

Di doctors dey protest say, government dey owe dem salary and also refuse to pay oda allowances dem suppose get during di coronavirus pandemic.

To express dia displeasure at di medical trip, Omokri lead a group of protesters to protest for di gate of di Nigeria House, dem carry placards with different inscriptions.

For inside one of im Tweet, addressing why dem dey protest for Abuja House and demanding President Buhari return to Nigeria for medical check up, e say why di president go comot Nigeria wen Nigerian doctors dey on strike?"

Wia dis foto come from, Twitter/ Reno Omokri

BBC Pidgin also follow some of di protesters tok for London and one of dem say belle no sweet am as President Muhammadu Buhari and im family no dey patronise Nigeria Medical care .

"Buhari don spend about 6 years in office, e don build any high technology hospital for Nigeria?

Pipo of im age group, wit di same ailment wey im get, dem fit use or get good treatment for Nigeria?, Di answer na No." One of di protesters tok.

Another pesin wey also follow BBC Pidgin tok say "President Buhari don come to di UK for treatment and dis go cost a lot of money, many Nigerians no fit afford am.

We dey hia to liberate Nigerians", he tok.

Timeline of Buhari visit to UK for medical check up

  • Dis Buhari UK health care waka no be di first time im don comot di kontri for medical check up time since im become president in 2015.
  • In 2016 from 6th to 19th July Buhari go London on Sick leave.
  • From 7th May to 13th August 20, 2017, di president also visit London on sick leave {na during dis trip dem say rodents alias rats tave over di president office inside Aso Rock].
  • In 2018, President Muhammadu Buhari spend 10 days for London between 8th to 18th May, to see doctors.
  • Presido Muhammadu Buhari also travel go United Kingdom for 'private visit' from 2nd till 17th November 2019. E no dey clear if na for health reasons but speculations bin dey.

Doctors strike for Nigeria - Wetin dey happun?

Di National Association of Resident Doctors begin dia latest strike on Thursday 1 April, two days after President Buhari leave di kontri for medical routine for di UK.

Dia demands from Federal goment include di immediate payment of salaries wey dem dey owe all House officers, regardless of quota system.

Dem dey also ask for upward review of di current hazard allowance to 50 per cent of consolidated basic salaries of all health workers and payment of di outstanding COVID-19 inducement allowance, especially for state-owned-tertiary Institutions, among oda demands.

Di Federal Government bin say dem don avert di major nationwide strike as dem sign Memorandum of Action (MOA) with di National Association of Resident Doctors.

Oga Chris Ngige, Minister of Labour and Employment, tell tori pipo after im meeting with NARD on Wednesday 31 March for Abuja say di discussion with di resident Doctors dey fruitful and say dem go implement all di things wey dem agree.

But di association say dem no fit suspend or call off di strike, till dem begin see di implementation of di agreement wey we reach with Federal goment.

"We don tire to sign MoU. We want implementation. Resident Doctors don suffer well-well for dis country. Infact, we don lose up to 17 of our members wey don die sake of Covid 19." Dr. Uyilawa Okhuaihesuyi wey be President of National Association of Resident Doctors tok.

E add say dem no get any plan to end di strike if goment no meet dia demands.

Wia dis foto come from, Reno Omokri/Twitter

Wetin we call dis foto,

Fmr presidential aide, Reno Omokri dey carry di Nigeria flag in front of Abuja House for UK

How presidency react to protest against Buhari UK Medical trip

Presidency never respond to di call for President Buhari to return to Nigeria even as di protest don enta Day-4.

Some of di protesters dey plan to carry placard to di hospital wia di president dey expected to go do check-up.