Don Jazzy: Why I no sign Falz, Simi and Teni

Don Jazzy

Wia dis foto come from, Don Jazzy/ Instagram

CEO of Mavin Records, Michael Collins Ajereh popularly known as Don Jazzy, don tok say im feel bad when one of im major artists, Wande Coal comot from Mo'Hits Records.

Don Jazzy make di revelation during im Black Box Interview with Ebuka Obi-Uchendu.

Di influential music producer say im beg Wande Coal make im no comot for Mo'Hits because of di tins wey dem fit achieve together.

Wia dis foto come from, Wande Coal/Don Jazzy

"I no want allow Wande Coal go. I fit show you my DM make you see my messages wia I dey beg am. I send am several messages for that 2012, 2013 period.

"I tell am say guy, space still dey for Mo'Hits and I feel say e get plenty things wey me and you fit still do. But by dat time Wande Coal don dey convinced about wetin im want. "Im believe im sey fit stand alone and I just need understand am."Wande Coal na genius," Don Jazzy tok.

Between Don Jazzy and Olamide

On di incident between im and Olamide for di 2016 Headies Awards, don Jazzy tok say im regret di incident.

According to Don Jazzy, "I regret wetin happen dat day. No much difference dey between me and Olamide because we dey do almost di same thing. Dat day dat thing happen very fast wey be say I no dey like give speech normally when I collect any award but I vex dat day because some pipo think sey we dey pay for awards and if e get awards wey pipo dey pay for, no be Headies.

"If Olamide and im crew no vex comot for di venue dat night, I tell you I for no reply am. If to say I get like 10 minutes before dem call my award I for no talk anything. But if you remember dat day, immediately dem call im own award dem call my own immediately and dat anger bin still fresh for my body. Na why I react like dat."

Why i no sign Falz, Simi and Teni- Don Jazzy

Don Jazzy also tok say Falz, Simi and Teni na some of di artist wey him for like to sign but say certain things happen wey make di tin no work out.

"I no go tok say I turn dem down. For Falz, di working situation bin no dey okay. I get company wey fit handle almost everything wey him go need and by dat time Falz already don get management company wey him don set up.

"I equally no reject Simi. I bin do one Twitter contest for 'Journey of A Thousand Miles'. Na there I first sight her and I come like her so much because of how she dey sing. I also like her cover dat time because she follow for pipo wey participate for di competition but she no win.

"Teni na another persin wey I feel bad say I no sign. Me and her bin dey check up on ourself. But di problem be say I never grow well dat time to fit move somebody from Atlanta to Nigeria for work. Na so I take lose three hot stars," Don Jazzy tok.