Aisha Buhari book launch: Aisha na my worthy partner wey get quality wey dey ginger Nigerians - Buhari

President Buhariand Aisha

Wia dis foto come from, Aisha Buhari/Instagram

President Muhammadu Buhari don describe im wife as a worthy woman.

Buhari tok dis for di launch a book wey dem write to honour Aisha, for Abuja on Thursday.

Although, di President no show at for di book launch of im wife biography as di presido still dey London dey recieve medical treatment, im vice , Yemi Osinbajo read im speech on im behalf.

Di gbonge book wey capture di journey, struggle and life of Her Excellency, Aisha Muhammadu Buhari is titled ''Aisha Buhari: Being Different''

Di book wey Dr Hajo Sani write capture di dream and aspiration of Aisha Buhari as a young girl wey  grow up for a conservative north and  her experience shape her political views later in life.

Di Vice president, Yemi Osinbanjo wey read president  Muhammadu Buhari speech hail di first lady and call her as am a worthy partner.

Describing how Aisha Buhari take different, Osinbajo, say she be di first Nigeria first lady wey dey social media. She dey always tok her mind, sometimes controversial, but e make her engage directly with her audience.

E add say, "e no dey possible say dem go eva forget Aisha Buhari, and even if e happun, den dis hand book go help remind pipo."

One of di major highlight of di book launch na wen her children present and cut beautiful white and gold birthday cake to mark her 50 years birthday wey just pass and to honour her.

For di launch of di book for Banquet Hall for State House, political leaders and her friends recount her she dey different and how her courage to speak up on major political issues in the country make her stand out.

Wia dis foto come from, Bashir Ahmad

Di author reveal say Aisha marry im husband wen she be 18 years old afta she finish her secondary school. Like many oda women, she for just relax born her pikin and rest into motherhood, but dat life no be for Aisha.

She bin dey determined to go school and willing to pay di price no mata what. She start first to get her teacher certificate education before she come go University wia she get her degree for public administration and later move on to National Defence Academy wia she do her master for International Relations and Strategic studies.

Wia dis foto come from, Aisha Buhari

But di first lady no end dia, she decide to get oda vocational training for beauty and cosmetology  and she bin dey run her business before her husband become president.

Di author of di book also reveal how Ahmed Tinubu encourage her to go out and campaign for her husband during di 2015 election wey win many pipo to her husband.

Di book also reveal why e be like say di first lady dey always try to criticise bad governance even wen e include I'm husband for public.

She say Aisha Buhari na woman wey di tok her mind on top issues wey she dey passionate about.

And dat those times wey di first lady dey speak out against wetin dey happun for I'm husband administration, she dey try to protect im legacy.