Olympics 2021: Guinea make U-turn on dia decision to withdraw from Tokyo Olympics

Tokyo Olympics

Wia dis foto come from, Getty Images

Di goment of Guinea don change mouth say dem go send athlete go di Tokyo Olympics

Dis U-turn dey come afta confusion bin dey when di Sports Minister announce say dem go withdraw dia team from di games sake of fear of covid-19

"Due to di rise in cases of Covid-19 variants, di goment, out of concern for the health of the Guinean athletes, has regretfully decided to cancel their participation," di sport Minister, Sanoussy Bantama Sow bin tok.

But now oga Bantama Sow say di kontri don decide to send dia team go di games. E confam give BBC Afriue say;

"Guinea go participate for di Tokyo Olympics. No be question of finances. We simply bin dey show care about di life of our Guineans.

"We speak with di organizers and dem tell us say dem go do everything to make sure our athletes dey safe".

Di Guinean delegation, wey neva travel yet suppose to feature five competitors - one apiece for athletics, judo and wrestling while two dey set for di athletics programme.

Meanwhile beta news dey for six players from Kenya women rugby sevens team wey dey expected to come out of 14-day Covid quarantine for dia first match against New Zealand on 29 July.

"Until yesterday, dem dey goment facility where dem no dey able to train," Kenya Chef de mission Waithaka Kioni tell BBC Sport Africa on Thursday. "But dem don now come di village. Each get room individually."

"Di girls dey come with negative Covid tests and e dey encouraging say no player test positive. But because one passenger for dia flight test positive and authorities judge dem as close contacts, dey gatz to quarantine for 14 days."

Team Kenya arrive for Japan early to dey familiar with di city of Kurume before dem move go di athletes village earlier dis week.