Abba Kyari suspended: Hushpuppi fraud case make Nigeria Police Commission suspend Deputy Commissioner of Police

Raymond 'Hushpuppi' Abbas and Abba KyarI

Wia dis foto come from, Hushpuppi

Wetin we call dis foto,

Raymond 'Hushpuppi' Abbas and Abba KyarI

Nigeria Police Service Commission don announce di suspension of Abba Kyari, wey be Deputy Commissioner of Police and Head, Intelligence Response Team (IRT) of Nigeria Police Force.

Di commission for statement say Kyari suspension go take effect from Saturday, July 31 and go remain until dem investigate di accuse for im head finish.

Im suspension dey come afta Nigeria Inspector General of Police IGP Usman Alkali Baba recommend di suspension of Kyari, wey allegation dey im head say e run one or two package wit international fraudster Hushpuppi aka Ramon Abbas.

Dis one dey follow di internal review of di allegations made by di United States's Federal Bureau of Investigation (FBI) against one of di staff of di police, DCP Abba Kyari.

For July, di Nigeria police bin say dem dey start investigate afta allegation and indictment from di FBI against DCP Abba Kyari.

According to statement wey di tok-tok pesin of di force Frank Mba sign, di Inspector General of Police IGP Usman Alkali Baba order internal review of di allegation as dem say di police dey committed to pursue justice.

Wia dis foto come from, NPF

Di Director of Media Relations for di US Department Of Justice, Thom Mrozek wey confam di order of arrest give BBC Pidgin say, dem also don order for di arrest of two oda defendants wey epp Ramon 'Hushpuppi' Abbas for wire fraud operation.

According to US court documents, Hushpuppi allege say e bribe Kyari to arrest one Vincent Chibuzo.

Di DoJ document reveal say dis na afta Vincent try to expose di operation and inform di alleged victim wetin dem dey do to am.

Abba Kyari response

Di allegation against Abba Kyari na based on fact wey Hushpuppi present to court as part of im Affidavit for im wire fraud case.

Abba Kyari don deny say e collect money from Hushpuppi.

Wia di mata bin start

Wia dis foto come from, Hushpuppi/instagram

Nigeria Instagram celebrity Ramon Abass aka 'Hushpuppi' plead guilty to Count Two of di charges against am for US court, wey be Conspiracy to Engage in Money Laundering.

Di case wey be United States v. Ramon Olorunwa Abbas, Case No. 2:20-CR-00322-ODW, charge di Abbas wit Conspiracy to Engage in Money Laundering, in violation of 18 U.S.C. § 1956(h). Part of wetin dey di court document be also say Abbas bin give one Nigeria police officer bribe.

Na dis part wia alleged officer come be DSP Abba Kyari.

As e be so, Hushpuppi fit face up to 20 years for prison during sentencing according to di informate wey dey court document.

Who be Abba Kyari wey dem allege collect bribe

Wia dis foto come from, Hushpuppi

Wetin we call dis foto,

Raymond 'Hushpuppi' Abbas and Abba KyarI

46-year-old DCP Abba Kyari hail from Borno state for northeast Nigeria.

Im be graduate of Geography wen e join di Nigeria Police Force as cadet Assistant Superintendent of Police for 2000 afta e complete im training for Police Academy, Wudil, Kano state.

One of di operations wey make Kyari blow, na wen im lead di arrest of one notorious armed robber wey dem dey call 'Ndagi' a.k.a Spirit.

Spirit bin colobi Numan, di number three biggest town for Adamawa state northeast Nigeria.

For 2005, im join di Mobile Police Force and for 2010 dem post am go Lagos Command.

Kyari become di number two man and officer-in-charge for di Special Anti-Robbery Squad (SARS) - di squad wey dey fight violent crimes from armed robbery, car theft, kidnapping, gang clashes, sea piracy and terrorism but wey later become notorious for im brutality wey lead to di October 2020 ENDSARS protest.

Im serve SARS for five years.