Ipob sit-at-home order to protest Nnamdi Kanu arrest - See updates and reactions of how e go

Nnamdi Kanu

Wia dis foto come from, AFP

Police for Anambra state confam say gunmen attack two police formation on Monday for di state during di sit-at-home order di Indigenous People of Biafra, Ipob give make pipo observe for di south east part of di kontri.

On Monday, reports also say one pesin die afta gunmen burn five transport buses for Nkwoogwu-Mbaise, Imo state during di Ipob sit-at-home order.

BBC Igbo also find one dead bodi inside one of di burnt motor.

According to pesin wey witness wetin happun, di incident happun early momo around 5am.

Di motor dem bin dey travel from Lagos to Owerri.

Two of di buses belong to one Libra transport company. Di oda three motor wey dem burn include one passenger bus, one Sienna van and one Highlander.

BBC call di Libra travel company, but dem deny say anytin happun to dia car. However, di two motor wey BBC Igbo see, get di logo of di company.

Di eyewitness wey bin tok to BBC say, dem shot one driver but dem no kill am.

Imo state police command neva tok anytin for di mata yet.

Meanwhile, Police tok tok pesin for Anambra state Tochukw Ikengaya say shooting happun for Nnewi during di Ipob sit-at-home order.

Tori be say two young men die for di shooting. But police tell BBC say dem neva fit confam any death.

Orlu, Imo state

We hear reports of gunshot from Orlu, Imo state following di sit-at home order wey di Ingenious Pipo of Biafra, Ipob declare for south east regions of Nigeria to protest di arrest of Nnamdi Kanu.

Also, shops, business and filling stations for Aba, Abia state, south east Nigeria dey on a lock-down on Monday, 9, August 2021 afta di order from Ipob for pipo across di region to 'sit-at-home' in protest against di arrest of dia leader Nnamdi Kanu.

Wetin we call dis foto,

Empty street for Orlu

According to Ipob, di sit-at-home order wey suppose start today 9th August 2021 na sometin wey dem go continue every Monday till dem release dia leader.

Wetin we call dis foto,

Pipo dey play ball for Orlu street

For Ebonyi state capital, Abakaliki, many of di shops dey locked. For di popular Ogoja road, na few pipo dey waka, commercial motorcyclists no too dey work and di ever busy road dey quiet. Few banks open but most ATMs machine dey dispense money as at di time of filing did report.

Wetin we call dis foto,

Empty road for Awka

Our reporter report say police dey patrol di streets to ensure say kasala no burst for any area.

Some students wey dey write NECO show for school today for di exam, however, private schools owners bin don already inform parents say school no go dey today.

For Akwa, Anambra state, pipo obey di sit at home order, meanwhile some essential workers like doctors go work.

Commercial transport workers wey comot say na because of some University of Azikwe students wey get examination dis morning make dem comot so dem go fit transport dem go school.

Major roads dey scanty but some pipo still dey waka wey be mostly essential and goment workers as goment don sama warning say anybody wey no come work go face sanction.

Earlier statement from Ipob bin say, "all institutions public and private, transport companies, schools, banks, markets, airports and sea ports in Biafra land must shut down every Monday beginning from August 9."

Dis order don cause reactions from some state goments for di Eastern states as dem direct dia residents to ignore any sit at home order and go about dia daily business today.

State govnors reactions

Ebonyi state govnor, David Nweze Umahi, say Monday, August 9, 2021 na working day, just like every other working day for di state. Markets, banks, schools, businesses, go operate normally.

For inside statement wey di Special Assistant to di Governor on Media and Publicity, Francis Nwaze sign, e say e no dey right to pause di economic activities of di state sake of sit at home order.

Di govnor "wish to inform di general public say on Monday, August 9, 2021, na working day, just like every other working day for di state. Markets, banks, schools, etc. go operate normally."

Anambra State goment don also direct all workers for di State say dem must attend to their duties today as failure to do so go result in severe sanctions wey include loss of Salary for di month of August.

Abia state goment say make di group no force anybody to comply with dia order.

Di statement from di goment wey di Commissioner for information, Abia state John Kalu sign say, "while goment no go force anybody wey wish to sit at home for any reason whatsoever not to do so, citizens get freedom of movement under di extant constitution of di Federal Republic of Nigeria, we wish to strongly advice say make nobody also force or enforce any sit at home order from any non-state actor as doing so no go serve any known interests of di pipo of di state.

Wetin we call dis foto,

Empty roads for Aba

Di Commissioner of Police for di Imo State Command, CP Abutu Yaro say make residents ignore any stay at home orders from pipo e describe as "illegitimate persons and entities wey dey parade di airwaves with innocuous fallacies and fantasies".

E advise make Imo pipo come out today and go about dia lawful businesses.

Nnamdi Kanu case update

Di trial of di proscribed separatist leader of di Indigenous People of Biafra Nnamdi Kanu don dey adjourned until October 21 2021.

For di resumed hearing for di Federal High Court on di 26, July, di presiding judge, Justice Binta Nyako say she no dey go ahead wit di case as di defendant, Nnamdi Kanu no dey physically present for di court.

Di prosecution team bin no give reasons for di absence if di leader of di banned group but afta closed door meeting, she bin adjourn di case.

She also reject di requests by Kanu lawyer to transfer am go di Nigeria correctional centre afta di lawyers express concerns about im safety and lack of access to am.

Kanu dey stand trial for charges wey border on terrorism, treasonable felony, illegal possession of arms, among odas wey di Nigerian goment level against am.