David Paul Yonggi Cho death: Enoch Adeboye, Joshua Iginla mourn Pastor Yonggi Cho death, DCEM fix burial

Pastor Dr. David Yonggi Cho death: Pastor E A Adeboye, Joshua Iginla mourn Yoido Full Gospel Church leader wey die

Wia dis foto come from, Pastor E A Adeboye

Wetin we call dis foto,

Pastor Enoch Adeboye of Redeemed Christian Church of God [RCCG] and Joshua Iginla dey mourn di death.

Pastor Dr. David Paul Yonggi Cho, di owner of one of di world largest mega-church don die.

Di preacher na co-founder of di Yoido Full Gospel Church [Assemblies of God] for South Korea.

Yonggi Cho wey be age 85 die on Tuesday, im church confam for press release wey BBC Pidgin see.

Wia dis foto come from, Pastor David Yonggi Cho

At di time of im death, Dr Yonggi Cho bin dey receive medical treatment for brain hemorrhage wey e suffer from since 2020.

Cause of im death at 85 fit be dis sickness.

Nigeria popular preachers all respect dis South Korean Christian leader wella.

Pastor Enoch Adeboye of Redeemed Christian Church of God [RCCG] and Joshua Iginla dey mourn Yonggi Cho death.

Wia dis foto come from, Pastor David Yonggi Cho Ministry

Wetin we call dis foto,

Him be di leader of Yoido Full Gospel Church.

David Yonggi Cho Biography

Dem born Cho for 1936 into a Buddhist family as dem live during di Korean War.

E convert to Christianity at age 17 - dis na afta doctors tell am sey e go die from a serious case of tuberculosis.

Cho pursue ministry full time and graduate from Full Gospel College for 1956.

Wia dis foto come from, Pastor David Yonggi Cho

Wetin we call dis foto,

Born 14 February, 1936 and e die 14 September 2021.

For 1958 e open one small church for Seoul wey later become Yoido Full Gospel Church.

Afta many years di church grow into one of di most popular megachurches for di world.

Yoido Full Gospel Church get 500 church locations across South Korea.

Dem don also send thousands of missionaries to different kontris of I world.

Yoido get more dan 750,000 members.

Cho "don write several books and e found a Christian daily newspaper, and established a humanitarian organization, di church tok for press release.

Cho wife die for February dis year and dem get three sons together.

Wia dis foto come from, Screengrab/Facebook

Wetin we call dis foto,

Pastor David Yonggi Cho na di founder of di largest church for South Korea.

Pastor David Yonggi Cho death: How Pastor E A Adeboye, Joshua Iginla mourn

Some Senior preachers don begin react to di death of Pastor David Yonggi Cho.

"Till we meet again on di resurrection morning, Rest in God's presence Pastor Dr. David Yonggi,"

Na so Pastor Enoch Adeboye of di Redeemed Christian Church of God tok.

Nigerian preacher, Prophet Joshua Iginla say Yonggi Cho na im "spiritual father".

Prophet Iginla for statement describe di international preacher as:

A "generational icon, trailblazer, pathfinder and a man wrapped in the immortality of God".

Yonggi Cho death: DCEM announce Pastor David Yonggi Cho funeral

Dem go bury am on September 18, 2021 for Cemetery of Osanri Choijashil Prayer Mountain.

Funeral service go hold by 8am for di main sanctuary of Yoido Full Gospel Church.

From Wednesday 15 to Friday 17 September dem schedule condolence for Yonggi Cho death.

Di condolence go take place from 7am to 10pm for Bethany Hall of Yoido Full Gospel Church.

Wia dis foto come from, DCEM