From work enter real life: 10 couples wey meet for inside film

Rose Leslie and Kit Harriton Image copyright Getty Images
Image example Leslie talk say e no hard to fall in love for Kit Harrington

Game of Thrones actors Kit Harington and Rose Leslie don announce dia engagement.

Dem do official announcement for Times newspaper after plenty-plenty news been don fly round.

Di two been meet for di TV series Game of Thrones for 2012 wey dem act inside as lovers Jon Snow and Ygritte.

Harrington still dey for di show but Leslie comot for 2014.

Dem no be di only people wey meet for inside film come fall in love for real life.

See couples wey meet for inside set of where dem dey act film

Image copyright Instagram

1. Gbenro Ajibade and Osas Ighodaro

Di couple been meet for di set of TV show Tinsel. Dem been dey try hide dia relationship and e take one year before dem decide say dem go tell people. Dem marry for 2015 after one year engagement and currently get one female pickin.

Image copyright Instagram

2. Olu Jacobs and Joke Silva

Olu Jacobs and im wife Joke Silva be like Nollywood king and queen couple as dem don reach 30 years for marriage but na when dem dey audition for roles for Wole Soyinka's Jero's Metarmorphosis dem meet.

Image copyright Instagram

3. Iyke Okechukwu and Florence Uwueke

Dis couple be di first to say "I do" for TV series Tinsel. Dem marry for April 2013.

Image copyright Instagram

4. JJC Skills and Funke Akindele

Funke Akindele and JJC Skills or "Maacoos" as Jenifa dey call am for di show Jenifa's Diary been meet for 2013 when Funke come meet am say make im direct di TV series.

Image copyright Instagram
Image example Di couple don announce say dem wan divorce

5. Chris Attoh and Damilola Adegbite

Another couple from di Tinsel series na Ghanaian actor Chris Attoh and Damilola Adegbite. Dem marry for 2015 and get one boy pickin.

Image copyright Getty Images

6. Will Smith and Jada Pinketh Smith

Audition plus audition equal to marriage. Will and Jada meet for di series, Fresh Prince of Bel Air when she do audition to be im girlfriend for di series. Dem no give am di role to act but she don dey act as Mrs Will Smith for real life ever since.

Image copyright Getty Images
Image example People feel say na di break-up today, come back tomorrow na im make Miley sing "Wrecking Ball".

7. Liam Hemsworth and Miley Cyrus for The Last Song

Miley Cyrus na popular music star wey wan chook leg for inside acting. She meet Austrailian actor Hemsworth for film come fall in love for am, both for film and for real life.

Image copyright Getty Images
Image example Dem get two pickin. Boy and girl

8. Ryan Reynolds and Blake Lively

Ryan Reynolds and Blake Lively meet when dem act for di film Green Lantern wey dem release for 2011. Dem don dey together now since then.

Image copyright Getty Images
Image example Dem date for at least one year before dem come out.

9. Trai Byers and Grace Gealey for Empire

Although, dia characters for di series no like demselves, love dey plenty between Trai Byers and Grace Gealey wey meet for Empire TV series and marry for secret in 2016...because you no say Cookie eye dey tear for inside di matter.

Image copyright Getty Images
Image example Before Justin, Jennifer Aniston been don marry Brad Pitt

10. Jennifer Aniston and Justin Theroux for Wanderlust

Jennifer Aniston and Justin Theroux meet for di movie Wonderlust wey dem act for 2010 and marry five years after for inside house.