Russia: 71 people don die for plane crash for Moscow
One Russian plane wey carry 71 people don crash after e disappear from radar as e leave Moscow airport dey go Urals.
Di plane bin carry 65 passengers and six crew members. All of dem don die.
Di Saratov Airlines An-148 regional jet bin dey fly go di city of Orsk when e vanish.
E never dey clear wetin make di plane to crash, and people wey dey investigate and emergency people dey work for di area wey snow don cover.
Dem see di bodi of di plane wey don scatter and dead bodi of people wey bin dey inside. Dem don also discover one of di flight recorders, na wetin officials talk.
President Vladimir Putin don tell sorry to people wey dia loved ones die, and announce say dem go investigate di cause of di crash.
Dis na di first commercial passenger plane wey go crash for more than a year - as 2017 na im be di safest year on record for air travel.