Ed Sheeran dey court for 'copy-copy' of Marvin Gaye song
British singer, Ed Sheeran dey face court case of about $100m on top say im go copy part of Marvin Gaye song, "Let's Get It On."
One company Structured Asset Sales, wey get part of di copyrights of Marvin Gaye song, na im sue Ed Sheeran go court
Dem accuse Ed Sheeran say im tiff section from di 1973 classic song take do im number one hit music, "Thinking Out Loud."
Legal documents for US say e copy "di melody, rhythms, harmonies, drums, bass line, backing chorus, tempo, syncopation and looping".
Ed don bin already face legal action concerning di same track - and e dey always deny di accuse.
Oda defendants wey dem list inside dis new claim include Sony/ATV Music Publishing, Atlantic record label and Amy Wadge - wey join hand write di song.
Gaye write di track wit US singer Edward Townsend - wey die for 2003.
Structured Asset Sales buy one-third of di copyright of di song.
Di pesin wey inherit Mr Townsend property, sue Ed for 2016, e also claim say "Thinking Out Loud" copy "Let's Get It On."
We neva know weda dem even don settle dat case.
- Taylor Swift don sell one million copies of her album
- This is Nigeria: Why Falz copy America rapper Childish Gambino
For March 2015, court rule say Robin Thicke single wit Pharrell Williams, "Blurred Lines" - copy Marvin Gaye track "Got To Give It Up."
Di judge bin say make dem pay di family of late Marvin Gaye $7.3m as damages - but dem later reduce am to $5.3m.
Robin and Pharell deny say dem no copy Marvin Gaye and dia lawyer say di court judgement don set "bad example".
E be like say Singer Robin Thicke dey refer to di lawsuit against Ed Sheeran for social media.
Last year, Ed settle $20m copyright infringement claim for US on top im ogbonge song "Photograph" wey be hit.
Songwriters Thomas Leonard and Martin Harrington na im sue am, dem dey claim say Ed song get di same structure wit dia own "Amazing."