Intersex for Nigeria: 'I no fit wait to become complete man' - Boy wey get man, woman private part

Dahiru Sule
Image example Shame no dey gree plenti pipo wey get Sule condition to come out tok

22 year old Dahiru Sule na one of the pipo for Kano northwest Nigeria, wey get man and woman private part.

E tell BBC Pidgin say im dream na to become complete man afta operation.

"Na as I hear say first lady dey sponsor for operation for pipo like us wey get dis problem na im make me come out, because I no fit pay di N250,000 (wey be about $700) for di operation."

"My biggest dream for life na to become full man without any problem becos as tins dey now, I dey shame to show or tell pipo my problem."

Na for May dis year BBC Hausa tok with anoda young pesin wey get di same problem for Kano and as di news spread, Nigeria first lady Aisha Buhari through her foundation yarn say anybodi wey get dis kain problem make e come out and she go pay for di operation.

About 15 pipo don come out wey get di same problem in fact just Monday morning, Aminu Kano hospital staff tell BBC Pidgin say one new pesin don come all the way from Jos after e hear of di help by di first lady.

Dem no support media player for your device
'I no want anybody to go through di kain pain wey I go through' - Jennifer

E reach 10 pipo among di 15 wey dey await first round of operation while d oda five don finish di first round, according to oga in-charged of Social welfare for Aminu Kano Hospital Abdullahi Ibrahim.

"We get 10 pipo for first round of operation while di oda five don finish dat one as e be say some of dem come with breasts and vagina, so dem don comot di breast now, na to remove di vagina, dat is for pipo wey be say di male gender dey stronger.

Topics Wey Dem Resemble

Another thing we de for inside dis tori