Buju Banton: Di ogbonge Reggae star don comot prison afta 7 years

Buju Banton Image copyright Getty Images
Image example Buju Banton na Jamaica biggest reggae star since di late Bob Marley

Jamaican reggae star Mark Anthony Myrie AKA Buju Banton, don return to im kontri afta im comot prison for America.

E bin serve seven years inside jail for Georgia afta dem find am guilty of plan to supply cocaine.

Plenti fans run go di main entrance of Norman Manley International Airport where Buju Banton land to go welcome am home.

Pipo for social media dey share snaps of di "Destiny" singer as e show face for im homeland.

Even American singer P.Diddy dey very happy say dem don free Buju Banton.

Buju Banton na Jamaica biggest reggae star afta di late Bob Marley, but pipo begin condemn am all over di world for 1990s because of im song Boom Bye bye wey say make dem dey kill gay pipo.

Image copyright Getty Images
Image example Jamaican reggae star Buju Banton don return to di island afta dem released from prison inside di United States.

Dem arrest Buju Banton for December 2009 afta one drug trafficker wey dem don first convict meet am for one flight from Spain and dem begin plan to set up cocaine deal for am.

Jury say im dey guilty on three counts of drug trafficking. Buju Banton maintain im innocence till di very end, but e lose different appeal on top di mata.

For February 2011, dem convict Banton for illegal possession of a firearm and say e dey plan to get cocaine wit di mind to distribute am.

Dem sentence am to 10 years but afta a year later, im attorneys appeal make dem reduce di prison term wit di argument say Banton no too dey involve for di drug operation wey led to im arrest for December 2009. But di appeal no work.

Topics Wey Dem Resemble

Another thing we de for inside dis tori