Coachella 2019: Mr Eazi, Burna Boy go perform wit Ariana Grande & Tame Impala
Two Nigerians stars; Mr Eazi and Burna Boy on Thursday become di only musicians from di whole of west Africa wey go perform for di 2019 Coachella Valley Music and Arts Festival.
Di music festival be one di biggest music festivals for di world and dis year Perth band Tame Impala, alongside Childish Gambino and Ariana Grande na im go headline Coachella
Coachella post picture of di full lineup for Twitter dis morning wey show say Mr Eazi, Burna Boy go perform alongside Ariana Grande & Tame Impala
Burna Boy and Mr. Eazi get very impressive year for 2018 as two of dem release major projects.
Burna Boy release Outside wey give us hits like Heaven's Gate with Lily Allen and Ye wey top iTunes charts. Mr Eazi also release Life Is Eazi, Vol. 2 - Lagos to London wey get hits like Surrender with Simi and Property.
Burna Boy and Mr Eazi also get collaboration for di album wey dem call Miss You Bad.
Last year, dem announce sey Wizkid dey di lineup but im no show di concert.
Nigeria for Coachella
No be today wey Nigerian artists don dey go show dia skill for Coachella.
For 2012, Seun Kuti and Egypt 80 perform for di festival. Dis one come one year after dem release 'From Africa With Fury: Rise'
Kayus Bankole wey dey part of di award winning group Young Fathers perform for di 2016 edition of Coachella.
Di Coachella pipo announce King Sunny Ade as part of di lineup for 2017 when dem announce Beyonce as headliner.
Afta Beyonce pull out because she carry belle, dem release new flyer wey show Lady gaga as headliner and King Sunny Ade name no dey di list.
Also for 2017, Nigerian-born artist Olalekan Jeyifous wey dey Brooklyn create art installation for Coachella wey him call Crown Ether. He describe am as tree house wey show people wey come together around music and art.
2018 see Jidenna, Jacob Banks and Wizkid for di lineup of performers. Jidenna and Jacob Banks show perform for di show but Wizkid miss im set. Di pop star tok say dem no give im band visa for di show.
Beyoncé wey be di first black woman to headline Coachella, pay tribute to Fela Anikulapo Kuti as her band perform Zombie. Even di Chimamanda Ngozi Adichie sample from 'We Should All Be Feminist' wey dey her song 'Flawless' play for her performance. Nigerian Singer and Dancer Didi Emah even get solo dance performance for Beyoncé set.
Anoda Nigerian-American dancer and actress Kendra "K.O" Oyesanya also be part of di pipo wey dance for Beyoncé.