Tyler Perry movies: Five of Hollywood newest billionaire feems wey make serious money

Tyler Perry and Madea

Wia dis foto come from, Getty/ Instagram

American actor, Tyler Perry don officially become billionaire according to Forbes magazine recent estimate.

Forbes estimate say Tyler Perry don earn more than $1.4 billion in pretax income since 2005, wey im use take buy homes for Atlanta, New York, Los Angeles and Jackson Hole, Wyoming, plus two planes.

Today Forbes estimate im net worth at $1 billion, with clear path to future membership inside di Forbes 400.

How Tyler Perry take join di Billionaire club

Wia dis foto come from, Getty Images

According to Forbes, Tyler Perry different stakes for various parts of di entertainment business don boost im bank balance.

Na 100% of im own creative output, including more dan 1,200 episodes of television, 22 feature films and at least two dozen stage plays, plus 330-acre studio lot for di edge of Atlanta southern limits.

Perry wey also be writer, director and filmmaker use dis control to bargain for one deal with ViacomCBS wey pay am $150 million a year for new content and dey give am equity stake in BET+, di streaming service wey debut last September.

Forbes don breakdown how dem feel say Perry climb to dis level;

  • Im 330 acre Georgia studio, wey e buy for 2015
  • $280m, $40m investment for homes and toys.
  • $320m from im complete back catalogue
  • $60m stake in streaming service BET+
  • $300m in cash and investments.

Di 51 years old actor, tell Forbes say im learn everything about business on his own without going to business school:

"You gatz to understand, I no get mentors. My father no sabi anything about business, and my uncles and mother, no sabi too. I no go business school. Everything wey I learn, I learn am in progress."

Afta e drop out of high school, e gain knowledge any way e fit.

E begin to dey write scripts while e get two jobs as bill collector and selling cars.

At one point, Perry, dey live for im car until e gain attention from im production work for one community theatre.

Five movies wey help make Tyler Perry billionaire

Aside dis movie dem, e don do pass forty movies and many of di most popular movies like Acrimony, Diary of a marriage counsellor, Why did I get married? and odas with stars like Janet Jackson, Mary J. Blige among odas

Madea goes to Jail

Di movie wey dem release for 2009 show and make ova $90 million for box office.

Di movie na about di life of one girl wey start to dey do prostitution and her journey for prison to comot dat life.

Madea Family Funeral

Dis na di end of di Madea series wey Tyler Perry bin start for 2006 and di movie comot for 2019 and make pass $74 million for box office..

E tok about how family dey take handle di death of dia love one even as dem dey plan di funeral.

Wia dis foto come from, Instagram/@madea

Wetin we call dis foto,

Di Tyler Perry character Madea do ten movies and feature for plenti of im tv shows and stage plays

Boo! A Madea Halloween

Dem bin release dis movie for 2016 and e make ova $73 million for box office.

Di tori show Madea as she dey fight with ghosts, zombies and oda tins wey dey make pipo fear one Halloween night and untop all di gbas-gbos, dey look afta teenagers wey dey misbehave.

Madea's Witness Protection

Dis na anoda Madea movie wey comot for 2012 and make about $66 million for box office.

Di movie show Madea afta one white family use her house take do witness protection.

Madea's Family Reunion

Dis movie bin comot for 2006 and make about $63 million for box office.

Di movie dey tok about di kwanta wey dey shele wen pipo come meet dia family. E also focus on domestic abuse.