Italy cable car fall: At least 12 dead afta accident near Lake Maggiore

Wetin we call dis Video,

First pictures don comot afta di cable car fall ontop mountain for northern Italy

At least 12 pipo don die afta one cable car fall ontop mountain near Lake Maggiore for northern Italy on Sunday.

Di accident happun with one service wey bin dey transport passengers from di resort town of Stresa up to di nearby Mottarone mountain for di region of Piedmont.

One image wey emergency services post on social media show di damaged car as e lay for bush area.

Officials say dem carry two children, wey be five and nine, from di scene by helicopter to one hospital for Turin.

Officials say emergency services receive call around 12:00 local time (11:00 BST) on Sunday.

Walter Milan, another alpine rescue spokesman, tell RaiNews24 television say di cable car "squeeze" afta e fall from a high height.

Di cause of di incident never clear yet, but local reports suggest say di cable wey carry am fit don fail about 300m (984ft) from di top of di mountain.

Wia dis foto come from, @emergenzavvf

Wetin we call dis foto,

Emergency services share picure of di deadly crash on Sunday

Wia dis foto come from, Handout Via Reuters

Wetin we call dis foto,

Police dey among emergency service rescuers wey dey work for di scene

Di website for di Stresa-Alpine-Mottarone cable car say e usually take 20 minutes to transport passengers 1,491m above sea level.

Mottarone dey between Lake Maggiore and Lake Orta, and e dey offer great views of di region to tourists.