ਨਵੀਆਂ ਆਸਾਂ ਲੈ ਕੇ ਭਾਰਤੀ ਜੇਲ੍ਹ 'ਚ ਪੈਦਾ ਹੋਈ ਹਿਨਾ ਪਰਤ ਗਈ ਪਾਕਿਸਤਾਨ

Amritsar Jail Image copyright Ravinder Singh Robin

ਭਾਰਤੀ ਜੇਲ੍ਹ ਵਿੱਚ ਪੈਦਾ ਹੋਈ ਹਿਨਾ ਨੇ ਆਪਣੀ ਮਾਂ ਅਤੇ ਮਾਸੀ ਦੇ ਨਾਲ ਅਟਾਰੀ-ਵਾਗਾ ਬਾਡਰ ਪਾਰ ਕਰ ਪਾਕਿਸਤਾਨ ਪਰਤ ਗਈ ਹੈ।

ਹਿਨਾ ਨੂੰ ਜਿੱਥੇ ਖੂਨ ਦੇ ਰਿਸ਼ਤੇਦਾਰਾਂ ਨੂੰ ਮਿਲਣ ਦਾ ਚਾਅ ਹੈ ਉੱਥੇ ਭਾਰਤ ਵਿੱਚ ਬਣੇ ਇਨਸਾਨੀ ਰਿਸ਼ਤਿਆਂ ਨੂੰ ਉਹ ਯਾਦ ਕਰਦੀ ਰਹੇਗੀ।

ਹਿਨਾ ਪਾਕਿਸਤਾਨੀ ਨਾਗਰਿਕ ਫਾਤਿਮਾ ਦੀ ਧੀ ਹੈ ਜਿਸ ਦਾ ਜਨਮ ਅੰਮ੍ਰਿਤਸਰ ਦੀ ਕੇਂਦਰੀ ਜੇਲ੍ਹ ਵਿੱਚ ਹੋਇਆ ਅਤੇ ਇੱਥੇ ਹੀ ਉਸ ਦਾ ਪਾਲਣ-ਪੋਸ਼ਣ ਅਤੇ ਮੁੱਢਲੀ ਪੜ੍ਹਾਈ ਹੋਈ।

ਹਿਨਾ ਦੀ ਮਾਂ ਅਤੇ ਉਸਦੀ ਮਾਸੀ ਮੁਮਤਾਜ਼ ਨੂੰ ਅਟਾਰੀ ਰੇਲਵੇ ਸਟੇਸ਼ਨ 'ਤੇ ਪੁਲਿਸ ਨੇ ਨਸ਼ੀਲੇ ਪਦਾਰਥਾਂ ਸਣੇ ਗ੍ਰਿਫ਼ਤਾਰ ਕਰਨ ਦਾ ਦਾਅਵਾ ਕੀਤਾ ਸੀ ਜਿਸ ਵਿੱਚ ਉਨ੍ਹਾਂ ਨੂੰ ਸਾਢੇ 10 ਸਾਲ ਸਜ਼ਾ ਅਤੇ 2-2 ਲੱਖ ਰੁਪਏ ਜੁਰਮਾਨਾ ਹੋਇਆ ਸੀ।

'1984 ਕਤਲੇਆਮ ਦੀ ਸਰਕਾਰੀ ਕਹਾਣੀ ਝੂਠੀ'

ਕਿਉ ਹੋ ਰਹੀ ਹੈ ਸੋਸ਼ਲ ਮੀਡੀਆ 'ਤੇ ਪ੍ਰਿਅੰਕਾ ਦੀ ਖਿਚਾਈ

Image copyright Ravinder Singh Robin

ਜੁਰਮਾਨਾ ਨਾ ਦੇਣ ਦੀ ਸੂਰਤ ਵਿੱਚ 2-2 ਸਾਲ ਹੋਰ ਸਜ਼ਾ ਭੁਗਤਣੀ ਪੈਣੀ ਸੀ ਪਰ ਇੱਕ ਸਥਾਨਕ ਵਕੀਲ ਨਵਜੋਤ ਕੌਰ ਚੱਬਾ ਅਤੇ ਸਮਾਜਸੇਵੀ ਜਥੇਬੰਦੀ ਨੇ ਉਨ੍ਹਾਂ ਦਾ ਕੇਸ ਲੜਿਆ ਅਤੇ ਜੁਰਮਾਨਾ ਜਮ੍ਹਾ ਕਰਵਾ ਕੇ ਰਿਹਾਈ ਸੰਭਵ ਬਣਾਈ।

ਬੀਬੀਸੀ ਨਾਲ ਗੱਲਬਾਤ ਦੌਰਾਨ ਹਿਨਾ ਨੇ ਕਿਹਾ ਕਿ ਉਹ ਰਿਹਾਈ ਤੋਂ ਬਾਅਦ ਪਾਕਿਸਤਾਨ ਵਿੱਚ ਆਪਣੇ ਪਰਿਵਾਰ ਨੂੰ ਮਿਲਣ ਲਈ ਉਤਸਕ ਹੈ ਪਰ ਉਸਨੂੰ ਅੰਮ੍ਰਿਤਸਰ ਦੀ ਜੇਲ੍ਹ ਵਿੱਚ ਬਣੀਆਂ ਉਸਦੀਆਂ ਮਾਸੀਆ ਅਤੇ ਉਸਦੇ ਕੇਸ ਦੀ ਪੈਰਵੀ ਕਰਨ ਵਾਲੀ ਵਕੀਲ ਨਵਜੋਤ ਕੌਰ ਚੱਬਾ ਖਾਸਤੌਰ 'ਤੇ ਯਾਦ ਆਏਗੀ।

ਹਿਨਾ ਦੱਸਦੀ ਹੈ, "ਨਵਜੋਤ ਕੌਰ ਮਾਸੀ ਨੇ ਸਾਡਾ ਕੇਸ ਲੜਿਆ, ਜੁਰਮਾਨੇ ਦੇ ਪੈਸੇ ਭਰਵਾਏ ਅਤੇ ਮੇਰੇ ਪਿਤਾ ਨਾਲ ਮੈਨੂੰ ਮਿਲਾਇਆ।''

"ਮੈਂ ਉਨ੍ਹਾਂ ਦਾ ਸ਼ੁਕਰੀਆ ਕਰਦੀ ਹਾਂ ਤੇ ਕਹਿਣਾ ਚਾਹਾਂਗੀ ਆਈ ਲਵ ਯੂ ਮਾਸੀ। ਪਰਮਾਤਮਾ ਤੁਹਾਨੂੰ ਤਰੱਕੀਆਂ ਬਖਸ਼ੇ ਅਤੇ ਹੋਰ ਉੱਚੇ ਅਹੁਦੇ ਦੇਵੇ।''

ਅਸੀਂ ਗਲਤ ਪਛਾਣ ਦਾ ਸ਼ਿਕਾਰ ਹੋਏ

ਆਪਣੇ ਉੱਤੇ ਲੱਗੇ ਇਲਜ਼ਾਮਾਂ ਬਾਰੇ ਹਿਨਾ ਦੀ ਮਾਂ ਫਾਤਿਮਾ ਕਹਿੰਦੀ ਹੈ ਕਿ ਉਹ ਬੇਕਸੂਰ ਸਨ।

Image copyright Ravinder Singh Robin

ਫਾਤਿਮਾ ਮੁਤਾਬਕ ਉਹ ਗੁਜਰਾਂਵਾਲਾ ਤੋਂ ਭਾਰਤ ਵਿੱਚ ਸਾਮਾਨ ਵੇਚਣ ਆਈਆਂ ਸਨ।

ਉਸ ਨੇ ਦਾਅਵਾ ਕੀਤਾ ਕਿ ਜਦੋਂ ਉਹ ਰੇਲਵੇ ਸਟੇਸ਼ਨ ਉੱਤੇ ਬੈਠੀਆਂ ਸਨ ਤਾਂ ਇੱਕ ਪਾਕਿਸਤਾਨੀ ਮੁੰਡਾ ਇਹ ਕਹਿ ਕੇ ਚਲਾ ਗਿਆ ਕਿ ਮੇਰੇ ਸਾਮਾਨ ਦਾ ਖਿਆਲ ਰੱਖਿਓ।

ਇੰਨੇ ਨੂੰ ਪੁਲਿਸ ਆ ਗਈ। ਪੁਲਿਸ ਨੇ ਉਨ੍ਹਾਂ ਨੂੰ ਪੁੱਛਿਆ ਕਿ ਇਹ ਕਿਸਦਾ ਸਾਮਾਨ ਹੈ। ਉਨ੍ਹਾਂ ਤੋਂ ਕਿਹਾ ਗਿਆ ਕਿ ਆਪਣਾ ਹੀ ਹੈ।

ਫਾਤਿਮਾ ਮੁਤਾਬਕ ਪੁਲਿਸ ਉਨ੍ਹਾਂ ਨੂੰ ਸਾਮਾਨ ਦੇ ਨਾਲ ਲੈ ਗਈ ਅਤੇ ਬਾਅਦ ਵਿੱਚ ਉਨ੍ਹਾਂ ਨੂੰ ਸਮਝ ਆਈ ਕਿ ਇਹ ਤਾਂ ਨਸ਼ੀਲੇ ਪਦਾਰਥ ਸਨ।

Image copyright RAVINDER SINGH ROBIN
ਫੋਟੋ ਕੈਪਸ਼ਨ ਫ਼ੈਜ-ਉਲ-ਰਹਿਮਾਨ, ਹਿਨਾ ਦੇ ਪਿਤਾ

ਉਨ੍ਹਾਂ ਮੁਤਾਬਕ ਜਿਸ ਵਿਅਕਤੀ ਦਾ ਉਹ ਸਾਮਾਨ ਸੀ ਉਹ ਲਹੌਰ ਦਾ ਰਹਿਣ ਵਾਲਾ ਸੀ ਜਿਸ ਨਾਲ ਉਨ੍ਹਾਂ ਦਾ ਕੋਈ ਵਾਹ-ਵਾਸਤਾ ਨਹੀਂ ਸੀ।

ਰਿਹਾਈ ਦੀ ਖੁਸ਼ੀ ਪਰ ਵਿਛੋੜੇ ਦਾ ਗਮ

ਫਾਤਿਮਾ ਕਹਿੰਦੀ ਹੈ ਕਿ ਉਨ੍ਹਾਂ ਨੂੰ ਖੁਸ਼ੀ ਹੈ ਕਿ ਉਨ੍ਹਾਂ ਦੀ ਰਿਹਾਈ ਸੰਭਵ ਹੋ ਸਕੀ ਹੈ ਪਰ ਦੁੱਖ ਇਸ ਗੱਲ ਦਾ ਹੈ ਕਿ ਇਸ ਸਮੇਂ ਦੌਰਾਨ ਬਹੁਤ ਕੁਝ ਬਦਲ ਗਿਆ।

ਉਸਦੀ ਮਾਂ ਦਾ ਇੰਤਕਾਲ ਭਾਰਤ ਵਿੱਚ ਹੀ ਹੋਇਆ ਸੀ ਜਦਕਿ ਉਨ੍ਹਾਂ ਦੇ ਪਿਤਾ ਦੀ ਮੌਤ ਪਾਕਿਸਤਾਨ ਵਿੱਚ ਹੋ ਗਈ। ਇਸ ਤਰ੍ਹਾਂ ਜੇਲ੍ਹ ਵਿੱਚ ਬਿਤਾਏ ਸਮੇਂ ਦੌਰਾਨ ਉਸ ਦੀ ਮਾਂ ਅਤੇ ਪਿਤਾ ਦੋਵੇਂ ਫੌਤ ਹੋ ਗਏ।

Image copyright RAVINDER SINGH ROBIN
ਫੋਟੋ ਕੈਪਸ਼ਨ ਹਿਊਮੈਨਿਟੀ ਕਲੱਬ ਵੱਲੋਂ ਹਿਨਾ ਲਈ ਪਿਆਰ ਦਾ ਨਜ਼ਰਾਨਾ

ਫਾਤਿਮਾ ਕਹਿੰਦੀ ਹੈ ਕਿ ਉਹ ਇਸ ਸਮੇਂ ਨੂੰ ਭੁੱਲ ਕੇ ਨਵੇਂ ਸਿਰੇ ਤੋਂ ਜ਼ਿੰਦਗੀ ਸ਼ੁਰੂ ਕਰਨਾ ਚਾਹੁੰਦੀ ਹੈ ਅਤੇ ਆਪਣੇ ਪਰਿਵਾਰ ਦੀ ਦੇਖਭਾਲ ਕਰਨਾ ਚਾਹੁੰਦੀ ਹੈ।

ਭਾਰਤ ਸਰਕਾਰ ਦਾ ਧੰਨਵਾਦ

ਫਾਤਿਮਾ ਭਾਰਤ ਸਰਕਾਰ ਦਾ ਇਸ ਗੱਲ ਲਈ ਧੰਨਵਾਦ ਕਰਦੀ ਹੈ ਕਿ ਉਸ ਦੀ ਧੀ ਹਿਨਾ ਨੂੰ ਉਸਦੇ ਨਾਲ ਹੀ ਰਹਿਣ ਦਿੱਤਾ ਗਿਆ ਅਤੇ ਉਸ ਦੀ ਪੜ੍ਹਾਈ ਲਿਖਾਈ ਦਾ ਵੀ ਖ਼ਾਸ ਖ਼ਿਆਲ ਰੱਖਿਆ ਗਿਆ।

ਫਾਤਿਮਾ ਦੋਹਾਂ ਦੇਸਾਂ ਦੀਆਂ ਸਰਕਾਰਾਂ ਨੂੰ ਅਪੀਲ ਕਰਦੀ ਹੈ ਕਿ ਉਹ ਰਿਸ਼ਤਿਆਂ ਨੂੰ ਸੁਖਾਵੇਂ ਬਣਾਉਣ ਅਤੇ ਸਜ਼ਾਵਾਂ ਪੂਰੀਆਂ ਕਰ ਚੁੱਕੇ ਇੱਕ-ਦੂਜੇ ਦੇ ਨਾਗਰਿਕਾਂ ਨੂੰ ਰਿਹਾਅ ਕਰਨ।

ਪਿਆਰ ਦੀ ਨਿਸ਼ਾਨੀ

ਹਿਨਾ ਦਾ ਕੇਸ ਲੜਨ ਵਾਲੀ ਵਕੀਲ ਨਵਜੋਤ ਕੌਰ ਚੱਬਾ ਅਤੇ ਹਿਊਮੈਨਿਟੀ ਕਲੱਬ ਨੇ ਹਿਨਾ ਨੂੰ ਕਈ ਤੋਹਫ਼ੇ ਦਿੱਤੇ ਹਨ।

Image copyright Ravinder Singh Robin

ਹਿਊਮੈਨਿਟੀ ਕਲੱਬ ਵੱਲੋਂ ਇੱਕ ਖਾਸ ਤਰ੍ਹਾਂ ਦਾ ਲਾਕੇਟ ਹਿਨਾ ਨੂੰ ਤੋਹਫੇ ਵਜੋਂ ਦਿੱਤਾ ਗਿਆ ਹੈ ਜਿਸ ਵਿੱਚ ਭਾਰਤ ਅਤੇ ਪਾਕਿਸਤਾਨ ਦੋਵਾਂ ਦੇ ਝੰਡੇ ਬਣਾ ਕੇ ਅਮਨ ਸ਼ਾਂਤੀ ਦਾ ਸੁਨੇਹਾ ਦੇਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ।

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)

ਸਬੰਧਿਤ ਵਿਸ਼ੇ