ਸੋਸ਼ਲ: ਜੋੜ-ਮੇਲ 'ਤੇ ਸਿਆਸੀ ਕਾਨਫ਼ਰੰਸ ਨਾ ਕਰਨ ਦੇ 'ਆਪ' ਦੇ ਐਲਾਨ ਦਾ ਪੋਸਟਮਾਰਟਮ

ਭਗਵੰਤ ਮਾਨ

ਤਸਵੀਰ ਸਰੋਤ, Getty Images

ਆਮ ਆਦਮੀ ਪਾਰਟੀ ਆਗੂ ਤੇ ਸੰਗਰੂਰ ਤੋਂ ਲੋਕ ਸਭਾ ਮੈਂਬਰ ਭਗਵੰਤ ਮਾਨ ਨੇ ਆਪਣੇ ਫ਼ੇਸਬੁੱਕ ਅਕਾਊਂਟ ਉੱਤੇ ਇੱਕ ਸਟੇਟਸ ਵਿੱਚ ਲਿਖਿਆ ਕਿ ਉਨ੍ਹਾਂ ਦੀ ਪਾਰਟੀ ਨਾ ਤਾਂ ਇਸ ਵਾਰ ਤੇ ਨਾ ਹੀ ਭਵਿੱਖ ਵਿੱਚ ਸ੍ਰੀ ਚਮਕੌਰ ਸਾਹਿਬ ਤੇ ਸ੍ਰੀ ਫ਼ਤਹਿਗੜ੍ਹ ਸਾਹਿਬ ਦੇ ਸ਼ਹੀਦੀ ਜੋੜ ਮੇਲਿਆਂ 'ਤੇ ਸਿਆਸੀ ਕਾਨਫ਼ਰੰਸਾਂ ਕਰੇਗੀ।

ਇਹ ਫ਼ੈਸਲਾ ਚਾਰ ਸਾਹਿਬਜ਼ਾਦਿਆਂ ਦੀਆਂ ਕੁਰਬਾਨੀਆਂ ਨੂੰ ਬਿਨਾਂ ਸਿਆਸੀ ਰੰਗਤ ਤੋਂ ਸ਼ਰਧਾਂਜਲੀ ਦੇਣ ਦੇ ਇਰਾਦੇ ਨਾਲ ਕੀਤਾ ਗਿਆ ਹੈ।

ਤਸਵੀਰ ਸਰੋਤ, facebook

ਖ਼ਬਰ ਲਿਖੇ ਜਾਣ ਤੱਕ ਇਹ ਪੋਸਟ 523 ਵਾਰ ਸਾਂਝੀ ਕੀਤੀ ਜਾ ਚੁੱਕੀ ਹੈ ਜਦ ਕਿ ਕੋਈ ਸੱਤ ਹਜ਼ਾਰ ਲੋਕਾਂ ਤੇ ਇਸ ਉੱਪਰ ਪ੍ਰਤੀਕਿਰਿਆ ਦਿੱਤੀ ਹੈ।

ਲੋਕ ਇਸ ਦਾ ਸਵਾਗਤ ਕਰ ਰਹੇ ਹਨ ਤੇ ਲੰਘੀਆਂ ਸਥਾਨਕ ਸਰਕਾਰਾਂ ਬਾਰੇ ਚੋਣਾਂ ਵਿੱਚ ਹੋਈ ਪਾਰਟੀ ਦੀ ਗਤ ਨਾਲ ਇਸ ਫ਼ੈਸਲੇ ਨੂੰ ਜੋੜ ਕੇ ਚਟਕਾਰੇ ਵੀ ਲੈਂਦੇ ਦਿਖੇ।

ਕਈ ਲੋਕਾਂ ਨੇ ਇਨ੍ਹਾਂ ਦਿਨਾਂ ਦੌਰਾਨ ਸ਼ਰਾਬ ਦੇ ਠੇਕੇ ਵੀ ਬੰਦ ਕਰਵਾਉਣ ਦੀ ਗੱਲ ਕੀਤੀ।

ਭਗਵੰਤ ਮਾਨ ਦੇ ਸਟੇਟਸ ਤੋਂ ਬਾਅਦ ਹਰਵਿੰਦਰ ਰਾਣੂ ਨੇ ਕਿਹਾ ਕਿ ਲੋਕਾਂ ਨੇ ਆਉਣਾ ਵੀ ਨਹੀਂ ਸੀ ਸੋ ਚੰਗਾ ਹੋਇਆ ਕੁਰਸੀਆਂ ਦਾ ਕਿਰਾਇਆ ਬਚੇਗਾ ਜਦ ਕਿ ਹਾਕਮ ਸਿੰਘ ਸਹੋਤਾ ਨੇ 2 ਅਕਤੂਬਰ ਦੀ ਤਰਜ਼ 'ਤੇ ਸਾਹਿਬਜਾਦਿਆਂ ਦੀ ਸਹੀਦੀ ਵਾਲੇ ਦਿਨ ਵੀ ਸ਼ਰਾਬ ਦੇ ਠੇਕੇ ਬੰਦ ਕਰਉਣ ਦੀ ਮੰਗ ਕੀਤੀ।

ਤਸਵੀਰ ਸਰੋਤ, Facebook

ਆਰਐੱਸ ਢਿਲਵਾਂ ਨੇ ਲਿਖਿਆ ਕਿ ਇਸ ਦਾ ਮਤਲਬ ਕਿ ਪਹਿਲਾਂ ਤੁਸੀਂ ਸਿਆਸਤ ਕਰਦੇ ਸੀ? ਜਦ ਕਿ ਰਾਜਿੰਦਰ ਸਿੰਘ ਨੇ ਕਿਹਾ ਕਿ, ਜਾਣਾ ਵੀ ਕੀਹਨੇ ਸੀ?

ਹਰਹੁਕਮ ਸਿੰਘ ਨੇ ਲਿਖਿਆ ਕਿ ਹੁਣ ਵੋਟਾਂ ਨੇੜੇ ਨਾ ਹੋਣ ਕਰਕੇ ਇਨ੍ਹਾਂ ਨੂੰ ਕਾਨਫ਼ਰੰਸ ਕਰੇ ਦਾ ਫ਼ਾਇਦਾ ਵੀ ਨਹੀਂ ਸੀ।

ਅਮਨ ਢਿੱਲੋਂ ਦੋਹਾ ਨੇ ਲਿਖਿਆ ਕਿ ਇੱਕਠੇ ਹੋਣਾ ਨਹੀਂ ਤੇ ਬਹਾਨਾ ਸ਼ਹੀਦੀ ਦਾ ਬਣਾ ਦਿੱਤਾ। ਲਵਪ੍ਰੀਤ ਸਿੰਘ ਨੇ ਕਿਹਾ ਕਿ ਇਸ ਸਕੀਮ ਨਾਲ ਸਿਆਸਤ ਕਰ ਤਾਂ ਲਈਆਂ।

ਤਸਵੀਰ ਸਰੋਤ, facebook

ਬਹੁਤੇ ਲੋਕ ਭਗਵੰਤ ਮਾਨ ਦੇ ਇਸ ਐਲਾਨ ਦਾ ਸਵਾਗਤ ਹੀ ਕਰਦੇ ਨਜ਼ਰ ਆਏ। ਜਗਦੀਪ ਓਟਾਲ, ਦਿਲਬਾਗ ਸਿੰਘ ਕਿੰਗਰਾ ਤੇ ਜੱਸੀ ਮਰਾਉਲੀ ਨੇ ਇਸ ਲਈ ਮਾਨ ਦਾ ਧੰਨਵਾਦ ਕੀਤਾ ਅਤੇ ਇਹ ਫ਼ੈਸਲਾ ਭਵਿੱਖ ਵਿੱਚ ਵੀ ਕਾਇਮ ਰਹਿਣ ਦੀ ਉਮੀਦ ਕੀਤੀ।

ਤਸਵੀਰ ਸਰੋਤ, facebook

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)