ਵਿੱਕੀ ਗੌਂਡਰ ਤੋਂ ਬਾਅਦ ਇਸ ਸ਼ਖਸ ਦੇ ਮਗਰ ਪੰਜਾਬ ਪੁਲਿਸ

ਰਮਨਜੀਤ ਸਿੰਘ ਰੋਮੀ Image copyright PUNJAB POLICE
ਫੋਟੋ ਕੈਪਸ਼ਨ ਪਟਿਆਲਾ ਪੁਲਿਸ ਦੇ ਹੱਥੇ ਚੜ੍ਹੇ ਰਮਨਜੀਤ ਸਿੰਘ ਰੋਮੀ ਦੀ ਪੁਰਾਣੀ ਤਸਵੀਰ

ਹਾਂਗ ਕਾਂਗ ਵਿੱਚ ਗਿਰਫ਼ਤਾਰ ਕੀਤੇ ਗਏ ਨਾਭਾ ਜੇਲ੍ਹ ਬ੍ਰੇਕ ਦੇ ਮਾਸਟਰਮਾਈਂਡ ਰਮਨਜੀਤ ਸਿੰਘ ਉਰਫ਼ ਰੋਮੀ ਦੀ ਹਵਾਲਗੀ ਲਈ ਪੰਜਾਬ ਪੁਲਿਸ ਨੇ ਕੋਸ਼ਿਸ਼ਾਂ ਸ਼ੁਰੂ ਕਰ ਦਿੱਤੀਆਂ ਹਨ।

ਪੁਲਿਸ ਮੁਤਾਬਕ ਪੰਜਾਬ ਵਿੱਚ ਹੋਏ ਸਿਆਸੀ ਕਤਲਾਂ ਵਿੱਚ ਵੀ ਰੋਮੀ ਦੀ ਸ਼ਮੂਲੀਅਤ ਰਹੀ ਹੈ।

ਪੰਜਾਬ ਪੁਲਿਸ ਮੁਤਾਬਕ, ''ਗੈਂਗਸਟਰ ਵਿੱਕੀ ਗੌਂਡਰ ਨੂੰ ਜੇਲ੍ਹ ਤੋਂ ਭਜਾਉਣ ਵਾਲੇ ਰਮਨਜੀਤ ਸਿੰਘ ਉਰਫ਼ ਰੋਮੀ ਦੀ ਹਵਾਲਗੀ ਲਈ ਕੂਟਨੀਤਕ ਤੌਰ 'ਤੇ ਕੋਸ਼ਿਸ਼ ਸ਼ੁਰੂ ਹੋ ਗਈ ਹੈ।''

ਪੁਲਿਸ ਦੇ ਬੁਲਾਰੇ ਨੇ ਅੱਗੇ ਕਿਹਾ ਕਿ ਰਮਨਜੀਤ ਖ਼ਿਲਾਫ਼ ਰੈੱਡ ਕਾਰਨਰ ਨੋਟਿਸ ਜਾਰੀ ਕੀਤਾ ਗਿਆ ਸੀ।

ਉਹ ਹਾਲਹੀ ਵਿੱਚ ਹਾਂਗ ਕਾਂਗ ਦੇ ਕੋਵਲੂਨ ਵਿੱਚ ਇੱਕ ਚੋਰੀ ਦੇ ਕੇਸ ਵਿੱਚ ਗਿਰਫ਼ਤਾਰ ਕੀਤਾ ਗਿਆ ਸੀ।

Image copyright OZAN KOSE/AFP/Getty Images
ਫੋਟੋ ਕੈਪਸ਼ਨ ਸੰਕੇਤਕ ਤਸਵੀਰ

ਪੰਜਾਬ ਪੁਲਿਸ ਨੂੰ ਰੋਮੀ ਦੀ ਗਿਰਫ਼ਤਾਰੀ ਦੀ ਜਾਣਕਾਰੀ ਇੰਟਰਪੋਲ ਨੇ ਦਿੱਤੀ। ਪੁਲਿਸ ਨੇ ਰੋਮੀ ਦਾ ਪਾਕਿਸਤਾਨ ਕਨੈਕਸ਼ਨ ਹੋਣ ਦਾ ਵੀ ਦਾਅਵਾ ਕੀਤਾ ਹੈ।

ਪੁਲਿਸ ਮੁਤਾਬਕ, ''ਰਮਨਜੀਤ ਸਿੰਘ ਰੋਮੀ ਪੰਜਾਬ ਦੇ ਗੈਂਗਸਟਰਾਂ ਤੇ ਪਾਕਿਸਤਾਨ 'ਚ ਬੈਠੇ ਵੱਖਵਾਦੀਆਂ ਵਿਚਾਲੇ ਕੜੀ ਦਾ ਕੰਮ ਕਰਦਾ ਸੀ। ਉਹ ਆਪਣੀਆਂ ਗਤੀਵਿਧੀਆਂ ਨੂੰ ਸੋਸ਼ਲ ਮੀਡੀਆ ਰਾਹੀਂ ਅੰਜਾਮ ਦਿੰਦਾ ਸੀ।''

ਨਾਭਾ ਜੇਲ੍ਹ ਬ੍ਰੇਕ ਦਾ ਮਾਸਟਰਮਾਈਂਡ ਰੋਮੀ ਜੂਨ 2016 ਵਿੱਚ ਨਾਭਾ ਜੇਲ੍ਹ ਵਿੱਚ ਹੀ ਬੰਦ ਸੀ।

ਇੱਕ ਮਹੀਨੇ ਬਾਅਦ ਉਸ ਨੂੰ ਜ਼ਮਾਨਤ ਮਿਲੀ ਅਤੇ ਉਹ ਹਾਂਗ ਕਾਂਗ ਭੱਜ ਗਿਆ ਜਿੱਥੇ ਉਸ ਨੇ ਜੇਲ੍ਹ ਬ੍ਰੇਕ ਦੀ ਪੂਰੀ ਸਾਜਿਸ਼ ਘੜੀ।

'ਜਗਤਾਰ ਜੌਹਲ ਨਾਲ ਸਬੰਧ'

ਪੰਜਾਬ ਪੁਲਿਸ ਮੁਤਾਬਕ ਰਮਨਜੀਤ ਸਿੰਘ ਰੋਮੀ ਬ੍ਰਿਟਿਸ਼ ਨਾਗਰਿਕ ਜਗਤਾਰ ਸਿੰਘ ਜੌਹਲ ਨਾਲ ਵੀ ਸੰਪਰਕ ਵਿੱਚ ਸੀ।

ਉਹੀ ਜਗਤਾਰ ਸਿੰਘ ਜੌਹਲ ਜਿਸ 'ਤੇ ਪੰਜਾਬ ਵਿੱਚ ਹਿੰਦੂ ਲੀਡਰਾਂ ਦੇ ਕਤਲਾਂ ਲਈ ਸਾਜਿਸ਼ ਘੜਨ ਦਾ ਇਲਜ਼ਾਮ ਹੈ।

ਫੋਟੋ ਕੈਪਸ਼ਨ ਪੰਜਾਬ ਪੁਲਿਸ ਨਾਲ ਬ੍ਰਿਟਿਸ਼ ਨਾਗਰਿਕ ਜਗਤਾਰ ਸਿੰਘ ਜੌਹਲ

ਪੰਜਾਬ ਪੁਲਿਸ ਦਾ ਕਹਿਣਾ ਹੈ ਕਿ ਰਮਨਜੀਤ ਸਿੰਘ ਰੋਮੀ 'ਤੇ ਨਾਭਾ ਜੇਲ੍ਹ ਬ੍ਰੇਕ, ਸਿਆਸੀ ਕਤਲਾਂ ਤੋਂ ਇਲਾਵਾ ਅੱਤਵਾਦੀ ਗਤੀਵਿਧੀਆਂ ਲਈ ਗ਼ੈਰ-ਕਾਨੂੰਨੀ ਤਰੀਕੇ ਨਾਲ ਫੰਡ ਟਰਾਂਸਫ਼ਰ, ਕਿਡਨੈਪਿੰਗ ਤੇ ਹਥਿਾਰਾਂ ਦੀ ਸਮਗਲਿੰਗ ਦੇ ਵੀ ਇਲਜ਼ਾਮ ਹਨ।

ਰਮਨਜੀਤ ਸਿੰਘ ਰੋਮੀ 'ਤੇ ਕਿਹੜੇ ਕੇਸ?

ਪੰਜਾਬ ਪੁਲਿਸ ਮੁਤਾਬਕ:

  • 27 ਨਵੰਬਰ 2016 ਨੂੰ ਅੱਤ ਸੁਰੱਖਿਅਤ ਨਾਭਾ ਜੇਲ੍ਹ ਤੋੜੀ ਗਈ ਸੀ।
  • ਗੈਂਗਸਟਰ ਵਿੱਕੀ ਗੌਂਡਰ ਨੂੰ ਸਾਥੀਆਂ ਸਣੇ ਭਜਾਉਣ ਦਾ ਇਲਜ਼ਾਮ।
  • ਪਟਿਆਲਾ ਜ਼ਿਲ੍ਹੇ ਦੀ ਨਾਭਾ ਕੋਤਵਾਲੀ ਵਿੱਚ ਮਾਮਲਾ ਦਰਜ
  • 4 ਅਪਰੈਲ 2016 ਨੂੰ ਗ਼ੈਰ-ਕਾਨੂੰਨੀ ਹਥਿਆਰਾਂ ਸਮੇਤ ਨਾਭਾ ਵਿੱਚ ਸਾਥੀ ਸਮੇਤ ਕਾਬੂ।
  • ਰੋਮੀ 'ਤੇ ਫ਼ਰਜ਼ੀ ਕਰੈਡਿਟ ਕਾਰਡ ਬਣਾਉਣ ਦਾ ਇਲਜ਼ਾਮ ਸੀ।
  • ਨਾਭਾ ਜੇਲ੍ਹ ਵਿੱਚ ਬੰਦ ਰੋਮੀ ਜ਼ਮਾਨਤ 'ਤੇ ਬਾਹਰ ਆਇਆ ਅਤੇ ਉਸ ਵੇਲੇ ਤੋਂ ਹੀ ਭਗੌੜਾ ਹੈ।

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)