ਸਪਨਾ ਚੌਧਰੀ ਦਾ ਇੱਕ ਆਮ ਕੁੜੀ ਤੋਂ ਸਟਾਰ ਬਣਨ ਦਾ ਸਫਰ

ਸਪਨਾ ਚੌਧਰੀ Image copyright Sapna Chaudhary/FB

ਹਰਿਆਣਾ ਦੀ ਮਸ਼ਹੂਰ ਡਾਂਸਰ ਅਤੇ ਰਿਐਲਟੀ ਸ਼ੋਅ ਬਿਗ ਬੌਸ 'ਚ ਹਿੱਸਾ ਲੈ ਚੁੱਕੀ ਸਪਨਾ ਚੌਧਰੀ ਨੇ ਕਾਂਗਰਸ 'ਚ ਸ਼ਾਮਿਲ ਹੋਣ ਤੋਂ ਇਨਕਾਰ ਕੀਤਾ ਹੈ।

ਇੱਕ ਪ੍ਰੈਸ ਕਾਨਫਰੰਸ ਸੰਬੋਧਿਤ ਕਰਦਿਆਂ ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਕਾਂਗਰਸ ਦੀ ਸਦੱਸਤਾ ਲਈ ਕੋਈ ਫਾਰਮ ਨਹੀਂ ਭਰਿਆ।

ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਕਾਂਗਰਸ ਦੀ ਜਰਨਲ ਸਕੱਤਰ ਪ੍ਰਿਅੰਕਾ ਗਾਂਧੀ ਨਾਲ ਟਵਿੱਟਰ 'ਤੇ ਸ਼ੇਅਰ ਹੋ ਰਹੀ ਉਨ੍ਹਾਂ ਦੀ ਤਸਵੀਰ ਪੁਰਾਣੀ ਹੈ।

ਸਪਨਾ ਨੇ ਕਿਹਾ, "ਮੈਂ ਕਾਂਗਰਸ ਵਿੱਚ ਸ਼ਾਮਿਲ ਨਹੀਂ ਹੋਈ ਹਾਂ। ਮੇਰੀਆਂ ਤਸਵੀਰਾਂ ਬਹੁਤ ਪਹਿਲਾਂ ਖਿੱਚੀਆਂ ਹੋਈਆਂ ਹਨ। ਉਹ ਹੁਣ ਦੀਆਂ ਨਹੀਂ ਹਨ।"

ਇਹ ਵੀ ਪੜ੍ਹੋ:-

ਕੌਣ ਹਨ ਸਪਨਾ ਚੌਧਰੀ

ਸਪਨਾ ਚੌਧਰੀ ਨੂੰ ਇੰਟਰਨੈੱਟ ਸੈਨਸੇਸ਼ਨ ਮੰਨਿਆ ਜਾਂਦਾ ਹੈ। ਫ਼ੇਸਬੁੱਕ 'ਤੇ ਉਨ੍ਹਾਂ ਦੇ 29 ਲੱਖ ਤੋਂ ਵੱਧ ਫੋਲੋਅਰਜ਼ ਹਨ।

ਸਪਨਾ, ਹਰਿਆਣਵੀ ਲੋਕ ਗੀਤ ਰਾਗਿਣੀ ਗਾਉਣ ਦੇ ਲਈ ਜਾਣੇ ਜਾਂਦੇ ਹਨ ਅਤੇ ਨਾਲ ਹੀ ਉਹ ਗੀਤਾਂ 'ਤੇ ਡਾਂਸ ਕਰਨ ਲਈ ਮਸ਼ਹੂਰ ਹਨ।

22 ਸਤੰਬਰ 1995 ਨੂੰ ਪੈਦਾ ਹੋਈ ਸਪਨਾ ਚੌਧਰੀ ਦੀ ਮਾਂ ਹਰਿਆਣਾ ਤੋਂ ਅਤੇ ਪਿਤਾ ਉੱਤਰ ਪ੍ਰਦੇਸ਼ ਤੋਂ ਹਨ। ਉਨ੍ਹਾਂ ਦੇ ਮਾਪਿਆਂ ਦੀ ਲਵ ਮੈਰਿਜ ਹੈ।

ਟੀਵੀ ਰਿਐਲਟੀ ਸ਼ੋਅ ਬਿਗ ਬੌਸ ਦੇ ਸੀਜ਼ਨ 11 ਵਿੱਚ ਉਨ੍ਹਾਂ ਨੇ ਹਿੱਸਾ ਲਿਆ ਸੀ ਅਤੇ ਉਸ ਤੋਂ ਬਾਅਦ ਉਨ੍ਹਾਂ ਦੀ ਮਕਬੂਲੀਅਤ ਹੋਰ ਵੱਧ ਗਈ।

Image copyright Sapna Choudhary/fb

12ਵੀਂ ਤੱਕ ਹੀ ਪੜ੍ਹ ਸਕੀ ਸਪਨਾ

ਸਪਨਾ ਚੌਧਰੀ ਦੀ ਮਾਂ ਨੀਲਮ ਚੌਧਰੀ ਨੇ ਬੀਬੀਸੀ ਨਾਲ ਗੱਲਬਾਤ ਦੌਰਾਨ ਕਿਹਾ ਸੀ, ''ਮੇਰੀ ਕੁੜੀ ਆਪਣੇ ਕੰਮ ਲਈ ਜੀ-ਤੋੜ ਮਿਹਨਤ ਕਰਦੀ ਹੈ, ਦਿਨ ਰਾਤ ਉਸਦੀ ਤਿਆਰੀ ਕਰਦੀ ਹੈ।"

"ਤਿੰਨ ਘੰਟੇ ਦੇ ਸ਼ੋਏ 'ਚ ਘੱਟੋ-ਘੱਟ 4-5 ਗਾਣੇ ਅਤੇ 10-12 ਡਾਂਸ ਕਰਨੇ ਹੁੰਦੇ ਹਨ। 20-22 ਲੋਕਾਂ ਦੀ ਪੂਰੀ ਟੋਲੀ ਹੁੰਦੀ ਹੈ, ਪੈਸਾ ਵੀ ਚੰਗਾ ਹੈ ਪਰ ਕਮੀ ਹੈ ਤਾਂ ਬਸ ਇੱਜ਼ਤ ਦੀ।''

12 ਸਾਲ ਦੀ ਉਮਰ ਵਿੱਚ ਸਪਨਾ ਦੇ ਪਿਤਾ ਦੀ ਬਿਮਾਰੀ ਨਾਲ ਮੌਤ ਹੋ ਗਈ ਸੀ, ਪਰਿਵਾਰ 'ਚ ਉਨ੍ਹਾਂ ਦੇ ਪਿਤਾ ਹੀ ਇਕੱਲੇ ਕਮਾਉਣ ਵਾਲੇ ਸਨ।

ਪਿਤਾ ਦੀ ਮੌਤ ਤੋਂ ਬਾਅਦ ਮਾਂ ਨੇ ਛੋਟੀ ਜਿਹੀ ਨੌਕਰੀ ਕਰਕੇ ਚਾਰ ਲੋਕਾਂ ਦੇ ਪਰਿਵਾਰ ਨੂੰ ਕਿਸੇ ਤਰ੍ਹਾਂ ਪਾਲਿਆ। ਬਣੀਆਂ ਐਕੜਾਂ 'ਚ ਸਪਨਾ ਨੇ 12ਵੀਂ ਤੱਕ ਦੀ ਪੜ੍ਹਾਈ ਪੂਰੀ ਕੀਤੀ।

ਸਪਨਾ ਦੀ ਮਾਂ ਚਾਹੁੰਦੀ ਸੀ ਕਿ ਉਹ ਇਸ ਤੋਂ ਅੱਗੇ ਵੀ ਪੜ੍ਹਾਈ ਕਰੇ ਪਰ ਘਰ ਦੀ ਆਰਥਿਕ ਹਾਲਤ ਨੇ ਇਸਦੀ ਇਜਾਜ਼ਤ ਨਹੀਂ ਦਿੱਤੀ।

ਸਪਨਾ ਨੂੰ ਬਚਪਨ ਤੋਂ ਡਾਂਸ ਦਾ ਸ਼ੌਂਕ ਸੀ ਅਤੇ ਮਾਂ ਨੂੰ ਰਾਗਿਣੀ ਸੁਣਨ ਦਾ, ਬਸ ਇੱਥੋਂ ਹੀ ਦੋਵਾਂ ਦੀ ਜੋੜੀ ਬਣ ਗਈ।

ਇਹ ਵੀ ਪੜ੍ਹੋ:-

ਫੋਟੋ ਕੈਪਸ਼ਨ ਆਪਣੀ ਮਾਂ ਦੇ ਨਾਲ ਸਪਨਾ ਚੌਧਰੀ

ਕਿੰਝ ਬਣੀ ਸਪਨਾ ਡਾਂਸਰ

ਫ਼ਿਲਮੀ ਗਾਣਿਆਂ 'ਤੇ ਨੱਚਣ ਦਾ ਸ਼ੌਂਕ ਕਦੋਂ ਰਾਗਿਣੀ ਗਾਉਣ 'ਚ ਤਬਦੀਲ ਹੋਇਆ ਖ਼ੁਦ ਸਪਨਾ ਨੂੰ ਹੀ ਪਤਾ ਨਹੀਂ ਲੱਗਿਆ। 2011 'ਚ ਪਹਿਲੀ ਵਾਰ ਦਸੰਬਰ ਮਹੀਨੇ 'ਚ ਸਪਨਾ ਨੇ ਪਹਿਲਾ ਸਟੇਜ ਸ਼ੋਅ ਕੀਤਾ।

ਉਨ੍ਹਾਂ ਦੀ ਮਾਂ ਇਸ ਸ਼ੋਅ ਦੇ ਲਈ ਉਨ੍ਹਾਂ ਦੇ ਨਾਲ ਗਈ, ਹਾਲਾਂਕਿ ਉਹ ਨਹੀਂ ਚਾਹੁੰਦੀ ਸੀ ਕਿ ਸਪਨਾ ਇੰਝ ਕਰੇ।

ਪਰ ਆਰਥਿਕ ਹਾਲਤ ਅਤੇ ਸਪਨਾ ਦੀ ਜ਼ਿਦ ਦੇ ਅੱਗੇ ਪਹਿਲੀ ਵਾਰ ਉਨ੍ਹਾਂ ਨੇ ਹਾਰ ਮੰਨ ਲਈ। ਕਮਾਈ ਹੋਈ ਚਾਰ ਹਜ਼ਾਰ ਰੁਪਏ।

ਹਾਲਾਂਕਿ ਪੈਸੇ ਤਾਂ ਬਹੁਤੇ ਨਹੀਂ ਸਨ, ਪਰ ਇੱਕ ਮਹੀਨੇ ਦੇ ਰਾਸ਼ਨ ਦਾ ਖ਼ਰਚਾ ਤਾਂ ਨਿਕਲ ਹੀ ਗਿਆ।

ਉਸ ਤੋਂ ਬਾਅਦ ਸਪਨਾ ਨੇ ਪਿੱਛੇ ਮੁੜ ਕੇ ਨਹੀਂ ਦੇਖਿਆ। 2011 ਤੋਂ 2017 ਤੱਕ ਦੇ ਸਫ਼ਰ 'ਚ ਸਪਨਾ ਦੀ ਕਮਾਈ ਕਈ ਗੁਣਾ ਵੱਧ ਗਈ।

ਇਹ ਬਦਲਾਅ ਰਾਤੋਂ ਰਾਤ ਨਹੀਂ ਆਇਆ। ਸ਼ੁਰੂਆਤੀ ਸਾਲਾਂ ਵਿੱਚ ਸਪਨਾ ਨੂੰ ਡਾਂਸ ਅਤੇ ਗਾਉਣ ਦੇ ਜਿਹੜੇ ਆਫ਼ਰ ਆਉਂਦੇ ਸੀ, ਉਹ ਕਿਸੇ ਦੂਜੀ ਪਾਰਟੀ ਦੇ ਜ਼ਰੀਏ ਆਉਂਦੇ ਸੀ। ਕਹਿਣ ਤੋਂ ਭਾਵ ਉਨ੍ਹਾਂ ਦੇ ਸ਼ੋਅ ਦੀ ਬੁਕਿੰਗ ਕੋਈ ਦੂਜੀ ਕੰਪਨੀ ਕਰਦੀ ਸੀ।

ਪਰ 2015 'ਚ ਸਪਨਾ ਨੇ ਖ਼ੁਦ ਦੀ ਪਾਰਟੀ ਬਣਾਈ ਅਤੇ ਫ਼ਿਰ ਕਮਾਈ ਠੀਕ-ਠੀਕ ਹੋਣ ਲੱਗੀ।

''ਸੌਲਿਡ ਬੌਡੀ'' ਗਾਣੇ ਨੇ ਸਪਨਾ ਚੌਧਰੀ ਨੂੰ ਰਾਤੋਂ-ਰਾਤ ਸਟਾਰ ਬਣਾ ਦਿੱਤਾ।

ਇਹ ਵੀ ਪੜ੍ਹੋ:-

ਇਹ ਵੀਡੀਓਜ਼ ਵੀ ਦੇਖੋ-

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)