WHO ਨੇ ਕਿਹਾ, ਕੋਰੋਨਾਵਾਇਰਸ ਨੂੰ ਧਰਮ ਜਾਂ ਫਿਰਕੇ ਨਾਲ ਨਾ ਜੋੜਿਆ ਜਾਵੇ ਪਰ ਸਰਕਾਰੀ ਬਿਆਨਾਂ 'ਚ ਤਬਲੀਗੀ ਜਮਾਤ ਦਾ ਜ਼ਿਕਰ

  • ਖੁਸ਼ਹਾਲ ਲਾਲੀ
  • ਬੀਬੀਸੀ ਪੱਤਰਕਾਰ
ਦੁਆ ਵਿੱਚ ਇੱਕ ਮੁਸਲਮਾਨ

ਤਸਵੀਰ ਸਰੋਤ, Getty Images

''ਕੋਵਿਡ-19 ਲਈ ਕੋਈ ਵਿਅਕਤੀ ਵਿਸ਼ੇਸ ਜ਼ਿੰਮੇਵਾਰ ਨਹੀਂ ਹੈ। ਹਰ ਕੇਸ ਪੀੜ੍ਹਤ ਹੈ ਅਤੇ ਹਰ ਇੱਕ ਦਾ ਇਲਾਜ ਬਹੁਤ ਹੀ ਸੰਵੇਦਨਸ਼ੀਲਤਾ ਨਾਲ ਹੋਣਾ ਚਾਹੀਦਾ ਹੈ।''

ਵਿਸ਼ਵ ਸਿਹਤ ਸੰਗਠਨ ਦਾ ਇਹ ਬਿਆਨ ਕੋਰੋਨਵਾਇਰਸ ਦੀ ਲਾਗ ਨੂੰ ਇਸ ਦੇ ਪੀੜ੍ਹਤਾਂ ਦੇ ਭਾਈਚਾਰੇ ਨਾਲ ਜੋੜੇ ਜਾਣ ਤੋਂ ਬਾਅਦ ਆਇਆ ਹੈ।

ਕੋਰੋਨਾਵਾਇਰਸ ਨਾਲ ਜੁੜੀਆਂ ਮੰਗਲਵਾਰ 9 ਅਪ੍ਰੈਲ ਦੀਆਂ LIVE ਅਪਡੇਟ ਜਾਣਨ ਲਈਇਹ ਪੜ੍ਹੋ

ਇਸ ਬਿਆਨ ਵਿੱਚ ਬੁਲਾਰੇ ਨੇ ਅੱਗੇ ਕਿਹਾ, ''ਇਹ ਬਹੁਤ ਮਹੱਤਵਪੂਰਨ ਹੈ ਕਿ ਕਿਸੇ ਵੀ ਮਰੀਜ਼ ਦੀ ਨਸਲ ਜਾਂ ਧਰਮ ਨੂੰ ਕੋਵਿਡ -19 ਨਾਲ ਨਾ ਜੋੜਿਆ ਜਾਵੇ''

ਵਿਸ਼ਵ ਸਿਹਤ ਸੰਗਠਨ ਦੇ ਇਸ ਬਿਆਨ ਦੇ ਉਲਟ ਭਾਰਤ ਵਿਚ ਕੇਂਦਰ, ਪੰਜਾਬ, ਹਰਿਆਣਾ ਸਣੇ ਵੱਖ-ਵੱਖ ਸੂਬਿਆਂ ਦੇ ਸਰਕਾਰੀ ਅਫ਼ਸਰ, ਮੰਤਰੀ ਅਤੇ ਮੁੱਖ ਮੰਤਰੀ ਤੱਕ ਮਰੀਜ਼ਾਂ ਦੀ ਗਿਣਤੀ ਧਰਮ ਨਾਲ ਦੱਸ ਕਰ ਰਹੇ ਹਨ।

ਤਸਵੀਰ ਸਰੋਤ, ASHWANI SHARMA/BBC

ਭਾਰਤ ਦਾ ਰੁਝਾਨ ਉਲਟ

ਭਾਰਤ ਵਿੱਚ ਕੇਂਦਰੀ ਸਿਹਤ ਮੰਤਰਾਲੇ ਦੇ ਸਯੁੰਕਤ ਸਕੱਤਰ ਲਵ ਅਗਰਵਾਲ ਆਪਣੀਆਂ ਪ੍ਰੈਸ ਕਾਨਫਰੰਸਾਂ ਵਿੱਚ ਇੱਕ ਖ਼ਾਸ ਭਾਈਚਾਰੇ ਨਾਲ ਸਬੰਧਤ ਲੋਕਾਂ ਦਾ ਜ਼ਿਕਰ ਕਰ ਰਹੇ ਹਨ।

ਇੱਕ ਵੀਡੀਓ ਵਿੱਚ ਉਹ ਕੇਂਦਰ ਸਰਕਾਰ ਵਲੋਂ ਸੂਬਿਆਂ ਦੇ ਪੁਲਿਸ ਮੁਖੀਆਂ ਨੂੰ ਉਸ ਖਾਸ ਭਾਈਚਾਰੇ ਦੇ ਲੋਕਾਂ ਨੂੰ ਲੱਭਣ ਦੀ ਗੱਲ ਕਰਦੇ ਦਿੱਖ ਰਹੇ ਹਨ।

ਇੱਕ ਥਾਂ ਉਹ ਇਹ ਕਹਿੰਦੇ ਦਿਖ ਰਹੇ ਹਨ ਕਿ ਜੇਕਰ ਤਬਲੀਗੀ ਜਮਾਤ ਦੀ ਘਟਨਾ ਨਾ ਹੁੰਦੀ ਤਾਂ ਕੇਸ ਡਬਲ ਹੋਣ ਦੀ ਦਰ 4.1 ਦਾ ਥਾਂ 7 ਦਿਨ ਹੁੰਦੀ।

ਕੇਂਦਰੀ ਸਿਹਤ ਮੰਤਰਾਲੇ ਤੇ ਪੰਜਾਬ ਅਤੇ ਹਰਿਆਣਾ ਦੀਆਂ ਸਾਰੀਆਂ ਪ੍ਰੈਸ ਕਾਨਫਰੰਸਾਂ ਵਿੱਚ ਤਬਲੀਗੀ ਜਮਾਤ ਵਿੱਚ ਸ਼ਾਮਲ ਹੋਏ ਲੋਕਾਂ ਅਤੇ ਉਨ੍ਹਾਂ ਦੇ ਸੰਪਰਕ ਵਿੱਚ ਆਉਣ ਵਾਲੇ ਲੋਕਾਂ ਦਾ ਵੱਖਰੇ ਤੌਰ ਉੱਤੇ ਜ਼ਿਕਰ ਕੀਤਾ ਜਾਂਦਾ ਹੈ।

ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟਰ ਨੇ ਵੀ ਸੂਬੇ ਦੇ ਨਾਂ ਆਪਣੇ ਸੰਦੇਸ਼ ਦੌਰਾਨ ਖੁੱਲ੍ਹ ਕੇ ਤਬਲੀਗੀ ਜਮਾਤ ਦੇ ਨਾਂ ਦੀ ਵਰਤੋਂ ਕੀਤੀ।

ਇਸੇ ਤਰ੍ਹਾਂ ਹਰਿਆਣਾ ਦੇ ਗ੍ਰਹਿ ਤੇ ਸਿਹਤ ਮੰਤਰੀ ਅਨਿਲ ਵਿਜ ਵੀ ਤਬਲੀਗੀ ਮਰਕਜ਼ ਵਿੱਚ ਸ਼ਾਮਲ ਹੋ ਕੇ ਆਏ ਲੋਕਾਂ ਨੂੰ ਪੁਲਿਸ ਜਾਂ ਸਿਹਤ ਮੰਤਰਾਲੇ ਕੋਲ ਪੇਸ਼ ਹੋਣ ਲਈ ਕਹਿ ਚੁੱਕੇ ਹਨ।

ਪੰਜਾਬ ਸਰਕਾਰ ਵਲੋਂ ਬਕਾਇਦਾ ਪ੍ਰੈਸ ਨੋਟ ਜਾਰੀ ਕਰਕੇ ਤਬਲੀਗੀ ਮਰਕਜ਼ ਵਿੱਚ ਸ਼ਾਮਲ ਹੋਕੇ ਆਏ ਲੋਕਾਂ ਨੂੰ ਪੁਲਿਸ ਥਾਣੇ ਵਿੱਚ 24 ਘੰਟਿਆਂ ਦੇ ਅੰਦਰ ਰਿਪੋਰਟ ਕਰਨ ਲਈ ਕਿਹਾ ਗਿਆ ਹੈ।

ਪੰਜਾਬ ਸਰਕਾਰ ਦੇ ਹਰ ਮੀਡੀਆ ਬੁਲਿਟਨ ਵਿੱਚ ਤਬਲੀਗੀ ਜਮਾਤ ਨਾਲ ਸਬੰਧਤ ਲੋਕਾਂ ਦੇ ਨਾਂ ਅਲੱਗ ਤੋਂ ਲਿਖੇ ਜਾ ਰਹੇ ਹਨ।

ਗ੍ਰਹਿ ਮੰਤਰਾਲੇ ਦੀ ਤਰਜ਼ਮਾਨ ਪੁਨਿਆ ਸ੍ਰੀਨਿਵਾਸ ਨੇ ਬੁੱਧਵਾਰ 8 ਅਪ੍ਰੈਲ ਨੂੰ ਆਪਣੇ ਮੀਡੀਆ ਬਿਆਨ ਵਿੱਚ ਕਿਹਾ, ''25,500 ਤੋਂ ਵੱਧ ਤਬਲੀਗੀ ਜਮਾਤ ਦੇ ਲੋਕ ਕੁਆਰੰਟੀਨ ਕੀਤੇ ਜਾ ਚੁੱਕੇ ਹਨ।''

ਸ੍ਰੀਨਿਵਾਸ ਮੁਤਾਬਕ ਹਰਿਆਣਾ ਵਿੱਚ ਵੀ 5 ਪਿੰਡਾਂ ਵਿੱਚ ਜਿੱਥੇ ਵਿਦੇਸ਼ੀ ਤਬਲੀਗੀ ਜਮਾਤ ਦੇ ਲੋਕ ਰੁਕੇ ਸਨ, ਉਨ੍ਹਾਂ ਨੂੰ ਸੀਲ ਕਰਕੇ ਕੁਆਰੰਟਾਈਨ ਕਰ ਦਿੱਤਾ ਗਿਆ ਸੀ।

ਮੀਡੀਆ ਤੇ ਸ਼ੋਸਲ ਮੀਡੀਆ 'ਤੇ ਅਸਰ

ਸਰਕਾਰ ਵਲੋਂ ਕੋਰੋਨਾਵਾਇਰਸ ਦੇ ਪੀੜ੍ਹਤਾਂ ਦੀ ਧਰਮ ਜਾਂ ਫਿਰਕੇ ਆਧਾਰਿਤ ਪ੍ਰੋਫਾਇਲਿੰਗ ਦਾ ਅਸਰ ਮੀਡੀਆ ਅਤੇ ਸੋਸ਼ਲ ਮੀਡੀਆ ਉੱਤੇ ਵੀ ਦਿਖਾਈ ਦਿੱਤਾ।

ਟਾਇਮਜ਼ ਮੈਗਜ਼ੀਨ ਦੀ ਇੱਕ ਰਿਪੋਰਟ ਮੁਤਾਬਕ #CornaJihad ਅਤੇ #TablighiJamatVirus ਵਰਗੇ ਹੈਸ਼ਟੈਗ ਟਵਿੱਟਰ ਉੱਤੇ ਟਰੈਂਡ ਕਰਵਾਏ ਗਏ। ਅਜਿਹੇ ਹੈਸ਼ਟੈਗ ਨਾਲ ਕਈ ਫੇਕ ਵੀਡੀਓ ਸ਼ੇਅਰ ਕੀਤੀਆਂ ਗਈਆਂ।

ਟਾਇਮਜ਼ ਮੈਗਜ਼ੀਨ ਨੇ ਇੱਕ ਡਿਜੀਟਲ ਲੈਬ ਦੇ ਸਰਵੇ ਦੇ ਆਧਾਰ ਉੱਤੇ ਲਿਖਿਆ ਹੈ ਕਿ #CornaJihad ਨੂੰ ਕਰੀਬ 3 ਲੱਖ ਵਾਰ ਦੇਖਿਆ ਗਿਆ ਅਤੇ ਇਸ ਨੂੰ 1 ਕਰੋੜ 65 ਲੱਖ ਲੋਕਾਂ ਤੱਕ ਪਹੁੰਚਾਇਆ ਗਿਆ।

ਟਾਇਮਜ਼ ਮੈਗਜ਼ੀਨ ਦੇ ਦਾਅਵੇ ਮੁਤਾਬਕ ਇਸ ਹੈਸ਼ਟੈਗ ਨਾਲ ਇੱਕ ਵੀਡੀਓ ਫੈਲਾਈ ਗਈ, ਜਿਸ ਵਿੱਚ ਇੱਕ ਵਿਅਕਤੀ ਦੂਜੇ ਉੱਤੇ ਥੁੱਕ ਰਿਹਾ ਹੈ। ਇਹ ਵੀਡੀਓ ਅਸਲ ਵਿੱਚ ਭਾਰਤ ਦੀ ਨਹੀਂ ਬਲਕਿ ਥਾਈਲੈਂਡ ਦੀ ਹੈ।

ਇਸੇ ਤਰ੍ਹਾਂ ਬੀਬੀਸੀ ਵਲੋਂ ਵੀ ਅਜਿਹੀ ਹੀ ਵੀਡੀਓ ਦੀ ਜਾਂਚ ਕੀਤੀ ਗਏ, ਜਿਸ ਵਿੱਚ ਇੱਕ ਵਿਅਕਤੀ ਪੁਲਿਸ ਵਾਲੇ ਉੱਤੇ ਥੁੱਕ ਰਿਹਾ ਹੈ, ਜਿਸ ਨੂੰ ਕੋਰੋਨਾ ਮਰੀਜ਼ ਦੀ ਤਾਜ਼ਾ ਵੀਡੀਓ ਵਜੋਂ ਪੇਸ਼ ਕੀਤਾ ਜਾ ਰਿਹਾ ਸੀ। ਪਰ ਇਹ ਵੀਡੀਓ ਜਨਵਰੀ ਮਹੀਨੇ ਦੀ ਮਹਾਰਾਸ਼ਟਰ ਸੂਬੇ ਦੀ ਸੀ।

ਮੀਡੀਆ ਚੈਨਲਾਂ ਉੱਤੇ ਇੱਕ ਖ਼ਾਸ ਭਾਈਚਾਰੇ ਦੇ ਨਾਂ ਉੱਤੇ ਚੱਲ ਰਹੇ ਪ੍ਰਚਾਰ ਕਾਰਨ ਤਿੰਨ ਟੀਵੀ ਚੈਨਲਾਂ ਖ਼ਿਲਾਫ਼ ਮਹਾਰਾਸ਼ਟਰ ਵਿੱਚ ਇੱਕ ਵਿਅਕਤੀ ਵਲੋਂ ਐਫ਼ਆਈਆਰ ਦਰਜ ਕਰਵਾਈ ਗਈ।

ਇਸੇ ਤਰ੍ਹਾਂ ਕਈ ਹੋਰ ਵੀਡੀਓਜ਼ ਇੱਕ ਖਾਸ ਭਾਈਚਾਰੇ ਪ੍ਰਤੀ ਨਫ਼ਰਤ ਫ਼ੈਲਾਉਣ ਲਈ ਵਰਤੀਆਂ ਜਾ ਰਹੀਆਂ ਹਨ।

ਲੁਧਿਆਣਾ ਜਾਮਾ ਮਸਜਿਦ ਨੇ ਸ਼ਾਹੀ ਇਮਾਮ ਨੇ ਮੀਡੀਆ ਨੂੰ ਜਾਰੀ ਇੱਕ ਬਿਆਨ ਵਿੱਚ ਸੋਸ਼ਲ ਮੀਡੀਆ ਉੱਤੇ ਨਫ਼ਤਰ ਫ਼ੈਲਾਉਣ ਵਾਲਿਆਂ ਦੀ ਨਿਖੇਧੀ ਕੀਤੀ।

ਉਨ੍ਹਾਂ ਕੋਰੋਨਾਵਾਇਰਸ ਦੇ ਰੋਗੀਆਂ ਨਾਲ ਸੰਦੇਵਨਸ਼ੀਲਤਾ ਭਰਿਆ ਰਵੱਈਆ ਅਪਣਾਉਣ ਦੀ ਅਪੀਲ ਕੀਤੀ।

ਆਮ ਲੋਕਾਂ 'ਚ ਭਰ ਰਹੀ ਨਫ਼ਰਤ

ਸਰਕਾਰਾਂ, ਮੀਡੀਆ ਤੇ ਸੋਸ਼ਲ ਮੀਡੀਆ ਉੱਤੇ ਕੋਰੋਨਾਵਾਇਰਸ ਨਾਲ ਇੱਕ ਖ਼ਾਸ ਪਛਾਣ ਜੋੜੇ ਜਾਣ ਤੋਂ ਬਾਅਦ ਕਈ ਥਾਈ ਆਮ ਲੋਕਾਂ ਵਿੱਚ ਭਰਮ ਭੁਲੇਖੇ ਪੈਦਾ ਹੋਣ ਲੱਗੇ ਹਨ। ਪੰਜਾਬ ਦੇ ਹੁਸ਼ਿਆਰਪੁਰ ਜ਼ਿਲ੍ਹੇ ਵਿੱਚੋਂ ਗੁੱਜਰ ਭਾਈਚਾਰੇ ਖ਼ਿਲਾਫ਼ ਮਾੜੀਆਂ ਖ਼ਬਰਾਂ ਆਈਆ ਹਨ ।

ਜ਼ਿਲ੍ਹੇ ਦੇ ਪੁਲਿਸ ਥਾਣਾ ਹਾਜ਼ੀ ਪੁਰ ਅਤੇ ਤਲਵਾੜਾ ਵਿੱਚ ਕੁਝ ਲੋਕਾਂ ਨੇ ਗੁੱਜਰ ਭਾਈਚਾਰੇ ਦੇ ਦੋਧੀਆਂ ਨੂੰ ਪਿੰਡਾਂ ਕਸਬਿਆਂ ਵਿੱਚ ਵੜਨੋਂ ਰੋਕ ਦਿੱਤਾ।

ਕੁਝ ਵੀਡੀਓਜ਼ ਵਿੱਚ ਇਨ੍ਹਾਂ ਨੂੰ ਪਸ਼ੂ ਲਿਜਾਉਣ ਤੋਂ ਰੋਕਦੇ ਲੋਕ ਦਿਖ ਰਹੇ ਹਨ।

ਤਸਵੀਰ ਸਰੋਤ, Getty Images

ਤਸਵੀਰ ਕੈਪਸ਼ਨ,

ਸੰਗਠਨ ਦੇ ਡਾਇਰੈਕਟਰ ਜਨਰਲ ਟੈਡਰੋਸ ਐਡਹਾਨੋਮ ਗਿਬਰਿਏਸੋਸ ਨੇ ਕਿਹਾ ਕਿ ਜੇ ਤੁਹਾਨੂੰ ਹੋਰ ਲਾਸ਼ਾਂ ਚਾਹੀਦੀਆਂ ਹਨ ਤਾਂ ਸਿਆਸਤ ਖੇਡ ਲਓ

ਮੁਕੇਰੀਆਂ ਦੇ ਸਥਾਨਕ ਪੱਤਰਕਾਰ ਜਗਜੀਤ ਸਿੰਘ ਨੇ ਬੀਬੀਸੀ ਨੂੰ ਦੱਸਿਆ ਕਿ ਗੁਰਦਾਸਪੁਰ ਜ਼ਿਲ੍ਹੇ ਦੇ ਡੀਸੀ ਨੇ ਇੱਕ ਬਿਆਨ ਦਿੱਤਾ ਸੀ ਕਿ ਗੁੱਜਰਾਂ ਤੋਂ ਦੁੱਧ ਨਾ ਖਰੀਦਿਆ ਜਾਵੇ, ਕਿਉਂ ਕਿ ਉਨ੍ਹਾਂ ਦੇ ਹੱਥ ਸੈਨੇਟਾਇਜ਼ ਨਹੀਂ ਕੀਤੇ ਹੁੰਦੇ।

ਜਗਜੀਤ ਨੇ ਦੱਸਿਆ ਕਿ ਇਸ ਤੋਂ ਬਾਅਦ ਕੁਝ ਲੋਕਾਂ ਨੇ ਸੋਸ਼ਲ ਮੀਡੀਆ ਉੱਤੇ ਅਫ਼ਵਾਹ ਫੈਲਾ ਦਿੱਤੀ ਕਿ ਮੁਸਲਮਾਨ ਦੁੱਧ ਵਿੱਚ ਥੁੱਕ ਪਾਕੇ ਦਿੰਦੇ ਹਨ, ਇਹ ਅਜਿਹਾ ਕੋਰੋਨਾਵਾਇਰਸ ਫੈਲਾਉਣ ਲਈ ਕਰ ਰਹੇ ਹਨ।

ਇਸ ਲਈ ਜਦੋਂ ਸਥਾਨਕ ਮੁਸਲਿਮ ਗੁੱਜਰ ਦੋਧੀ ਫਰਮਾਨ ਅਲੀ ਦੁੱਧ ਪਾਉਣ ਜਾ ਰਿਹਾ ਸੀ ਤਾਂ ਸੋਸ਼ਲ ਮੀਡੀਆ ਦੇ ਪ੍ਰਭਾਵ ਹੇਠ ਲੋਕਾਂ ਨੇ ਇਕੱਠੇ ਹੋਕੇ ਇਸ ਨੂੰ ਘੇਰ ਲਿਆ।

ਇਸੇ ਤਰ੍ਹਾਂ ਦੀ ਘਟਨਾ ਲੱਭਰ ਪੁਹਾਰੀ ਵਿਚ ਵਾਪਰੀ, ਇੱਥੇ ਵੀ ਗੁੱਜਰਾਂ ਬਾਰੇ ਕਿਹਾ ਗਿਆ ਕਿ ਇਹ ਦਿੱਲੀ ਦੀ ਤਬਲੀਗੀ ਮਰਕਜ਼ ਤੋਂ ਆਏ ਹਨ।

ਪਰ ਤਲਵਾੜਾ ਪੁਲਿਸ ਅਤੇ ਸਿਹਤ ਵਿਭਾਗ ਦੀ ਐਨ ਮੌਕੇ ਸਿਰ ਦਖ਼ਲ ਕਾਰਨ ਤਣਾਅ ਘਟ ਗਿਆ। ਪਰ ਲੋਕ ਇਨ੍ਹਾਂ ਤੋਂ ਦੁੱਧ ਘੱਟ ਹੀ ਖ਼ਰੀਦ ਰਹੇ ਹਨ।

ਵਿਸ਼ਵ ਸਿਹਤ ਸੰਗਠਨ ਨੇ ਹੋਰ ਕੀ ਕਿਹਾ

ਵਿਸ਼ਵ ਸਿਹਤ ਸੰਗਠਨ ਨੇ ਕਿਹਾ ਹੈ ਕਿ ਕਿਸੇ ਵੀ ਤਰ੍ਹਾਂ ਦੇ ਇਕੱਠਾਂ ਭਾਵੇਂ ਉਹ ਧਾਰਮਿਕ ਹੋਣ ਜਾਂ ਫਿਰ ਕਿਸੇ ਹੋਰ ਮਕਸਦ ਨਾਲ ਕੀਤੇ ਗਏ, ਵੱਡੇ ਇਕੱਠੇ ਵਿੱਚ ਹਰ ਵੇਲੇ ਜ਼ੋਖ਼ਮ ਰਹਿੰਦਾ ਹੈ, ਇਹ ਮਹਾਮਾਰੀ ਨੂੰ ਫ਼ੈਲਾਉਦੇ ਹਨ।

ਹੁਣ ਇਸ ਤਰ੍ਹਾਂ ਦੇ ਧਾਰਮਿਕ ਇਕੱਠ ਅਤੇ ਸਮਾਗਮਾਂ ਨੂੰ ਮੁਲਤਵੀ ਕਰ ਦਿੱਤਾ ਗਿਆ।

ਵਿਸ਼ਵ ਸਿਹਤ ਸੰਗਠਨ ਦੇ ਬੁਲਾਰੇ ਨੇ ਅੱਗੇ ਕਿਹਾ ਕਿ ਸੰਸਾਰ ਦੇ ਬਹੁਤ ਸਾਰੇ ਧਾਰਮਿਕ ਸੰਗਠਨਾਂ, ਜਿੱਸ ਵਿਚ ਮੁਸਲਮਾਨ ਵੀ ਸ਼ਾਮਲ ਹਨ ਉਨ੍ਹਾਂ ਨਾਲ ਮਿਲਕੇ ਕੰਮ ਕਰ ਰਿਹਾ ਹੈ।

ਆਉਣ ਵਾਲੇ ਪਵਿੱਤਰ ਰਮਜ਼ਾਨ ਮਹੀਨੇ ਲਈ ਨਿਯਮ ਤੈਅ ਕਰਨ ਸਰਕਾਰਾਂ ਤੇ ਧਾਰਮਿਕ ਸੰਗਠਨਾਂ ਦੀ ਰਾਏ ਨਾਲ ਇਸ ਸੰਕਟ ਨੂੰ ਨਜਿੱਠਣ ਲਈ ਕੰਮ ਕੀਤਾ ਜਾ ਰਿਹਾ ਹੈ।

ਵਿਸ਼ਵ ਸਿਹਤ ਸੰਗਠਨ ਨੇ ਦੁਨੀਆਂ ਵਿੱਚ ਕਈ ਥਾਵਾਂ ਉੱਤੇ ਡਾਕਟਰਾਂ ਅਤੇ ਦੂਜੇ ਸਿਹਤ ਕਾਮਿਆਂ ਖ਼ਿਲਾਫ਼ ਹੋਈਆਂ ਹਿੰਸਕ ਘਟਨਾਵਾਂ ਨੂੰ ਨਾ-ਸਹਿਣਯੋਗ ਕਰਾਰ ਦਿੱਤਾ ਹੈ।

ਵਿਸ਼ਵ ਸਿਹਤ ਸੰਗਠਨ ਨੇ ਸਿਹਤ ਕਾਮਿਆਂ ਨੂੰ ਹੀਰੋ ਦੱਸ ਕੇ ਉਨ੍ਹਾਂ ਨੂੰ ਬਣਦਾ ਦੇਣ ਦੇਣ ਦੀ ਅਪੀਲ ਕੀਤੀ ਹੈ।

ਇਹ ਵੀ ਵੇਖੋ:

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)