ਲੰਡਨ ਰੇਲ ਧਮਾਕੇ 'ਚ ਪੁਲਿਸ ਨੇ ਕੀਤਾ ਗ੍ਰਿਫ਼ਤਾਰੀ ਦਾ ਦਾਅਵਾ

LONDON BLAST

ਤਸਵੀਰ ਸਰੋਤ, DANIEL LEAL-OLIVAS

ਲੰਡਲ ਰੇਲ ਧਮਾਕੇ ਦੇ ਮਾਮਲੇ 'ਚ ਪੁਲਿਸ ਨੇ 18 ਸਾਲ ਦੇ ਇੱਕ ਸ਼ੱਕੀ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕਰਨ ਦਾ ਦਾਅਵਾ ਕੀਤਾ ਹੈ। ਸ਼ੱਕੀ ਨੂੰ ਕੇਂਟ ਪੁਲਿਸ ਨੇ ਡੋਵਰ ਇਲਾਕੇ 'ਚੋਂ ਕਾਬੂ ਕੀਤਾ ਹੈ।

ਮਹਾਂਨਗਰ ਪੁਲਿਸ ਦੇ ਡਿਪਟੀ ਸਹਾਇਕ ਕਮਿਸ਼ਨਰ ਨੀਲ ਬਾਸੂ ਨੇ ਦੱਸਿਆ, 'ਇਹ ਗ੍ਰਿਫ਼ਤਾਰੀ ਕਾਫੀ ਅਹਿਮ ਹੈ, ਪਰ ਦਹਿਸ਼ਗਰਦੀ ਦਾ ਖ਼ਤਰਾ 'ਗੰਭੀਰ' ਬਣਿਆ ਹੋਇਆ ਹੈ।'

ਸ਼ੁੱਕਰਵਾਰ ਲੰਡਲ ਦੇ ਪਾਰਸਨਸ ਗਰੀਨ ਰੇਲਵੇ ਸਟੇਸ਼ਨ 'ਤੇ ਟਰੇਨ ਅੰਦਰ ਹੋਏ ਧਮਾਕੇ 'ਚ 30 ਲੋਕ ਜ਼ਖਮੀ ਹੋਏ ਸੀ।

ਤਸਵੀਰ ਸਰੋਤ, Getty Images

ਤਸਵੀਰ ਕੈਪਸ਼ਨ,

ਪੁਲਿਸ ਅਫਸਰ ਇੱਕ ਜ਼ਖਮੀ ਮਹਿਲਾ ਦੇ ਨਾਲ

ਲੰਡਨ ਦੀ ਅੰਡਰ-ਗਰਾਊਂਡ ਰੇਲ 'ਚ ਸ਼ੁੱਕਰਵਾਰ ਸਵੇਰੇ ਧਮਾਕਾ ਹੋਇਆ ਸੀ। ਲੰਡਨ ਪੁਲਿਸ ਇਸ ਨੂੰ ਦਹਿਸ਼ਤਗਰਦੀ ਘਟਨਾ ਮੰਨ ਕੇ ਜਾਂਚ ਕਰ ਰਹੀ ਹੈ।

ਤਸਵੀਰ ਸਰੋਤ, CHRISTOPHER ANDREW LLOYD

ਘਟਨਾ ਸਥਾਨ ਦੀਆਂ ਤਸਵੀਰਾਂ ਦਿਖਾਉਂਦੀਆਂ ਹਨ ਕਿ ਇੱਕ ਸੁਪਰ-ਮਾਰਕੀਟ ਦੇ ਬੈਗ ਅੰਦਰ ਰੱਖੀ ਬਾਲਟੀ 'ਚ ਅੱਗ ਲੱਗੀ ਹੋਈ ਸੀ। ਭਾਵੇਂ ਕਿ ਪੁਲਿਸ ਨੇ ਇਹ ਨਹੀਂ ਦੱਸਿਆ ਕਿ ਅੱਗ ਕਿਵੇਂ ਲੱਗੀ, ਪਰ ਬਾਲਟੀ ਵਿੱਚੋਂ ਤਾਰਾਂ ਨਿਕਲਦੀਆਂ ਦਿਖਾਈ ਦੇ ਰਹੀਆਂ ਸਨ।

ਤਸਵੀਰ ਸਰੋਤ, DANIEL LEAL-OLIVAS

ਹੁਣ ਤੱਕ ਕੀ-ਕੀ ਹੋਇਆ ? ਧਮਾਕੇ ਨਾਲ ਜੁੜੀਆਂ 7 ਗੱਲਾਂ

1.ਬ੍ਰਿਟਿਸ਼ ਸਮੇ ਮੁਤਾਬਕ ਧਮਾਕਾ ਸ਼ੁੱਕਰਵਾਰ ਸਵੇਰੇ 8:20 ਵਜੇ ਹੋਇਆ।

2.ਦੱਖਣੀ-ਪੱਛਮੀ ਲੰਡਨ ਦੇ ਇਲਾਕੇ ਵਿੰਬਲਡਨ ਤੋਂ ਪੂਰਬ ਵੱਲ ਜਾ ਰਹੀ ਟਰੇਨ ਵਿੱਚ ਘਟਨਾਹੋਈ।

3.ਪੁਲਿਸ ਘਟਨਾ ਦੀ ਜਾਂਚ ਦਹਿਸ਼ਤਗਰਦੀ ਕਾਰਵਾਈ ਦੇ ਤੌਰ 'ਤੇ ਕਰ ਰਹੀ ਹੈ।

4.ਬਰਤਾਨਵੀ ਪ੍ਰਧਾਨਮੰਤਰੀ ਟੇਰੀਜ਼ਾ ਮੇਅ ਨੇ ਧਮਾਕੇ ਦੀ ਨਿੰਦਾ ਕੀਤੀ ਹੈ।

5.ਮੁੱਢਲੀ ਜਾਂਚ ਮੁਤਾਬਕ ਧਮਾਕਾਖੇਜ਼ ਸਮੱਗਰੀ ਬਾਲਟੀ 'ਚ ਰੱਖੀ ਗਈ ਸੀ।

6.ਪੁਲਿਸ ਇਸ ਨੂੰ ਅਤਿ-ਆਧੁਨਿਕ ਧਮਾਕਾਖੇਜ਼ ਸਮੱਗਰੀ ਦੱਸ ਰਹੀ ਹੈ।

7.ਸਾਲ 2017 ਦੀ ਦਹਿਸ਼ਤਗਰਦੀ ਨਾਲ ਜੁੜੀ ਇਹ ਪੰਜਵੀਂ ਘਟਨਾ ਹੈ ।

ਤਸਵੀਰ ਸਰੋਤ, AFP

ਇੱਕ ਚਸ਼ਮਦੀਦਾਂ ਪੀਟਰ ਕਰੋਲੀ ਨੇ ਦੱਸਿਆ, 'ਮੈਂ ਵਿੰਬਲਡਨ ਸਟੇਸ਼ਨ ਤੋਂ ਰੇਲ 'ਚ ਬੈਠਿਆ ਹੀ ਸੀ ਕਿ ਧਮਾਕਾ ਹੋ ਗਿਆ, ਮੇਰੇ ਸਿਰ ਨਾਲ ਇੱਕ ਅੱਗ ਦੇ ਗੋਲੇ ਵਰਗੀ ਚੀਜ਼ ਮਹਿਸੂਸ ਹੋਈ, ਹੋਰ ਲੋਕਾਂ ਦੀ ਹਾਲਤ ਮੇਰੇ ਤੋਂ ਵੀ ਜ਼ਿਆਦਾ ਬੁਰੀ ਸੀ।'

ਇੱਕ ਹੋਰ ਚਸ਼ਮਦੀਦ ਕ੍ਰਿਸ਼ ਵਿਲਡਿਸ਼ ਨੇ ਦੱਸਿਆ ਕਿ ਉਸ ਨੇ ਇੱਕ ਬਾਲਟੀ ਵਿੱਚੋਂ ਅੱਗ ਦੀਆਂ ਲਪਟਾਂ ਨਿਕਲਦੀਆਂ ਦੇਖੀਆਂ। ਇਹ ਰੇਲ ਦੇ ਦਰਵਾਜ਼ੇ ਨੇੜੇ ਫਰਸ਼ 'ਤੇ ਪਈ ਸੀ।