ਕੈਟੇਲੋਨੀਆ ਦੀ ਅਜ਼ਾਦੀ ਕੁਝ ਹੀ ਦਿਨਾਂ ਵਿੱਚ: ਕਾਰਲਸ ਪੁਆਇਦੇਮੋਂਟ
Image copyright
AFP/GETTY IMAGES
ਕੈਟੇਲੋਨੀਆ ਸਪੇਨ ਤੋਂ ਅਜ਼ਾਦੀ ਦਾ ਐਲਾਨ ਕੁਝ ਹੀ ਦਿਨਾਂ ਵਿੱਚ ਕਰੇਗਾ। ਅਜ਼ਾਦ ਖੇਤਰ ਦੇ ਆਗੂ ਕਾਰਲਸ ਪੁਆਇਦੇਮੋਂਟ ਨੇ ਬੀਬੀਸੀ ਨਾਲ ਗੱਲਬਾਤ ਦੌਰਾਨ ਇਹ ਦਾਅਵਾ ਕੀਤਾ।
ਐਤਵਾਰ ਦੀ ਰਾਏਸ਼ੁਮਾਰੀ ਤੋਂ ਬਾਅਦ ਪਹਿਲੇ ਇੰਟਰਵਿਊ ਵਿੱਚ ਕਾਰਲਸ ਪੁਆਇਦੇਮੋਂਟ ਨੇ ਕਿਹਾ "ਉਨ੍ਹਾਂ ਦੀ ਸਰਕਾਰ ਇਸ ਹਫ਼ਤੇ ਅਖੀਰ ਜਾਂ ਅਗਲੇ ਹਫ਼ਤੇ ਦੀ ਸ਼ੁਰੂਆਤ ਵਿੱਚ ਕਾਰਵਾਈ ਕਰੇਗੀ।"
ਇਸ ਵਿਚਾਲੇ ਸਪੇਨ ਦੇ ਰਾਜਾ ਫੈਲੀਪੇ VI ਨੇ ਕਿਹਾ ਕਿ ਵੋਟਿੰਗ ਦੇ ਪ੍ਰਬੰਧਕਾਂ ਨੇ ਕਨੂੰਨ ਨੂੰ ਛਿੱਕੇ ਟੰਗਿਆ।
ਕੈਟੇਲੋਨੀਆ ਰਾਏਸ਼ੁਮਾਰੀ: '300 ਤੋਂ ਵੱਧ ਲੋਕ ਜਖ਼ਮੀ'
ਉਨ੍ਹਾਂ ਨੇ ਕਿਹਾ ਕਿ ਸਪੇਨ ਵਿੱਚ ਹਲਾਤ ਬੇਹੱਦ ਮਾੜੇ ਸਨ।
ਹਿੰਸਾ ਤੇ ਮੁਜ਼ਾਹਰੇ
ਵੋਟਿੰਗ ਦੌਰਾਨ ਸਪੇਨ ਪੁਲਿਸ ਵੱਲੋਂ ਕੀਤੀ ਕਾਰਵਾਈ ਵਿੱਚ ਤਕਰੀਬਨ 900 ਲੋਕ ਜ਼ਖਮੀ ਹੋਏ ਸਨ। ਜਿਸ ਦੇ ਵਿਰੋਧ ਵਿੱਚ ਸੈਂਕੜੇ ਲੋਕ ਮੁਜ਼ਾਹਰੇ ਕਰ ਰਹੇ ਹਨ।
ਸਥਾਨਕ ਮੈਡੀਕਲ ਅਫ਼ਸਰਾਂ ਮੁਤਾਬਕ ਵੋਟਿੰਗ ਦੌਰਾਨ 33 ਪੁਲਿਸ ਅਧਿਕਾਰੀ ਵੀ ਜ਼ਖਮੀ ਹੋ ਗਏ ਸਨ।
ਜਦੋਂ ਕਾਰਲਸ ਪੁਆਇਦੇਮੋਂਟ ਤੋਂ ਪੁੱਛਿਆ ਗਿਆ ਕਿ ਜੇ ਸਪੇਨ ਦੀ ਸਰਕਾਰ ਦਖ਼ਲ ਦੇਵੇ ਅਤੇ ਕੈਟਲੋਨੀਆ ਆਪਣੇ ਅਧੀਨ ਕਰ ਲਏ ਫਿਰ ਉਹ ਕੀ ਕਰਨਗੇ?
ਜਵਾਬ ਵਿੱਚ ਕਾਰਲਸ ਪੁਆਇਦੇਮੋਂਟ ਨੇ ਕਿਹਾ, "ਇਹ ਮਹਿਜ਼ ਇੱਕ ਗਲਤੀ ਹੋਏਗਾ ਜੋ ਸਭ ਕੁਝ ਬਦਲ ਕੇ ਰੱਖ ਦੇਵੇਗਾ।"
ਕਾਰਲਸ ਪੁਆਇਦੇਮੋਂਟ ਨੇ ਕਿਹਾ ਕਿ ਮੈਡਰਿਡ ਦੀ ਕੇਂਦਰ ਸਰਕਾਰ ਅਤੇ ਉਨ੍ਹਾਂ ਵਿਚਾਲੇ ਕੋਈ ਸੰਪਰਕ ਨਹੀਂ ਹੈ।
ਉਨ੍ਹਾਂ ਯੂਰੋਪੀਅਨ ਕਮਿਸ਼ਨ ਦੇ ਉਸ ਬਿਆਨ 'ਤੇ ਅਸਹਿਮਤੀ ਪ੍ਰਗਟਾਈ ਜਿਸ ਵਿੱਚ ਕਿਹਾ ਗਿਆ ਕਿ ਕੈਟਲੋਨੀਆ ਦੇ ਹਲਾਤ ਸਪੇਨ ਦਾ ਅੰਦਰੂਨੀ ਮਾਮਲਾ ਹੈ।
ਦੇਸ਼ ਦੇ ਨਾਂ ਟੀਵੀ ਜ਼ਰੀਏ ਦਿੱਤੇ ਸੰਦੇਸ਼ 'ਚ ਰਾਜਾ ਨੇ ਕਿਹਾ, "ਕੈਟਲੈਨ ਆਗੂ ਜਿੰਨ੍ਹਾਂ ਨੇ ਰਾਏਸ਼ੁਮਾਰੀ ਕਰਵਾਈ, ਉਨ੍ਹਾਂ ਨੇ ਦੇਸ਼ ਦੇ ਕਾਨੂੰਨ ਦੀ ਬੇਇਜ਼ਤੀ ਕੀਤੀ ਹੈ।"
"ਉਨ੍ਹਾਂ ਨੇ ਲੋਕਤੰਤਰਿਕ ਨੇਮਾਂ ਨੂੰ ਤੋੜਿਆ। ਅੱਜ ਕੈਟਲੈਨ ਸਮਾਜ ਅਪਾਹਿਜ ਹੋ ਗਿਆ ਹੈ।"
ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਚੋਣ ਦੀ ਵਜ੍ਹਾ ਕਰਕੇ ਧਨਾਢ ਉੱਤਰ-ਪੂਰਬੀ ਖੇਤਰ ਅਤੇ ਪੂਰੇ ਸਪੇਨ ਦੀ ਵਿੱਤੀ ਹਾਲਤ ਨੂੰ ਖ਼ਤਰਾ ਹੋ ਗਿਆ ਹੈ।
ਉਨ੍ਹਾਂ ਦਾਅਵਾ ਕੀਤਾ, "ਸਪੇਨ ਮੁਸ਼ਕਿਲ ਹਲਾਤਾਂ ਨਾਲ ਨਜਿੱਠ ਲਏਗਾ।"
ਕੇਂਦਰ ਸਰਕਾਰ ਪਹਿਲਾਂ ਹੀ ਰਾਏਸ਼ੁਮਾਰੀ ਨੂੰ ਗੈਰ-ਕਾਨੂੰਨੀ ਕਰਾਰ ਦੇ ਚੁੱਕੀ ਹੈ।
(ਬੀਬੀਸੀ ਪੰਜਾਬੀ ਦੇ ਫੇਸਬੁੱਕ ਪੰਨੇ ਉੱਤੇ ਜਾਣ ਲਈ ਇੱਥੇ ਕਲਿੱਕ ਕਰੋ ਇਸੇ ਤਰ੍ਹਾਂ ਲਿੰਕ ਉੱਤੇ ਕਲਿੱਕ ਕਰਕੇ ਇੰਸਟਾਗਰਾਮ ਪੰਨਾ ਦੇਖੋ।)