ਨਵਜੋਤ ਸਿੱਧੂ ਨੇ ਕਿਉਂ ਮੰਗੀ ਡਾ. ਮਨਮੋਹਨ ਸਿੰਘ ਤੋਂ ਮਾਫ਼ੀ?

ਨਵਜੋਤ ਸਿੱਧੂ Image copyright Getty Images

ਭਾਰਤੀ ਜਨਤਾ ਪਾਰਟੀ ਵਿੱਚ ਰਹਿੰਦਿਆਂ ਡਾਕਟਰ ਮਨਮੋਹਨ ਸਿੰਘ ਖ਼ਿਲਾਫ਼ ਟਿੱਪਣੀਆਂ ਕਰਨ ਵਾਲੇ ਨਵਜੋਤ ਸਿੰਘ ਸਿੱਧੂ ਨੇ ਕਾਂਗਰਸ ਦੀ ਕੌਮੀ ਸਟੇਜ ਉੱਤੋਂ ਬੋਲਦਿਆਂ ਸਾਬਕਾ ਪ੍ਰਧਾਨ ਮੰਤਰੀ ਡਾਕਟਰ ਮਨਮੋਹਨ ਸਿੰਘ ਤੋਂ ਆਪਣੀ ਭੁੱਲ ਬਖ਼ਸ਼ਾਈ।

ਦਿੱਲੀ ਵਿੱਚ ਪਾਰਟੀ ਦੇ ਪਲੈਨਰੀ ਸੈਸ਼ਨ ਦੌਰਾਨ ਬੋਲਦਿਆਂ ਸਿੱਧੂ ਨੇ ਡਾਕਟਰ ਮਨਮੋਹਨ ਸਿੰਘ ਨੂੰ ਮੁਖਾਤਬ ਹੁੰਦਿਆਂ ਕਿਹਾ,'ਮੈਂ ਸਰਦਾਰ ਮਨਮੋਹਨ ਸਿੰਘ ਤੋਂ ਮਾਫ਼ੀ ਮੰਗਣਾ ਚਾਹੁੰਦਾ ਹਾਂ, ਤੁਹਾਡੇ ਮੌਨ ਨੇ ਜੋ ਕੁਝ ਕਰਕੇ ਦਿਖਾਇਆ ਉਹ ਭਾਜਪਾ ਦਾ ਸ਼ੋਰ ਨਹੀਂ ਕਰ ਸਕਿਆ।'

'ਸਿਆਣੇ ਦਾ ਕਿਹਾ ਔਲੇ ਦਾ ਖਾਧਾ'

ਸਿੱਧੂ ਦਾ ਕਹਿਣਾ ਸੀ, 'ਸਿਆਣੇ ਦਾ ਕਿਹਾ ਔਲੇ ਦਾ ਖਾਧਾ' ਬਾਅਦ ਵਿੱਚ ਸੁਆਦ ਆਉਂਦਾ ਹੈ ਅਤੇ ਉਨ੍ਹਾਂ ਨੂੰ ਡਾਕਟਰ ਮਨਮੋਹਨ ਸਿੰਘ ਦੀ ਸਮਝ 10 ਸਾਲ ਬਾਅਦ ਆਈ ਹੈ।

ਮਨੋਮਹਨ ਸਿੰਘ ਦੀ ਚੁੱਪ ਰਹਿਣ ਦੀ ਆਦਤ ਨੂੰ ਸਿੱਧੂ ਨੇ ਸ਼ੇਅਰਾਂ ਰਾਹੀ ਵੀ ਵਡਿਆਇਆ।

ਪਰਿੰਦੋ ਕੋ ਮੰਜ਼ਿਲ ਮਿਲੇਗੀ ਹਮੇਸ਼ਾਂ ,ਯੇਹ ਫੈਲੇ ਹੂਏ ਉਨਕੇ ਪੰਖ ਬੋਲਤੇ ਹੈਂ

ਵਹੀ ਲੋਗ ਰਹਿਤੇ ਹੈਂ ਖ਼ਾਮੋਸ਼ ਅਕਸਰ, ਜ਼ਮਾਨੇ ਮੇਂ ਜਿਨਕੇ ਹੁਨਰ ਬੋਲਤੇ ਹੈਂ।

ਮਨਮੋਹਨ ਸਿੰਘ ਦੀ ਤੁਲਨਾ ਅਰਬੀ ਘੋੜੇ ਨਾਲ ਕਰਦਿਆਂ ਸਿੱਧੂ ਨੇ ਭਾਜਪਾ ਉੱਤੇ ਨਿਸ਼ਾਨਾ ਲਾਉਦਿਆਂ ਕਿਹਾ ਕਿ ਉਹ ਕਮਜ਼ੋਰ ਹੋ ਸਕਦਾ ਹੈ, ਬਜ਼ੁਰਗ ਹੋ ਸਕਦਾ ਹੈ, ਪਰ ਗਧਿਆਂ ਦੇ ਵਾੜੇ ਵਿੱਚ ਨਹੀਂ ਖੜਦਾ।

Image copyright Getty Images

ਮਨਮੋਹਨ ਸਿੰਘ ਦੀ ਮੋਦੀ ਸਰਕਾਰ ਦੀਆਂ ਆਰਥਿਕ ਨੀਤੀਆਂ ਬਾਰੇ ਭਵਿੱਖਬਾਣੀ ਦੇ ਹਵਾਲੇ ਨੇ ਸਿੱਧੂ ਨੇ ਕਿਹਾ ਕਿ ਮਨਮੋਹਨ ਸਿੰਘ ਨੇ ਮਿਹਨਤ ਇੰਨੀ ਖ਼ਾਮੋਸ਼ੀ ਨਾਲ ਕੀਤੀ ਕਿ ਕਾਮਯਾਬੀ ਨੇ ਸ਼ੋਰ ਮਚਾ ਦਿੱਤਾ।

ਸਰਦਾਰ ਵੀ ਹੋ ਅਸਰਦਾਰ

ਸਿੱਧੂ ਨੇ ਕਿਹਾ, 'ਸਰ, ਮੈਂ ਗੰਗਾ ਨਹਾ ਲਈ, ਤੁਹਾਡੇ ਪੈਰਾਂ ਵਿੱਚ ਸਿਰ ਰੱਖ ਕੇ, ਤੁਸੀਂ ਸਰਦਾਰ ਵੀ ਹੋ ਅਸਰਦਾਰ ਵੀ ਹੋ'।

ਵੈਸੇ ਸਿੱਧੂ ਨੇ ਸੋਨੀਆਂ ਤੋਂ ਲੈ ਕੇ ਕੀ ਰਾਹੁਲ, ਕੀ ਚਿਦੰਬਰਮ, ਪ੍ਰਿਅੰਕਾ ਗਾਂਧੀ ਤੇ ਆਨੰਦ ਸ਼ਰਮਾ ਦਾ ਨਾਮ ਲੈ ਲੈ ਕੇ ਉਨ੍ਹਾਂ ਦੇ ਸੋਹਲੇ ਗਾਏ।

Image copyright Getty Images

ਸਿੱਧੂ ਨੇ ਕਾਂਗਰਸ ਵਿੱਚ ਆਉਣ ਨੂੰ ਆਪਣੀ ਘਰ ਵਾਪਸੀ ਕਿਹਾ ਅਤੇ ਕਿਹਾ ਆਪਣੀ ਮਾਂ ਤੇ ਪਿਤਾ ਦੇ ਕਾਂਗਰਸੀ ਹੋਣ ਦਾ ਹਾਵਾਲ ਦਿੰਦਿਆ ਮਾਂ ਦੀ ਸਹੁੰ ਲੈ ਕੇ ਰਾਹੁਲ ਨੂੰ ਪ੍ਰਧਾਨ ਮੰਤਰੀ ਬਣਾਉਣ ਲਈ ਆਪਣੇ ਖੂਨ ਦੇ ਆਖ਼ਰੀ ਕਤਰੇ ਤੱਕ ਚੈਨ ਨਾਲ ਨਾ ਬੈਠਣ ਦਾ ਅਹਿਦ ਲਿਆ।

ਭਾਸ਼ਣ ਖਤਮ ਕਰਕੇ ਸਿੱਧੂ ਡਾ. ਮਨਮੋਹਨ ਸਿੰਘ ਕੋਲ ਗਏ ਤੇ ਪੈਰੀਂ ਹੱਥ ਲਾ ਕੇ ਆਸ਼ੀਰਵਾਦ ਵੀ ਲਿਆ।

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)