ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਕਿਹਾ, ਯੂਰਪੀ ਦੇਸ ਆਪਣੇ IS ਦੇ ਲੜਾਕੇ ਵਾਪਸ ਲੈਣ, ਨਹੀਂ ਤਾਂ ਅਸੀਂ ਛੱਡ ਦੇਣੇ

ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ Image copyright Getty Images
ਫੋਟੋ ਕੈਪਸ਼ਨ ਅਮਰੀਕੀ ਰਾਸ਼ਟਰਪਤੀ ਟਰੰਪ ਨੇ ਯੂਰਪੀ ਦੇਸਾਂ ਨੂੰ ਟਵੀਟ ਕਰਕੇ ਅਪੀਲ ਕੀਤੀ ਕਿ ਆਈਐਸ ਲੜਾਕਿਆਂ 'ਤੇ ਟ੍ਰਾਇਲ ਚਲਾਏ ਜਾਣ

ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਬਰਤਾਨੀਆ ਅਤੇ ਹੋਰ ਯੂਰਪੀ ਸਹਿਯੋਗੀਆਂ ਨੂੰ ਕਿਹਾ ਹੈ ਕਿ ਇਸਲਾਮਿਕ ਸਟੇਟ ਦੇ ਖ਼ਿਲਾਫ਼ ਆਖ਼ਰੀ ਪੜਾਅ ਦੀ ਲੜਾਈ ਦੌਰਾਨ ਫੜੇ ਗਏ 800 ਤੋਂ ਵੱਧ ਲੜਾਕਿਆਂ ਨੂੰ ਆਪਣੇ-ਆਪਣੇ ਦੇਸਾਂ ਵਿੱਚ ਲੈ ਜਾਣ ਅਤੇ ਉਨ੍ਹਾਂ 'ਤੇ ਮੁਕੱਦਮੇ ਚਲਾਏ ਜਾਣ।

ਰਾਸ਼ਟਰਪਤੀ ਟਰੰਪ ਦਾ ਇਹ ਟਵੀਟ ਅਮਰੀਕਾ ਦੀ ਹਮਾਇਤ ਹਾਸਿਲ ਕੁਰਦਿਸ਼ ਫੌਜ ਵੱਲੋਂ ਇਰਾਕ ਸਰਹੱਦ 'ਤੇ ਸੀਰੀਆਈ ਖੇਤਰ ਵਾਲੇ ਪਾਸੇ ਆਈਐੱਸ ਦੇ ਆਖ਼ਰੀ ਅੱਡੇ 'ਤੇ ਜਾਰੀ ਹਮਲਿਆਂ ਦੌਰਾਨ ਆਇਆ ਹੈ।

ਇਹ ਆਈਐੱਸ ਲੜਾਕੇ ਕੁਰਦਿਸ਼ ਲੜਾਕਿਆਂ ਦੀ ਹਿਰਾਸਤ ਵਿੱਚ ਹਨ।

ਰਾਸ਼ਟਰਪਤੀ ਟਰੰਪ ਨੇ ਕਿਹਾ ਹੈ ਕਿ ਆਈਐੱਸ ਦਾ ਆਖ਼ਰੀ ਅਧਿਕਾਰ ਖੇਤਰ ਵੀ "ਢਹਿ-ਢੇਰੀ ਹੋਣ" ਦੀ ਕਗ਼ਾਰ ’ਤੇ ਹੈ।

ਇਹ ਵੀ ਪੜ੍ਹੋ-

ਟਰੰਪ ਨੇ ਆਪਣੇ ਟਵੀਟ ਵਿੱਚ ਲਿਖਿਆ ਹੈ, "ਅਮਰੀਕਾ ਆਈਐੱਸ ਦੇ ਇਨ੍ਹਾਂ ਲੜਾਕਿਆਂ ਨੂੰ ਯੂਰਪ ਵਿੱਚ ਨਹੀਂ ਦੇਖਣਾ ਚਾਹੁੰਦਾ, ਜਿੱਥੇ ਇਨ੍ਹਾਂ ਦੇ ਜਾਣ ਦੀ ਆਸ ਹੈ। ਅਸੀਂ ਬਹੁਤ ਕੁਝ ਕਰਦੇ ਹਾਂ ਅਤੇ ਕਾਫੀ ਲਾਗਤ ਲਗਾਉਂਦੇ ਹਾਂ, ਹੁਣ ਦੂਜਿਆਂ ਦੇ ਅੱਗੇ ਆਉਣ ਦਾ ਅਤੇ ਆਪਣੀ ਸਮਰਥਾ ਨਾਲ ਕੰਮ ਕਰਨ ਦਾ ਸਮਾਂ ਹੈ।"

ਟਰੰਪ ਪ੍ਰਸ਼ਾਸਨ ਦੇ ਅਧਿਕਾਰੀਆਂ ਨੇ ਸੰਡੇ ਟੈਲੀਗਰਾਫ ਅਖ਼ਬਾਰ ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਡਰ ਹੈ ਕਿ ਜੇਕਰ ਹਿਰਾਸਤ ਵਿੱਚ ਲਏ ਗਏ ਕੁਝ ਲੜਾਕਿਆਂ ਨੂੰ ਨਿਆਂ ਨਹੀਂ ਮਿਲਦਾ ਤਾਂ ਉਹ ਯੂਰਪੀ ਦੇਸਾਂ ਨੂੰ ਖ਼ਤਰੇ 'ਚ ਪਾ ਸਕਦੇ ਹਨ

ਰਾਸ਼ਟਰਪਤੀ ਦਾ ਇਹ ਟਵੀਟ ਸਾਲ 2015 ਵਿੱਚ ਆਈਐਸ 'ਚ ਸ਼ਾਮਿਲ ਹੋਣ ਲਈ ਬਰਤਾਨੀਆਂ ਦੇ ਇੱਕ ਸਕੂਲ ਵਿਚੋਂ ਭੱਜੀਆਂ ਤਿੰਨ ਕੁੜੀਆਂ ਵਿਚੋਂ ਇੱਕ ਸ਼ਮੀਮਾ ਬੇਗ਼ਮ ਦੇ ਘਰ ਵਾਪਸ ਆਉਣ ਬਾਰੇ ਉਪਜੇ ਵਿਵਾਦ ਵਿਚਾਲੇ ਆਇਆ ਹੈ।

ਇਹ ਵੀ ਪੜ੍ਹੋ-

Image copyright Met police
ਫੋਟੋ ਕੈਪਸ਼ਨ ਕਦੀਜਾ ਸੁਲਤਾਨਾ, ਅਮੀਰਾ ਆਬੇਸ ਤੇ ਸ਼ਮੀਨਾ ਬੇਗ਼ਮ ਤਿੰਨੇ ਹੀ 2015 ਨੂੰ ਬਰਤਾਨੀਆਂ ਤੋਂ ਭੱਜੀਆਂ ਸਨ ਤੇ ਸ਼ਮੀਮਾ ਬੇਗ਼ਮ ਹੁਣ ਵਾਪਸ ਬਰਤਾਨੀਆ ਆਉਣਾ ਚਾਹੁੰਦੀ ਹੈ

ਸ਼ਮੀਮਾ ਬੇਗ਼ਮ ਦਾ ਕਹਿਣਾ ਹੈ ਉਹ ਵਾਪਸ ਬਰਤਾਨੀਆਂ ਆਉਣਾ ਚਾਹੁੰਦੀ ਹੈ ਪਰ ਸਰਕਾਰ ਉਸ ਨੂੰ ਵਾਪਸ ਲੈ ਕੇ ਆਉਣ ਲਈ ਕੋਈ ਕੋਸ਼ਿਸ਼ ਨਹੀਂ ਕਰ ਰਹੀ।

ਆਖ਼ਰੀ ਪੜਾਅ ਦੀ ਜੰਗ

ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਸ਼ੁੱਕਰਵਾਰ ਨੂੰ ਕਿਹਾ ਸੀ ਕਿ ਆਈਐੱਸ ਦੇ ਖ਼ਾਤਮੇ ਦਾ ਐਲਾਨ "ਅਗਲੇ 24 ਘੰਟਿਆਂ ਵਿੱਚ" ਕੀਤਾ ਜਾ ਸਕਦਾ ਹੈ।

ਪਰ ਇਹ 24 ਘੰਟੇ ਸ਼ਨਿੱਚਰਵਾਰ ਨੂੰ ਖ਼ਤਮ ਹੋ ਗਏ ਹਨ ਪਰ ਵ੍ਹਾਈਟ ਹਾਊਸ ਤੋਂ ਇਸ ਮੁੱਦੇ ਬਾਰੇ ਕੋਈ ਐਲਾਨ ਨਹੀਂ ਹੋਇਆ।

ਇਸ ਦੀ ਬਜਾਇ ਕੁਰਦਿਸ਼ ਲੜਾਕਿਆਂ ਦਾ ਕਹਿਣਾ ਹੈ ਕਿ "ਆਉਣ ਵਾਲੇ ਕੁਝ ਦਿਨਾਂ ਵਿੱਚ" ਅਜਿਹੀ ਖ਼ਬਰ ਆਉਣ ਦੀ ਸੰਭਾਵਨਾ ਹੈ ਕਿਉਂਕਿ ਸਥਾਨਕ ਨਾਗਰਿਕ ਲਗਾਤਾਰ ਭੱਜ ਰਹੇ ਹਨ।

ਮੀਡੀਆ ਪਲੇਬੈਕ ਤੁਹਾਡੀ ਡਿਵਾਈਸ 'ਤੇ ਸਪੋਰਟ ਨਹੀਂ ਕਰਦਾ
ਸੀਰੀਆ ’ਚ ਆਈਐਸ 90 ਫੀਸਦ ਕਬਜ਼ੇ ਵਾਲਾ ਇਲਾਕਾ ਗੁਆਇਆ

ਬੁੱਘਜ ਵਿੱਚ ਸੀਰੀਅਨ ਡੈਮੋਕਰੇਟਸ ਫੋਰਸ ਦੇ ਲੀਡਰ ਜੀਆ ਫੁਰਾਤ ਨੇ ਕਿਹਾ ਹੈ ਕਿ ਆਈਐੱਸ ਦੇ ਲੜਾਕੇ ਸ਼ਹਿਰ ਦੇ 700 ਸੁਕੇਅਰ ਮੀਟਰ ਦੇ ਦਾਇਰੇ ਵਿੱਚ ਸਿਮਟ ਗਏ ਹਨ।

ਉਨ੍ਹਾਂ ਨੇ ਸ਼ਨਿੱਚਰਵਾਰ ਨੂੰ ਕਿਹਾ, "ਹਜ਼ਾਰਾਂ ਨਾਗਰਿਕ ਅਜੇ ਵੀ ਉੱਥੇ ਮਨੁੱਖੀ ਢਾਲ ਵਜੋਂ ਫਸੇ ਹੋਏ ਹਨ।"

"ਆਉਣ ਵਾਲੇ ਕੁਝ ਦਿਨਾਂ ਵਿੱਚ ਅਸੀਂ ਆਈਐੱਸ ਦੇ ਅੰਤ ਬਾਰੇ ਦੁਨੀਆਂ ਨੂੰ ਚੰਗੀ ਖ਼ਬਰ ਦਿਆਂਗੇ।"

ਆਈਐੱਸ ਨੂੰ ਕਾਫੀ ਨੁਕਸਾਨ ਹੋਇਆ ਹੈ ਪਰ ਸੰਯੁਕਤ ਰਾਸ਼ਟਰ ਦਾ ਕਹਿਣਾ ਹੈ ਕਿ ਇਰਾਕ ਅਤੇ ਸੀਰੀਆ ਵਿੱਚ 14 ਹਜ਼ਾਰ ਤੋਂ 18 ਹਜ਼ਾਰ ਵਿਚਾਲੇ ਅਜੇ ਵੀ ਆਈਐਸ ਅੱਤਵਾਦੀ ਮੌਜੂਦ ਹਨ।

ਇਹ ਵੀ ਪੜ੍ਹੋ-

ਇਹ ਵੀਡੀਓ ਵੀ ਜ਼ਰੂਰ ਦੇਖੋ-

(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ।)