ආණ්ඩුවේ අර්බුදය උග්‍ර වේ: "අගමැති යා යුතුයි"

Image copyright PMD
Image caption ආණ්ඩුවේ අර්බුදය උග්‍ර වේ

අගමැති රනිල් වික්‍රමසිංහ අගමැති ධුරයෙන් ඉවත්විය යුතු යයි ජනාධිපති මෛත්‍රීපාල සිරිසේන දැඩි ස්ථාවරයක සිටින බව සිකුරාදා උදෑසන (පෙබරවාරි 16) ජනපති මුණගැසුණු එක්සත් ජාතික පක්ෂයේ ඇමතිවරයෙක් පවසයි.

බීබීසි සිංහල සේවය සමග අදහස් දක්වමින් එක්සත් ජාතික පක්ෂ ඇමතිවරයා පැවසුවේ යහපාලන ආණ්ඩුව ඉදිරියට ගෙනයාමට නම්, රනිල් වික්‍රමසිංහ අගමැති ධුරයෙන් ඉවත්විය යුතු යයි ජනපතිවරයා ප්‍රකාශ කළ බවය.

කතානායක කරු ජයසූරිය අගමැති ධුරයට පත් කර එක්සත් ජාතික පක්ෂය සමග ආණ්ඩුව කරගෙන යාමට ජනාධිපතිවරයා වැඩි කැමැත්තක් දක්වන බව ද ඔහු පැවසීය.

එම වෙනස වෙනුවෙන් එක්සත් ජාතික පක්ෂය තුළ සටන් කරන ලෙස, ජනාධිපති මෛත්‍රීපාල සිරිසේන ඔහු හමු වූ එක්සත් ජාතික පක්ෂයේ ඇමතිවරුන්ට පවසා තිබේ.

ජනාධිපතිවරයා අද උදැසන මාධ්‍ය ප්‍රධානීන් හමුවේ කිරීමට නියමිතව තිබුණු විශේෂ ප්‍රකාශය හදිසියේ අවලංගු කිරීමත් සමග මේ අර්බුදය තවත් උග්‍ර අතට පත්ව ඇතැයි අදහස් පළවෙමින් තිබිණ.

Image copyright PMD
Image caption ඒකාබද්ධ විපක්ෂයේ මන්ත්‍රීවරුන් පිරිසක් සිකුරාදා උදෑසන ජනාධිපති මෛත්‍රිපාල සිරිසේන හමුවී තිබෙන අතර ශ්‍රී ලංකා නිදහස් පක්ෂය වෙනුවෙන් අමාත්‍ය සුසිල් ප්‍රේමජයන්ත හිටපු ජනාධිපති මහින්ද රාජපක්ෂ හමුවී තිබුණි.

එළැඹි තිබෙන තත්වය පිළිබඳව එක්සත් ජාතික පක්ෂයේ නායක රනිල් වික්‍රමසිංහ ද සිකුරාදා සිය හිතවත් ඇමතිවරුන් සමග අදහස් පළ කොට තිබිණ.

සිකුරාදා සවස තමන් ජනමාධ්‍ය වෙත විශේෂ ප්‍රකාශයක් කරන බව අගමැතිවරයා එහිදී පවසා තිබෙන අතර එහිදී ඔහු පක්ෂ නායකත්වය සම්බන්ධයෙන් ද යම් ප්‍රකාශයක් කරන බවට තොරතුරු වාර්තාවේ.

ධුරයෙන් ඉල්ලා අස්වීම අගමැතිවරයා ප්‍රතික්ෂේප කර තිබෙන අතර, 19 වැනි ව්‍යවස්ථා සංශෝධනය ප්‍රකාර ජනපතිට අගමැතිවරයා ඉවත්කළ නොහැකි බව එක්සත් ජාතික පක්ෂයේ මතය වී තිබේ.

කෙසේ නමුත් ශ්‍රී ලංකා නිදහස් පක්ෂය පවසන්නේ ජාතික ආණ්ඩුවෙන් සිය පක්ෂය ඉවත්වූ වහාම අගමැති ඇතුළු ඇමති මණ්ඩලය අහෝසිවන බවය. එවිට බහුතර පාර්ලිමේන්තු බලයක් ඇති පුද්ගලයා අගමැති ධුරයට පත්කළ හැකි බව ඔවුන්ගේ ස්ථාවරය වී තිබේ.

ශ්‍රී ලංකා නිදහස් පක්ෂය ප්‍රමුඛ ආණ්ඩුවක් පිහිටුවීම සඳහා ඒකාබද්ධ විපක්ෂය හා එක්සත් ජාතික පක්ෂයේ පිරිසක් එකඟතාව පළකර ඇති බව මේ අතර ශ්‍රී ලංකා නිදහස් පක්ෂයේ අමාත්‍ය දයාසිරි ජයසේකර අමාත්‍යවරයා බීබීසී සිංහල සේවයට පැවසීය.

ඒකාබද්ධ විපක්ෂයේ මන්ත්‍රීවරුන් පිරිසක් සිකුරාදා උදෑසන ජනාධිපති මෛත්‍රිපාල සිරිසේන හමුවී තිබෙන අතර ශ්‍රී ලංකා නිදහස් පක්ෂය වෙනුවෙන් අමාත්‍ය සුසිල් ප්‍රේමජයන්ත හිටපු ජනාධිපති මහින්ද රාජපක්ෂ හමුවී තිබුණි.

පසුගිය පුවත්:

මේ පුවතට සම්බන්ධ තවත් විස්තර