ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

ආචාර්ය නිහාල් රංජිත් ජයතිලක

ලේඛක හා විචාරක ආචාර්ය නිහාල් රංජිත් ජයතිලක කියවන්නේ ඉන්දීය සම්භවයක් ඇති ලාංකික වතු කම්කරු ජීවිත අලලා ඉන්දීය ලේඛක ගෝපාලක්‍රිෂ්ණ ගාන්ධි ලියු "සරනම්" නවකතාවේ අනුල ද සිල්වා පරිවර්තනය "සරණගත".

නිහාල් රංජිත් ජයතිලකයන් ශ්‍රී ජයවර්ධනපුර සරසවියට ඇතුළු වූයේ ශාස්ත්‍ර වේදී උපාධිය සඳහා ආර්ථික විද්‍යාව හැදෑරීමට. එහිම ලේඛකත්ව හා සන්නිවේදන පාඨමාලාවේ පශ්චාත් උපාධිධාරියකු වන නිහාල් රංජිත්, ජනසන්නිවේදනයයි ශාස්ත්‍රපති උපාධියට හදාළේ. කොළඹ විශ්ව විද්‍යාලයේ ජනමාධ්‍ය ඩිප්ලෝමාව හිමිකර ගනිමින් ලක්ෂ්මන් ජයවර්ධන රන් පදක්කම ද දිනූ ජයතිලකයන් ආචාර්ය උපාධිය හිමි කර ගත්තේ "සිංහල පුවත්පත් ප්‍රකාශනයේ ආරම්භය හා විකාශනය" නමැති පර්යේෂණ කෘතිය ට. 1860 දී නිකුත් වූ "ලංකා ලෝකය" පත්‍රයේ සිට 1909 වසරේ ඇරැඹි "දිනමිණ" පත්‍රයේ 1916 වසරේ ක්‍රියාකාරිත්වය දක්‌වා වූ 56 වසරක කාලය තුළ බිහිවූ ප්‍රධාන ධාරාවේ සිංහල පත්‍ර 77 ක්‌ පිලිබඳ පස් වසරක පර්යේෂණයෙන් අනතුරුවයි ඒ එලි දැක්වූනේ. ගුවන් විදුලියේ සහන නිවේදකයකු වන ජයතිලකයන් ආර්ථික විද්‍යා හා ජනසන්නිවේදන ලේඛන මතු නොව නවකතා, කෙටිකතා ද ලියා පල කළ ලේඛකයෙක්. 70 දශකය මුලදී මහජන බැංකුවට බැඳුනු ආචාර්ය ජයතිලක විශ්‍රාම ගියේ පුද්ගල බැංකු කටයුතු පිලිබඳ නියෝජ්‍ය සාමාන්‍යාධිකාරී ධුරය හොබවමින් හිඳ. දැනට ඔහු ජයවර්ධනපුර විශ්ව විද්‍යාලයේ බාහිර කථිකාචාර්ය වරයෙක්.

ජ්‍යෙෂ්ට ඉන්දීය පරිපාලන නිලධාරියකු වන ගෝපාලක්‍රිෂ්ණ ගාන්ධි මහත්මා ගාන්ධි ගේ මුණුපුරෙක්. දිල්ලි සරසවියෙන් සාහිත්‍යය සඳහා ශාස්ත්‍රපති උපාධිය දිනූ ගෝපාල් ගාන්ධි ජනාධිපති ලේකම් ධුරයටත් බටහිර බෙංගාලයේ හා බිහාරයේ ආණ්ඩුකාර පදවියටත් පත් කරනු ලැබුවෙක්. දකුණු අප්‍රිකාව, අයිස්ලන්තය, නෝර්වේ සහ ශ්‍රී ලංකාවේ ඉන්දීය තානාපති වරයා ලෙසින් සේවයේ යෙදී තිබෙන ඔහු ලියු එකම නවකතාවයි "සරනම්". "සරණගත" නමින් එය සිංහලට නැඟූ අනුල ද සිල්වා, විශ්ව සාහිත්‍යය සිංහල පාඨකයාට සමීප කිරීමෙහි නිරත ලේඛිකාවක්. ඇගේ පරිවර්තන කෘති අතර “තිත්ත කෝපි”, “දඹතැන්න”, “කටු කුරුලු හඬ” හා “දෙවියන්ගේ අඩවිය” මුල් තැනෙක වෙයි. ජනමාධ්‍ය වේදිනියක් ද වන අනුල, කළ ස්වතන්ත්‍ර නිර්මාණ කීපය අතුරින් දෙකක් “පාදඩයකුට පෙම් බැඳ” හා “මංජෙශ්වරි”.