ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

‘බොදු බල සේනා රට ගිණි තියනවා’- වාසුදේව

Image copyright lanintegmin.gov.lk BBC

බොදු බල සේනා සංවිධානය ඔවුන්ගේ ආරම්භයේ පටන් ම අන්‍ය ජාතික සහ අන්‍ය ආගමික මධ්‍යස්ථාන වලට බලහත්කාරයෙන් කඩා වැදී ප්‍රහාර එල්ල කිරීම පුරුද්දක් බවට පත් කර ගෙන ඇතැයි ජාතික ඒකාග්‍රතාවය භාර ඇමති වාසුදේව නානායක්කාර අවධාරණයෙන් කියා සිටියි.

ඇමතිවරයා එම ප්‍රකාශය කළේ බීබීසී සංදේශය සමඟ පැවැත්වූ සාකච්ඡාවකදී.

එපමණක් නොව ආගම්වාදී භේද ඇති කරන ආකාරයේ ප්‍රකාශන නිකුත් කරනු ලැබීමට ද බොදු බල සේනා කටයුතු කරන බවයි, වාසුදේව නානායක්කාර ඇමතිවරයා කියා සිටින්නේ.

“මේ දෙයාකාරයෙන් ම බොදු බල සේනා කරන්නේ අපරාධයක්. එකක් ජාති භේද ආගම් භේද ඇවිස්සීම. දෙවැන්න, ඔවුන් කටයුතු කරන්නේ බලහත්කාරයෙන්” ඇමතිවරයා පෙන්වා දෙයි.

“ආණ්ඩුව ආණ්ඩුවක් නම්” මෙවැනි සංවිධානයක් මේ ආකාරයට කටයුතු කරනු “නිකම් බලා සිටීමට” ආණ්ඩුවකට හැකිදැයි වාසුදේව නානායක්කාර ඇමතිවරයා ප්‍රශ්න කරයි.

ආණ්ඩුව ආණ්ඩුවක් නම්

බෞද්ධ අයිතියට තර්ජනයක් ඇත්නම් ඒ ගැන බෞද්ධ කටයුතු භාර අමාත්‍යංශයට දැනුම් දෙන ලෙස බොදු බල සේනා සංවිධානයට උපදෙස් දෙන ජාතික ඒකාග්‍රතාවය භාර ඇමතිවරයා, එසේ නොකොට අන්‍ය ජාතික සහ ආගමික කණ්ඩායම් සමඟ පැටලීම රට ගිණි තැබීමක් වන බවයි කියා සිටියේ.

ආණ්ඩුක්‍රම ව්‍යවස්ථාව අනුව සියලුම ආගම්වල අයිතීන් රැක දීමට ආණ්ඩුව බැඳී සිටින බව සිහිපත් කර දුන් වාසුදේව නානායක්කාර ඇමතිවරයා ‘නීතියට උඩින්’ කටයුතු කිරීමට බොදු බල සේනාවට බලයක් නොමැති බවයි පෙන්වා දෙන්නේ.

බොදු බල සේනා නියෝජිතයන් බදාදා, ජාතික බල සේනා සංවිධානයේ මාධ්‍ය හමුව ආක්‍රමණය කරද්දී පොලිසිය නිහඬව බලා සිටියා නොවේදැයි සංදේශය ඇමතිවරයාගෙන් විමසු විට ඔහු කියා සිටියේ, “එම අපරාධය වලක්වාලීමට පොලිසිය ක්‍රියා නොකළේ නම් පොලිසිය සිදු කර ඇත්තේ විශාල වරදක්” වන බවයි.

“පොලිසිය හරිහැටි ක්‍රියාත්මක නොවුනොත් එය බොදු බල සේනාවට අනියම් වශයෙන් දෙන අනුග්‍රහයක් බවට පත් වෙන” බවයි වාසුදේව නානායක්කාර ඇමතිවරයා පවසන්නේ.