ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

දෝෂාභියෝගයක් ගෙන ආ හැකියි -ගම්මන්පිල

පිවිතුරු හෙළ උරුමයේ නායක උදය ගම්මන්පිල බීබීසීයට කියා සිටියේ ජාතික ගීය දෙමළ බසින් ගායනා කිරීමට අවසර දෙමින් ජනාධිපතිවරයා ගැසට් පත්‍රිකාවකට අත්සන් තබන්නේ නම් එය ව්‍යවස්ථාව උල්ලංඝනය කිරීමක් වන හෙයින් ජනාධිපතිවරයාට එරෙහිව දෝෂාභියෝගයක් ගෙන ආ හැකි බවයි.

ජාතික ගීය දෙමළ බසින් ගායනා කිරීමට ඉඩ දීම ගැන තම විරුද්ධත්වයක් නොමැති නමුත් දෙමළ පරිවර්තනයට නිල ස්ථාවරයක් ලබා නොදිය යුතු බවයි ඔහු තව දුරටත් කියා සිටියේ.

නමුත් කැබිනට් මණ්ඩල තීරණ දැනුම් දීමේ මාධ්‍ය හමුවේ දී අමාත්‍ය රාජිත සේනාරත්න කියා සිටියේ දෙමළ භාෂාවෙන් ජාතික ගීය ගායනා කිරීම සම්බන්ධයෙන් ජනාධිපතිවරයා කිසිදු නව නීතියක් පනවා නොමැති බවයි.

අයිතියක් -රාජිත

‘අමුතුවෙන් අනුමැතියක් දෙන්න අවශ්‍ය නැහැ. තියෙන ව්‍යවස්ථාව ක්‍රියාත්මක කරන්න ජනාධිපති කෙනෙක් අමුතුවෙන් අනුමැතිය දෙන්න ඕන නැහැ. ජාතික ගීය දෙමළෙන් ගායනා කිරීම ව්‍යවස්ථාවේ තියෙන අයිතියක්’ කැබිනට් ප්‍රකාශක රාජිත සේනාරත්න ඇමතිවරයා සඳහන් කළේය.

කෙසේ වෙතත් ආණ්ඩුක්‍රම ව්‍යවස්ථාවට අනුව නිල ජාතික ගීය වශයෙන් සිංහල භාෂාවෙන් රචිත ජාතික ගීය පවතින බවත් දෙමළ භාෂාවෙන් එය ගායනා කිරීමට නීතියෙන් කිසිදු අවහිරයක් නොමැති බවත් ජනාධිපති නීතිඥ ආචාර්ය ජයම්පති වික්‍රමරත්න පවසයි.