ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

ශ්‍රී ලාංකිකයන් යේමනයේ සිට චීන ගුවන් යානයකින්

යේමනයේ සිටින ශ්‍රී ලාංකිකයන් හෙට, සිකුරාදා දිනයේදී චීන ගුවන් යානයක් මගින් ශ්‍රී ලංකාවට ගෙන ඒමට සැලසුම් කොට තිබේ.

ශ්‍රී ලංකා විදේශ අමාත්‍යංශය සහ ඕමානයේ ශ්‍රී ලංකා තානාපති කාර්යාලය විසින් මේ බව දැමුණ දී ඇති බවයි එම කටයුතු සම්බන්ධීකරණය කරන යේමනයේ සේවයේ නිරත උජාල පෙරේරා සංදේශයට පැවසුවේ.

ශ්‍රී ලංකා රජය ආධාර කරන ලෙස කළ ඉල්ලීමකට අනුව චීන රජය යහපත් ප්‍රතිචාරයක් පල කොට ඇති බව දැන ගන්නට ඇති බව ඔහු ප්‍රකාශ කළේය.

චීන ගුවන් යානයක් යේමනයේ සනා අගනුවරට පැමිණෙන බවත් එහි ශ්‍රී ලාංකිකයන් සඳහා ඉඩ වෙන් කොට ඇති බව දන්වා ඇති බවයි ඔහු සඳහන් කළේ.

කලින් ඉන්දීය ගුවන් යානා මගින් ශ්‍රී ලාංකිකයන් රැගෙන යාමට සැලසුම් කොට තිබුනත් එම යානා වලට සනා අගනුවරට ගොඩ බෑමට අවසර ලැබී නැති බවයි ඔහු ප්‍රකාශ කළේ.

දින හතරක් මුළුල්ලේ ඉන්දීය ගුවන් යානා වලට ගොඩ බෑමට අවසර ලබා දී නැති බව පැවසූ ඔහු අද, බ්‍රහස්පතින්දා දිනයේදීත් සනා ගුවන් තොටුපොළ වෙත ගිය ඉන්දියානුවන් ගුවන් යානා නොමැති කම හේතුවෙන් ආපසු පැමිණි බව පැවසුවේය.

ශ්‍රී ලංකා රජය වෙනත් රටවලින් සහය ඉල්ලා සිටින්නට ඇත්තේ මේ හේතුව නිසා වෙන්නට ඇති බවයි යේමනයේ සේවයේ නිරත උජාල පෙරේරා පැවසුවේ.

Image copyright INDIAN NAVY
Image caption ගුවන් හමුදා යානා මගින් ඉන්දියාවට ලඟා වූ ඉන්දීය ජාතිකයන්

ඉන්දීය ජාතිකයන් 350 කට වැඩි පිරිසක් අද, බ්‍රහස්පතින්දා ජිබුටි සිට ගුවන් හමුදා යානා මගින් ඉන්දියාවට ලඟා වූහ.

ඔවුන් ඒඩන් සිට ජිබුටි දක්වා ඉන්දීය නාවික හමුදාවට අයත් නැවක් මගින් ගෙන ගොස් තිබේ.

ශ්‍රී ලංකාව පමණක් නොව ලෝකයේ තවත් රටවල් රැසක් යේමනයේ කොටු වී සිටින ඔවුන්ගේ රටවැසියන් ඉවත් කර ගැනීමේ උත්සාහයක නිරත වෙමින් සිටී.

ඊජිප්තුව ,ඉන්දියාව ,පාකිස්තානය ,ඉන්දුනීසියාව සහ චීනය වැනි රටවල් ඒ සඳහා පියවර ගනිමින් ඇති බවයි වාර්තා වන්නේ.