ක්‍රිකට්: ලෝක කුසලාන දෙකකදී දෙරටක් වෙනුවෙන් ක්‍රීඩා කළ ශ්‍රී ලාංකිකයා

Andri Raffaelo Berenger ශ්‍රී ලංකා කණ්ඩායමේ සහ එමීර් රාජ්‍ය කණ්ඩායමේ නිල ඇඳුම්වලින් සැරසී Image copyright Getty Images
Image caption ශ්‍රී ලංකා කණ්ඩායමේ සහ එමීර් රාජ්‍ය කණ්ඩායමේ නිල ඇඳුම්වලින් සැරසී සිටින ඇන්ද්රි රෆායෙලෝ බෙරෙන්ජර්

මෙයින් වසර හතකට ඉහතදී වයස 19න් පහළ ජගත් ක්‍රිකට් ශූරතාවලියේදී ශ්‍රී ලංකාව නියෝජනය කළ ක්‍රීඩකයෙක් ඉන් වසර කිහිපයකට පසුව වෙනත් රටක් නියෝජනය කරමින් ලෝක කුසලානයට තරග වැදුණු බව ඔබ දැන සිටියාද?

2010 නවසීලන්තයේ පැවති යොවුන් ලෝක කුසලානයේදී ශ්‍රී ලංකාව නියෝජනය කළ ඇන්ද්රි රෆායෙලෝ බෙරෙන්ජර් (Andri Raffaelo Berenger) ඉන් අනතුරුව 2015 පැවති ජගත් කුසලානයේදී එක්සත් අරාබි එමීර් රාජ්‍යය වෙනුවෙන් ක්‍රීඩා කළේය.

බෙරෙන්ජර් ඇතුළු යොවුන් ලෝක කුසලානයේදී සිය මව් රට නියෝජනය කළ ක්‍රීඩකයන් 13 දෙනෙකුවත් ඉන් අනතුරුව වෙනත් රටවල් වෙනුවෙන් ක්‍රීඩා කර තිබෙන බව අයිසීසී ජගත් ක්‍රිකට් පාලක මණ්ඩලය පෙන්වා දෙයි.

එහෙත් ශ්‍රී ලාංකික ක්‍රීඩකයා මෙන් නොව ඒ අතරින් බොහෝ දෙනා ජ්‍යෙෂ්ඨ ක්‍රීඩාවට අවතීර්ණ වී තිබෙන්නේ ජගත් පාලක මණ්ඩලයේ පූර්ණ සාමාජික රටක් වෙනුවෙනි.

Image copyright Getty Images
Image caption බෙරෙන්ජර් 2015 ලෝක කුසලානයේදී එමීර් රාජ්‍යය නියෝජනය කරමින්
Image copyright Getty Images
Image caption බෙරෙන්ජර් (දකුණේ) 2010 යොවුන් ලෝක කුසලානයේදී ශ්‍රී ලංකාව නියෝජනය කරමින්

එක්සත් අරාබි එමීර් රාජ්‍යයේ ක්‍රිකට් කණ්ඩායමට සම්බන්ධවීමට ප්‍රථම ඇන්ද්රි රෆායෙලෝ සිංහල ක්‍රීඩා සමාජය, කොළඹ ක්‍රීඩා සමාජය සහ සීදුව රද්දොළුව ක්‍රීඩා සමාජය වෙනුවෙන් ක්‍රීඩා කර තිබේ.

2014 නොවැම්බර් මාසයේදී එක්සත් අරාබි එමීර් රාජ්‍ය කණ්ඩායම වෙනුවෙන් ඇෆ්ඝනිස්තානයට එරෙහිව තරග වදිමින් ඔහු එක් දින ජාත්‍යන්තර තරග පිටියට එක් විය.

වර්තමානයේ එංගලන්ත ක්‍රිකට් කණ්ඩායම නියෝජනය කරන ජොනතන් ට්‍රොට් (Jonathan Trott) 2000 පැවති යොවුන් ජගත් කුසලානයේදී දකුණු අප්‍රිකාව නියෝජනය කළ අතර, එංගලන්ත කණ්ඩායමේ ඉයන් මෝගන් (Eoin Morgan) 2004 පැවති අවුරුදු 19න් පහළ ලෝක කුසලානයේදී අයර්ලන්තය නියෝජනය කළ ක්‍රීඩකයෙකි.

1998 දී පාකිස්තානය වෙනුවෙන් වයස 19න් පහළ ක්‍රිකට් ලෝක කුසලානයට තරග කළ ඉම්රාන් තහීර් (Imran Tahir) පසුව දකුණු අප්‍රිකානු කණ්ඩායමට සම්බන්ධ විය.

ජගත් පාලක මණ්ඩලයේ නිවේදනයක සඳහන් වන පරිදි ගැරී බැලන්ස්, ග්‍රාන්ට් එලියට්, ඇන්ඩි කැඩික්, පීටර් බොරන්, මයිකල් ලම්බ්, ටීම් මර්ටා, ක්‍රේග් කීස්වෙටර්, ලෝගන් වෑන් බීක් සහ කොලින් ඩි ග්‍රෑන්ඩ්හෝම් මේ ආකාරයට යොවුන් කුසලානයේදී සිය රට නියෝජනය කොට පසුව වෙනත් රටවලට සම්බන්ධ වූ අනෙක් ක්‍රීඩකයන්ය.

12 වෙනි ක්‍රිකට් යොවුන් ලෝක කුසලාන ශූරතාවලිය ලබන ජනවාරි 13 වෙනි දින නවසීලන්තයේදී ආරම්භ වන අතර, එහිදී පාකිස්තානය, ඇෆ්ඝනිස්තානය සහ අයර්ලන්තය ඇතුළත් ඩී කාණ්ඩයේ ශ්‍රී ලංකා යොවුන් කණ්ඩායම තරග වැදීමට නියමිතය.

මේ පුවතට සම්බන්ධ තවත් විස්තර