ක්‍රිකට්: දකුණු අප්‍රිකාවට එරෙහිව ශ්‍රී ලංකාව ලබාගත් දුර්ලභ ටෙස්ට් තරගාවලි ජයග්‍රහණය

Image copyright TWITTER
Image caption ජය සමරන ශ්‍රී ලංකා කණ්ඩායම

දොළොස් වසරකට පසු දකුණු අප්‍රිකාව පරදා ටෙස්ට් තරගාවලියක් ජයග්‍රහණය කිරීමට ශ්‍රී ලංකා ක්‍රිකට් කණ්ඩායම සමත්විය.

ඒ ප්‍රබල දකුණු අප්‍රිකානු කණ්ඩායම කොළඹ එස්එස්සී ක්‍රීඩාංගනයේ පැවති දෙවැනි ටෙස්ට් තරගයෙන් ලකුණු 199කින් පරාජය කිරීමත් සමගය.

ඒ අනුව තරගාවලිය 2-0කින් ශ්‍රී ලංකාව ජයගත් අතර දකුණු අප්‍රිකාව සමග ශ්‍රී ලංකාව මීට ඉහතදී ටෙස්ට් තරගාවලියක් ජයග්‍රහණය කළේ 2006 වසරේදීය.

එම 2006 තරගාවලියේදී මහේල ජයවර්ධන හා කුමාර් සංගක්කාර ලෝක වාර්තාගත ලකුණු 624ක කඩුලු සම්බන්ධතාවයක් පැවැත්වූහ.

ඉන් පසු අවස්ථා ගණනාවකදී ශ්‍රී ලංකා කණ්ඩායම දකුණු අප්‍රිකාව සමග තරග කළත් එම තරගාවලි පරාජයට පත්වූ අතර ශ්‍රී ලංකාවේදී 2014දි පැවැත්වුණු තරගාවලියත් ශ්‍රී ලංකාව 1-0ක් ලෙස පරාජයට පත්විය.

දඟ පන්දු යවන්නන් රජ කළ මෙවර තරගාවලියේ බිඳ වැටුණු දකුණු අප්‍රිකානු කඩුලු 40න් 37ක්ම බිඳ හෙලනු ලැබ තිබුණේ ශ්‍රී ලංකා දඟ පන්දු යවන්නන් විසිනි.

දෙවන හා අවසන් ටෙස්ට් තරගයේ දකුණු අප්‍රිකාවේ කඩුලු 20ම බිඳ දැමුවේ ශ්‍රී ලංකා දඟ පන්දු යවන්නන් විසින් වන අතර ශ්‍රී ලංකා ඉනිම් දෙකේදී බිඳ වැටුණු කඩුලු 15න් 12ක්ම බිඳ දැමුවේ දකුණු අප්‍රිකානු දඟ පන්දු යවන ක්‍රීඩක කෙෂව් මහාරාජ් විසින් වීම විශේෂත්වයකි.

ශ්‍රී ලංකා කණ්ඩායමේ දඟ පන්දු යවන ක්‍රීඩක රංගන හේරත් සඳුදා කඩුලු 6ක් බිඳ දමමින් දකුණු අප්‍රිකානු ඉනිම අවසන් කළ අතර මෙම තරගාවලියෙන් පසුව එංගලන්තය සමග පැවැත්වෙන ටෙස්ට් තරගාවලිය තමන් අවසන් ටෙස්ට් තරගාවලිය විය හැකි බව තරගාවලිය ආරම්භයේදී ඔහු බීබීසී සිංහල සේවය සමග අදහස් දක්වමින් පැවසීය.

දඟ පන්දු යවන්නන්ට වඩාත් වාසිදායක තණතීරු ශ්‍රී ලංකාව සකස්කිරීම ගැන ඇතැම් ක්‍රීඩා විචාරකයන් විවේචනයක් ඉදිරිපත් කර තිබූ නමුත් තවත් අය පෙන්වාදී තිබුණේ ශ්‍රී ලංකා කණ්ඩායම දකුණු අප්‍රිකාවේ සංචාරය කළ අවස්ථාවේදී ඔවුන් ශ්‍රී ලංකාවට ලබාදුන්නේ වේග පන්දු යවන්නට වාසිදායක තණතීරු බවය.

ඒ අනුව ශ්‍රී ලංකා පිලේ 2018 පෙබරවාරි දකුණු අප්‍රිකානු සංචාරයේදී තවත් වේගවත් තණතීරු හිමිවනු ඇති බවද විචාරකයන් මත පළකර තිබුණි. ඒ ශ්‍රී ලංකාවේදී මෙවර අත්වුණු අමිහිරි පරාජයේ වාඩුව ගැනීම සඳහාය.

ශ්‍රී ලංකා කණ්ඩායම මෙම තරගාවලියට සහභාගිවූයේ කණ්ඩායමේ නිත්‍ය නායක දිනේෂ් චන්දිමාල්, පුහුණුකරු චන්දික හතුරුසිංහ හා කළමනාකරු අසංක ගුරුසිංහ නොමැතිවය. ඒ ඔවුන් තාවකාලික තරග තහනමකට ලක්වී ඇති බැවිනි.

මෙවර තරගාවලියේ ශ්‍රී ලංකා කණ්ඩායමේ නායකත්වය දැරුවේ වේගපන්දු යවන ක්‍රීඩක සුරංග ලක්මාල් වන අතර ඔහුට අවසන් ටෙස්ට් තරගයේ පන්දු යැවීමට සිදුවූයේ පන්දුවාර දෙකක් පමණි.

ටෙස්ට් තරගාවලියෙන් අනතුරුව දකුණු අප්‍රිකාව ශ්‍රී ලංකාව සමග එක්දින තරග 5කින් යුත් තරගාවලියක් ක්‍රීඩා කරන අතර එම තරගාවලිය ලබන 29 වැනිදා දඹුල්ලේදී ආරම්භවීමට නියමිතය.