නොරොච්චෝලේ තාප බලාගාරයේ 'බරපතළ පිපිරීමක්'

  • 2016 ඔක්තෝබර් 16
පිපිරීම සිදු වූ ස්ථානය Image copyright Ajith P Perera/FB
Image caption පිපිරීම සිදු වූ ස්ථානය

නොරොච්චෝලේ ලක් විජය තාප බලාගාරයේ 'බරපතළ මට්ටමේ' පිපිරීමක් සිදු වී ඇති බව විදුලිබල සහ පුනර්ජනනීය බලශක්ති පිළිබඳ නියෝජ්‍ය අමාත්‍ය අජිත් පී පෙරේරා පවසයි.

ඒ හේතුවෙන් මෙගාවොට් 900 ක බලශක්ති හිඟයක් ඇති විය හැකි බවටත් නියෝජ්‍ය ඇමතිවරයා අනතුරු අඟවයි.

නොරොච්චෝලේ තාප බලාගාරය ආරම්භ කළ දිනයේ පටන් අවස්ථා ගණනාවකදී ඇනහිටි බව මේ අතර පෙන්වා දෙන ජනතා විමුක්ති පෙරමුණේ පාර්ලිමේන්තු මන්ත්‍රී විජිත හේරත්, එයට හේතුව බලාගාරයේ ඉදිකිරීම් කටයුතු නියමිත ප්‍රමිතියට අනුව සිදු නොවීම බවත් සඳහන් කළේය.

'ලංකාවේ තව විදුලි බලාගාර තිබෙනවා. නමුත් ඒ බලාගාර නොරොච්චෝලේ වගේ ඇනහිටින්නේ නැහැ. මේ තත්වය නොරොච්චෝලෙට පමණක් විශේෂිත වූ දෙයක්,' ඔහු කියා සිටියේ කොළඹ පැවති මාධ්‍ය හමුවකට එක් වෙමිනි.

නොරොච්චෝලේ බලාගාරය ඉදි කිරීමේදී නියමිත ටෙන්ඩර් පටිපාටියෙන් තොරව ප්‍රමිතියෙන් බාල උපාංග ගෙන්වා ඇති බවට එවකට විපක්ෂයේ සිටි වත්මන් ආණ්ඩු පක්ෂයේ ඇතැම් පාර්ශව චෝදනා කළ බවත් එම චෝදනා සම්බන්ධයෙන් වත්මන් ආණ්ඩුව මේ දක්වා විධිමත් පරීක්ෂණයක් සිදු කොට නොමැති බවත් පාර්ලිමේන්තු මන්ත්‍රී විජිත හේරත් පවසයි.

Image copyright Getty/ LAKRUWAN WANNIARACHCHI
Image caption "ලංකාවේ තව විදුලි බලාගාර තිබෙනවා. නමුත් ඒ බලාගාර නොරොච්චෝලේ වගේ ඇනහිටින්නේ නැහැ.මේ තත්වය නොරොච්චෝලෙට පමණක් විශේෂිත වූ දෙයක්,"

'වර්තමාන ආණ්ඩුවේ ඇමතිවරුත් මේ ඇනහිටීමට උත්තර බැඳීමක් පමණයි දැන් කරන්නේ. මේ යන්ත්‍ර සූත්‍රවල වැරද්දක් තිබේ නම් ඒ පිළිබඳ තාක්ෂණික ඇගයීම් වාර්තාවක් ලබා ගැනීම අත්‍යවශ්‍යයි,' පාර්ලිමේන්තු මන්ත්‍රී විජිත හේරත් සඳහන් කළේය.

සම්ප්‍රේෂණ පද්ධතියේ ඇති වූ තාක්ෂණික දෝෂයක් හේතුවෙන් සෙනසුරාදා උදෑසන බලාගාරයේ කටයුතු ඇනහිටී බව විදුලිබල අමාත්‍යංශය මීට ඉහතදී පැවසීය.

ඒ හේතුවෙන් උතුර, උතුරු මැද සහ නැගෙනහිර යන පළාත්වල ප්‍රදේශ ගණනාවක විදුලි සැපයුම බිඳ වැටුණු බවත් වාර්තා විය.

පැය කීපයකට පසු විකල්ප මාර්ග ඔස්සේ එම ප්‍රදේශ වෙත විදුලි සැපයුම ලබා දීමට කටයුතු කළ බව විදුලිබල සහ පුනර්ජනනීය බලශක්ති අමාත්‍යංශය පවසා තිබිණි.

මෙගාවොට් 3900 වන රටේ සමස්ත විදුලි බල නිෂ්පාදනයෙන් මෙගාවොට් 900 ක විදුලි ධාරිතාවක් නොරොච්චෝලේ ලක් විජය තාප බලාගාරයෙන් ජාතික විදුලි බල පද්ධතියට එක් වේ.

සබැඳි විෂයයන්

මේ පුවතට සම්බන්ධ තවත් විස්තර

බීබීසී යෙන්