අත්අඩංගුවට ගැනීමේ ක්‍රමවේදය වැරදියි - කෙහෙළිය
ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

අත්අඩංගුවට ගැනීමේ ක්‍රමවේදය වැරදියි - කෙහෙළිය

පසුගිය කාලයේ සිදුවූ මාධ්‍යවේදීන් ඝාතනය කිරීම් සහ පහරදීම් සම්බන්ධයෙන් හමුදා බුද්ධි අංශ සාමාජිකයන් අත්අඩංගුවට ගැනීමේ ක්‍රමවේදයේ ගැටලුවක් ඇති බව හිටපු ජනමාධ්‍ය අමාත්‍ය කෙහෙළිය රඹුක්වැල්ල පවසයි.

අද කොළඹදී පැවති මාධ්‍ය හමුවකදී ඔහු මේබව පැවසුවේ ජ්‍යෙෂ්ඨ මාධ්‍යවේදී කීත් නෝයර් පැහැරගෙනයෑම සහ පහරදීම සම්බන්ධයෙන් සැකපිට අත්අඩංගුවට ගෙන සිටින බුද්ධි අංශ නිලධාරීන් ගැන අදහස් දක්වමිනි.

මෙම සිදුවීම් වලට හමුදාව සම්බන්ධ නම් ඔවුන්ට තරාතිරම නොබලා දඬුවම් දිය යුතු බව පැවසූ කෙහෙළිය රඹුක්වැල්ල මන්ත්‍රීවරයා කෙසේ නමුත් එයට අදාළ ක්‍රමවේදය අනුගමනය කළ යුතු බව අවධාරණය කළේය.

මෙම බුද්ධිඅංශ සාමාජිකයන් අත්අඩංගුවට ගෙන ඇත්තේ ත්‍රස්තවාදී පනත යටතේ බවට චෝදනා කළ කෙහෙළිය රඹුක්වැල්ල මන්ත්‍රීවරයා සාමාන්‍ය පහරදීමේ සිද්ධියක් ලෙස මෙය සැළකිය යුතු බවද ප්‍රකාශ කළේය.

එදා මෙන් අදත් මෙම ප්‍රහාර පිටුපස සිටින්නේ කවුදැයි තමන් නොදන්නා බව ඒ පිළිබඳව යොමුවූ ප්‍රශ්නයකට පිළිතුරු දෙමින් ඔහු පැවසීය.