ශ්‍රී ලංකා මහ බැංකු බැඳුම්කර ගනුදෙනුව : මහේන්ද්‍රන්, ඇලෝසියස් ,පලිසේන "සැකකරුවෝ"

Image caption මහ බැංකුවේ හිටපු අධිපති අර්ජුන් මහේන්ද්‍රන් සහ අර්ජුන් ඇලෝසියස්

දැඩි මතභේදයට තුඩුදී තිබෙන 'මහබැංකු බැඳුම්කර සිද්ධියේ' සැකකරුවන් ලෙස, හිටපු මහබැංකු අධිපති අර්ජුන් මහේන්ද්‍රන්, පර්පෙචුවල් ට්‍රෙෂරීස් සමාගමේ සභාපති අර්ජුන් ඇලෝසියස් සහ එම සමාගමේ ප්‍රධාන විධායක අධ්‍යක්ෂ කසුන් පළිසේන යන පුද්ගලයින් නම් කිරීම සඳහා කොළඹ කොටුව මහේස්ත්‍රාත් අධිකරණය අද රහස් පොලීසියට අවසර ලබා දුන්නේය.

රහස් පොලිසිය වෙනුවෙන් නීතිපති දෙපාර්තමේන්තුවේ නිලධාරීන් කළ ඉල්ලීමක් සලකා බැලීමෙන් පසුව කොළඹ කොටුව මහේස්ත්‍රාත් ලංකා ජයරත්න,මෙම නියෝග නිකුත් කළාය.

මහබැංකු බැඳුම්කර සිද්ධිය පිළිබඳව සොයා බැලූ ජනාධිපති කොමිසම සිදුකර තිබෙන නිර්දේශ මත, රහස් පොලිසිය පරීක්ෂණයක් ආරම්භකර ඇති බව නීතිපති දෙපාර්තමේන්තුවේ අතිරේක සොලිස්ටර් ජනරාල්වරයා අධිකරණය හමුවේ කියා සිටියේය.

Image copyright PRESIDENT OFFICE
Image caption මහබැංකු බැඳුම්කර පරීක්ෂණ වාර්තාව

එම පරීක්ෂණවල දී අදාළ සිද්ධියට මහ බැංකුවේ හිටපු අධිපති අර්ජුන් මහේන්ද්‍රන්, පර්පෙචුවල් ට්‍රෙෂරීස් සමාගමේ සභාපති අර්ජුන් ඇලෝසියස් හා එම සමාගමේ ප්‍රධාන විධායක කසුන් පළිසේන යන පුද්ගලයන් සම්බන්ධ බවට සැකකෙරෙන තොරතුරු අනාවරණය වී ඇති බැවින්, ඔවුන් සැකකරුවන් ලෙස නම් කිරීමට ඉඩදෙන මෙන්, රජයේ නීතිඥවරයා අධිකරණයෙන් ඉල්ලා සිටියේය.

කොළඹ කොටුව මහේස්ත්‍රාත්වරිය අර්ජුන් මහේන්ද්‍රන්, අර්ජුන් ඇලෝසියස් සහ කසූන් පළිසේන යන පුද්ගලයින් මහබැංකු බැඳුම්කර සිද්ධියේ සැකකරුවන් ලෙස නම් කිරීමට අවසර ලබා දුන්නේ එම ඉල්ලීම පිළිගනිමිනි.

දැනට සිංගප්පූරුවේ වාසය කරන්නේ යයි සැලකෙන මහබැංකු හිටපු අධිපති අර්ජුන් මහේන්ද්‍රන්ට පෙබරවාරි පහළොස් වනදාට ප්‍රථම ශ්‍රී ලංකාවට පැමිණ රහස් පොලිසිය වෙත කට උත්තරයක් ලබාදෙන නියෝගයක් නිකුත් කරන ලෙසත් රජයේ නීතිඥවරයා ඉල්ලීමක් කළේය.

Image copyright PMDNEWS.LK
Image caption බැඳුම්කර වාර්තාව ජනාධිපතිවරයා අතට

එම ඉල්ලීම පිළිගත් මහේස්ත්‍රාත්වරිය අර්ජුන් මහේන්ද්‍රන්ට ලබන 15 වැනි දිනට ප්‍රථම ශ්‍රී ලංකාවට පැමිණ රහස් පොලිසියට කටඋත්තරයක් ලබා දෙන් ලෙස නියෝග කළාය.

මේ අතර ඊයේ (පෙබරවාරි 01) නීතිපතිවරයා කළ ඉල්ලීම පිළිගත් කොළඹ මහාධිකරණය, පර්පෙචුවල් ට්‍රෙෂරීස් සමාගමේ බැංකු ගිණුම් තහනම් කරමින් නියෝගයක් ද නිකුත් කරනු ලැබ ඇත.

පසුගිය පුවත්:

මේ පුවතට සම්බන්ධ තවත් විස්තර