බොදු බල සේනා සංවිධානයේ මහ ලේකම් ඥානසාර හිමියන්ගේ අභියාචනා ඉල්ලීම ප්‍රතික්ෂේප කරයි

Gnanasara thero's application to appeal Image copyright Getty Images

අධිකරණයට අපහාස කිරීම චෝදනාව යටතේ නියම වූ වසර හයක සිර දඬුවමට එරෙහිව අභියාචනයක් ඉදිරිපත් කිරීමට අවසර ලබා දෙන ලෙස බොදු බල සේනා සංවිධානයේ ලේකම් ගලගොඩඅත්තේ ඥානසාර හිමියන් කළ ඉල්ලීම අභියාචනාධිකරණය ප්‍රතික්ෂේප කර තිබේ.

මෙම නියෝගය ලබා දෙන ලද්දේ අභියාචනාධිකරණය සභාපති විනිසුරු ප්‍රීති පද්මන් සූරසේන සහ ශිරාන් ගුණරත්න යන විනිසුරු මඩුල්ල විසිනි.

අධිකරණයට අපහාස කළ බවට එල්ල වූ චෝදනා හතරකට වරදකරු කෙරුණු බොදුබල සේනා සංවිධානයේ ලේකම් ගලගොඩඅත්තේ ඥානසාර හිමිට අගෝස්තු 8 වෙනිදා වසර 19 ක සිරදඬුවමක් නියම කළ අභියාචනාධිකරණය එකී දඬුවම වසර 6 කින් ගෙවිය යුතු බව නියම කළේය.

එම දඬුවමට එරෙහිව ශ්‍රේෂ්ඨාධිකරණය වෙත අභියාචනයක් ඉදිරිපත් කිරීමට අවසර දෙන මෙන් ඉල්ලා ඥානසාර හිමියන් වෙනුවෙන් පෙනී සිටි ජනාධිපති නීතිඥ රියන්සි අර්සකුලරත්න අභියාචනාධිකරණයට කරුණු දැක්වීය.

එහිදී ජනාධිපති නීතිඥවරයා ඥානසාර හිමියන්ට සිරදඬුවම් නියම කළ තීන්දුවේ තිබෙන නීතිමය දෝෂ තුනක් පිළිබඳ අධිකරණයේ අවධානය යොමු කළේය.

Image copyright Getty Images

මෙම කරුණු මත උන්වහන්සේට අභියාචනයක් ඉදිරිපත් කිරීමට අවස්ථාවක් තිබෙන බව ජනාධිපති නීතිඥවරයා අධිකරණය හමුවේ පැවසීය.

නමුත් නීතිපතිවරයා වෙනුවෙන් පෙනී සිටි නියෝජ්‍ය සොලිස්ටර් ජෙනරාල් රොහාන්ත අබේසූරිය එම ඉල්ලීමට එරෙහිව කරුණු ඉදිරිපත් කළේය.

ඔහු අධිකරණයෙන් ඉල්ලා සිටියේ වගඋත්තරකාර පාර්ශ්වය ඉල්ලා සිටින අභියාචනා ඉදිරිපත් කිරීමට අවසර දීම ප්‍රතික්ෂේප කරන ලෙසය.

දෙපාර්ශවයේ කරුණු සලකා බැලූ අභියාචනාධිකරණ විනිසුරුවරයන් ඥානසාර හිමියන්ගේ ඉල්ලීම ප්‍රතික්ෂේප කරමින් නියෝගයක් නිකුත් කරන ලදී.

මේ තොරතුරුද දැනගන්න:

වරද කුමක්ද?

හෝමාගම අධිකරණයේ හිටපු මහේස්ත්‍රාත්වරයෙකු මෙන්ම වත්මන් කොළඹ ප්‍රධාන මහේස්ත්‍රාත් රංග දිසානායක විසින් අභියාචනාධිකරණයට කරන ලද පැමිණිල්ලකට අනුව නීතිපතිවරයා ඥානසාර හිමියන්ට එරෙහිව චෝදනා පත්‍රය ඉදිරිපත් කර තිබිණි.

එම චෝදනාවලින් සඳහන් කර තිබුණේ, මාධ්‍යවේදී ප්‍රගීත් එක්නැලිගොඩ අතුරුදන් කිරීමට අදාළ නඩුව 2016 වසරේ ජනවාරි මස හෝමාගම මහේස්ත්‍රාත් අධිකරණයේ විභාගයට ගත් අවස්ථාවේදී, අධිකරණ භූමිය තුළ කලහාකාරී ආකාරයෙන් හැසිරීම මගින් අධිකරණයට අපහාසයක් සිදු කිරීම, රජයේ නීතිඥවරුන්ට අපහාසයක් සිදු කර ඇති බවය.

වගඋත්තරකාර ඥානසාර හිමියන් සඳහන් කර තිබුනේ තමන් වහන්සේ එම චෝදනාවලට නිවැරදිකරු බවය.

Image copyright Getty Images
Image caption වසර අටකට ඉහතදී 2010 ජනවාරි 24 වැනි දින ප්‍රගීත් එක්නැලිගොඩ කොළඹ දී අතුරුදහන් විය

ඒ අනුව, දීර්ඝ සාක්ෂි විභාග පැවැති අතර එහිදී පැමිණිල්ල ඉදිරිපත් කළ ප්‍රධාන මහේස්ත්‍රාත් රංග දිසානායක මෙන්ම රජයේ නියෝජ්‍ය සොලිසිටර් ජෙනරාල් දිලීප පීරිස්, පොලිස් සහ බන්ධනාගාර නිලධාරීන් ඇතුළු පාර්ශ්ව ගණනාවක් සාක්ෂි ලබාදී තිබිණි.

මෙම නඩු විභාගයේදී ඥානසාර හිමියන් සාක්ෂි දෙමින් කියා තිබුණේ අධිකරණයට අපහාස කිරීමේ චේතනාවක් තමන් වහන්සේ තුළ නොතිබූ බවයි.

රට බේරා ගත් යුද හමුදා බුද්ධි අංශ නිලධාරින්ට ඇප ප්‍රතික්ෂේප වී රිමාන්ඩ් භාරයට පත්වන අවස්ථාවේදී ඒ පිළිබඳව සංවේදී වීම නිසා මෙම තත්ත්වය උද්ගත වූ බවත් ඒ හරහා තමන් වහන්සේ අධිකරණයට කිසිදු අපහාසයක් සිදු නොකළ බවද නඩු විභාගයේ සාක්ෂි දෙමින් ඥානසාර හිමියන් වැඩිදුරටත් සඳහන් කර තිබිණි.

කෙසේ වෙතත්, පළමු සහ දෙවන චෝදනාවන්ට වසර හතර බැගින් ද, තුන්වන චෝදනාවට වසර හයක් සහ අතර වන චෝදනාවට වසර 5 ක් බැගින් බරපතල සිර දඬුවම් නියම කරන බව සඳහන් කළ අභියාචනාධිකරණ විනිසුරුවරුන් එම සිරදඬුවම් එකවර එනම් වසර හයකින් ගෙවිය යුතු බව නියම කළේය.

තවත් තොරතුරු: