ශ්‍රී ලංකාව සහ සංහිඳියාව: බෞද්ධ හිමිවරු සහ හින්දු පුජකවරයෙක් එක්ව පොංගල් කිරිබත පිසති

සංහිඳියාව සහ එහි ඇති අගය වචනයකට පමණක් සීමා වී ඇති බවට චෝදනා එල්ලවන අවධියක එය ක්‍රියාවෙන් පෙන්නුම් කළ පාසලක් පිළිබඳ අනුරාධපුර කැබිතිගොල්ලෑව ප්‍රදේශයෙන් වාර්තා වේ.

ඒ හින්දු භක්තික දෙමළ ප්‍රජාව නව වසර පිළිගැනීම වෙනුවෙන් පවත්වනු ලබන තෛපොංගල් සැමරුම චාරිත්‍රානුකූලව සිදු කෙරෙන ආකාරය කැබිතිගොල්ලෑව මාධ්‍ය මහාවිද්‍යාලයේ සිංහල මාධ්‍යයෙන් අකුරු කරන දරුවන්ට දැක ගැනීමට අවස්ථාව සැලසීමෙනි.

සිංහල ප්‍රජාවට අයත් දරුදැරියන් දෙදහසක් පමණ කැබිතිගොල්ලෑව මාධ්‍ය මහාවිද්‍යාලයේ ඉගෙනුම ලබති.

හින්දු දින දර්ශනයට අනුව තෙපොංගල් දිනය යනු වර්ෂයේ පළමු දිනයයි.

තෛපොංගල් චාරිත්‍ර ඉටු කිරීම සඳහා පැමිණි එස් චන්ද්‍රකුමාර් කන්නන් හින්දු පූජකවරයා පවසන පරිදි ඔහුට ඒ සඳහා ආරාධනා කර ඇත්තේ විද්‍යාලීය ආචාර්ය මණ්ඩලයේ බෞද්ධ භික්ෂූන්වහන්සේලා විසිනි.

දරුවන් ඉදිරියේ භික්ෂූන් වහන්සේලා සහ හින්දු පූජකවරයා එක්ව පොංගල් කිරිබත සකසන ආකාරය එහිදී දැකගත හැකි විය.

මේ ගැනත් කියවන්න:

"සිංහල දරුවන් දෙදහසක් පමණ ඉදිරියේ සංහිදියාව වෙනුවෙන් පාඩමක් කියාදීමට ලැබීම," සම්බන්ධයෙන් තමන් සතුටට පත්වන බව කන්නන් පූජකවරයා සඳහන් කළේය.

"මම දරුවන්ට හින්දු චාරිත්‍ර අනුව කෝලම් අදින හැටි කියලා දුන්නා, උක් ගස් එල්ලලා පොංගල් කිරිබත් හදන හැටි කියලා දුන්නා, උක් හකුරු දාලා පොංගල් හදන්න විද්‍යාලයේ භික්ෂූන් වහන්සේලා, ගුරු මණ්ඩලය සහ කුඩා දරුවෝ සහභාගි කරගත්තා. ඒක ගැන මට හරිම සතුටුයි."

"කැබිතිගොල්ලෑව කියන්නේ යුද්ධය පැවති කාලයේ මහා විනාශයක් වෙච්ච ප්‍රදේශයක්. එහෙව් ප්‍රදේශයක දරුවන්ට සංහිදියාව හා සමාදානය ගැන එකමුතුකම ගැන කියලා දෙන්න ලැබීම වාසනාවක්," ඔහු වැඩිදුරටත් කියා සිටියේය.

සිය පාසලේ දරුවන් තෛපොංගල් උත්සවය පිළිබඳ නිශ්චිත වශයෙන් දැනුවත් වී නොසිටි බව විද්‍යාලයේ දෙමළ භාෂා ගුරුවරයෙකු වන සුරේන්ද්‍රන් සඳහන් කළේය.

"දරුවෝ තෛපොංගල් කියලා හිතාගෙන හිටියේ ‍කිරිබත් හදලා කනවා කියන එක. මට ඕන වුනා දරුවන්ට හින්දු පාරම්පරික චාරිත්‍ර අනුව පූජවක් තියලා ඒක කියලා දෙන්න. ඒකට විද්‍යාලයේ ආචාර්ය මණ්ඩලයේ ඉන්න බෞද්ධ හිමිවරු මට ලොකු සහයෝගයක් දුන්නා. පොංගල් පාඩමත් එක්කම සහජීවනයේ පාඩමකුත් කියලා දුන්නා."

සබැඳි විෂයයන්

මේ පුවතට සම්බන්ධ තවත් විස්තර