පාස්කු ප්‍රහාරය: වැරදිකරු වෙලා පෙන්ෂන් එකත් නැතුව ගෙදර යනව ද? වරද පිළිගෙන අස්වෙනව ද? ජනපති ඇසුවා -පොලිස්පති

Image copyright Getty Images
Image caption "අනිවාර්යයෙන් ම වැරදිකරු විදිහට ඔබව පත් වෙනවාමයි. ඒක නිසා එහෙම වෙලා ඉවරවෙලා හිටං පෙන්ෂන් එකත් නැතුව ගෙදර යනව ද? එහෙම නැත්නම් වරද පිළි අරගෙන අස්වීම දෙනව ද?"

ශ්‍රී ලංකාවට මරාගෙන මැරෙන බෝම්බ ප්‍රහාරයක් එල්ල විය හැකි බවට තොරතුරු තමන් කල් තියා දැනගෙන සිටි බව පොලිස්පති පුජිත් ජයසුන්දර පිළිගනී.

එම තොරතුරු තමන් මුලින් ම දැන ගත්තේ 2019 අප්‍රේල් 09 වන දා බව ඔහු පැවසීය. ඔහු පවසන ආකාරයට ඒ, ආරක්ෂක අමාත්‍යංශයේ පැවති බුද්ධි තොරතුරු සම්බන්ධීකරණ රැස්වීමකදීය. (ආරක්ෂක මණ්ඩල රැස්වීම නොවේ)

එදින මෙවැනි ප්‍රහාරයක් සම්බන්ධයෙන් යම් කතාබහක් ඇති වූ බව‍ත් ඊට වැඩි අවධානයක් රැස්වීමේදී යොමු නොවූ බවත් පොලිස්පතිවරයා කියා සිටියේය.

පොලිස්පතිවරයා ඒ බව කියා සිටියේ පාස්කු ඉරිදා එල්ල වූ මරාගෙන මැරෙන ප්‍රහාරය සම්බන්ධයෙන් විමර්ශනය කෙරෙන පාර්ලිමේන්තු විශේෂ කාරක සභාව ඉදිරියේ බ්‍රහස්පතින්දා (ජුනි 06) ප්‍රකාශයක් ලබා දෙමින්ය.

ඉහත කී රැස්වීමෙන් අනතුරුව එදින සවස සිය කාර්යාලයට ගිය පසු තමන්ට මරාගෙන මැරෙන ප්‍රහාරයක් සම්බන්ධයෙන් වාර්තාවක් ලැබී තිබූ බවත් එය ජාතික බුද්ධි තොරතුරු මධ්‍යස්ථානයේ ප්‍රධානී සිසිර මෙන්ඩිස් එවා තිබූ බවත් ඔහු පැවසීය.

පොලිස්පතිවරයා පවසන පරිදි එම වාර්තාවේ සඳහන් වී ඇත්තේ, කතෝලික දේවස්ථාන කිහිපයකට සහ ඉන්දීය මහ කොමසාරිස් කාර්යාලයට ප්‍රහාරයක් එල්ල විය හැකි බවය.

Image caption පොලිස්පති පූජිත් ජයසුන්දර සාක්ෂි දෙමින්

එදින ම ඔහුට රාජ්‍ය බුද්ධි තොරතුරු ආයතනයෙන් ද වාර්තාවක් ලැබී තිබිණි.

එම දෙවන වාර්තාවේ ප්‍රහාරය සම්බන්ධයෙන් සාමාන්‍ය තොරතුරු පැවති බවත් තහවුරු කිරීමක් කර නොතිබූ බවත් පූජිත් ජයසුන්දර සඳහන් කළේය.

කෙසේ වෙතත්, තොරතුරුවල වැදගත්කම සලකා එම වාර්තා බලධාරීන් 4 දෙනෙකු වෙත යැවූ බව ඔහු පැවසීය.

එම සිව් දෙනා වන්නේ;

  • බස්නාහිර පළාත් ජ්‍යෙෂ්ඨ නියෝජ්‍ය පොලිස්පති නන්දන මුණසිංහ
  • අපරාධ, සංවිධානාත්මක අපරාධ, මත්ද්‍රව්‍ය නාශක කාර්යාංශය සහ විශේෂ කාර්ය බලකායේ ජ්‍යෙෂ්ඨ නියෝජ්‍ය පොලිස්පති එම්.ආර්. ලතීෆ්
  • ප්‍රභූ ආරක්ෂක අංශයේ නියෝජ්‍ය පොලිස්පති ප්‍රියලාල් දසනායක
  • ත්‍රස්ත විමර්ශන ඒකකයේ අධ්‍යක්ෂ ජ්‍යෙෂ්ඨ පොලිස් අධිකාරී වරුණ ජයසුන්දර

"අවස්ථා තුනකදී ජනපති දැනුවත් කළා"

මීට අමතරව පොලිස් ත්‍රස්ත විමර්ශන කොට්ටාශයේ හිටපු ප්‍රධානී නියෝජ්‍ය පොලිස්පති නාලක සිල්වා ජනාධිපති මෛත්‍රීපාල සිරිසේන වෙත කැඳවාගෙන ගොස් සහරාන් හෂීම් පිළිබඳව දැනුවත් කළ බව ද පූජිත් ජයසුන්දර එහිදී හෙළි කළේය.

"වගකීම භාර ගන්නැයි ජනාධිපති බල කළා"

Image caption පොලිස්පති පූජිත් ජයසුන්දර පාර්ලිමේන්තු තේරීම් කාරක සභාව ඉදිරියේ

පොලිස්පති පූජිත් ජයසුන්දර අනවාරණය කළේ, 2019 අප්‍රේල් 23 වන දා සවස 6.30ට පමණ ජනාධිපති මෛත්‍රීපාල සිරිසේන තමන්ට දුරකතන ඇමතුමක් දී ඔහුව හමුවන ලෙස දැනුම් දුන් බවය.

එදින රාත්‍රී 8ට පමණ ජනාධිපතිවරයා හමුවූ ඔහුට පැවසූ දෙය පූජිත් ජයසුන්දර අනාවරණය කළේය.

"මේ වෙනකොට පරීක්ෂණ කණ්ඩායමක් පත් කරලා තියෙනවා. මොන පරීක්ෂණය කළත් අනිවාර්යයෙන් ම වැරදිකරු විදිහට ඔබව පත් වෙනවාමයි. ඒක නිසා එහෙම වෙලා ඉවරවෙලා හිටං පෙන්ෂන් එකත් නැතුව ගෙදර යනව ද? එහෙම නැත්නම් වරද පිළි අරගෙන අස්වීම දෙනව ද? ඒක තමයි කිව්වේ," ඔහු පැවසීය.

ඕනෑ ම පරීක්ෂණයකින් තමන්ව බේරා ගන්නා බව ජනාධිපතිවරයා පැවසූ බව ද ඔහු පැවසීය.

තමන් එම අවස්ථාවේ මදක් නිහඬව සිට තමන් අවුරුදු 35ක කාලය තුළ කිසිදු වංචාවකට සම්බන්ධ වී නොමැති බවත්, තමන් එසේ කළහොත් සිය පවුලට සිදුවන දේ පිළිබඳවත් කරුණු පෙන්වා දුන් බව ඔහු පැවසීය.

තමන්ට වරද භාර ගන්නා ලෙස සිව් වරක් පමණ බලපෑම් කළ බව ද ඔහු සඳහන් කළේය.

පසුව අප්‍රේල් 25 වන දා තමන්ට දුරකතනයෙන් කතා කර තරමක කෝපයෙන් "තවමත් ලියුමට අත්සන් කළේ නැද්දැයි" විමසූ බවත්, අප්‍රේල් 29 වන දා තමන්ව අනිවාර්ය නිවාඩු යැවූ බවත් පූජිත් ජයසුන්දර පැවසීය.

ඔහු එහිදී පෙන්වා දුන්නේ, වගකීම භාර ගත්තා නම් තානාපති ධූරයක් ලබා ගැනීමට අවස්ථාව තිබුණු අතර පෙර සිටි පොලිස්පතිවරයෙකු එසේ කර තිබුණ ද තමන්ට එය කිරීමට නොසිතුණු බව ඔහු සඳහන් කළේය.

ඔහු අවසානයේ පෙන්වා දුන්නේ, අදාළ මරාගෙන මැරෙන ප්‍රහාරය "ක්‍රමවේදයක් නැතිකම නිසා වෙච්ච වරදක්," බවය.

HE (His Excellency) told me not to tell you.

2018 වසරේ ඔක්තෝබර් මස 23 වන දා පැවති ආරක්ෂක කවුන්සිලය රැස්වීමෙන් අනතුරුව පැවති රැස්වීම් සඳහා තමන් සහභාගි විය යුතු නැතැයි ජනාධිපතිවරයා දැන්වූයේ යැයි ආරක්ෂක අමාත්‍යංශයේ එවක ලේකම් කපිල වෛද්‍යරත්න තමන්ට දැනුම් දුන් බව පොලිස්පති පූජිත් ජයසුන්දර පවසයි.

තමන් ආරක්ෂක කවුන්සිලයේ රැස්වීම්වලින් ඉවත්කර තැබූ බවට පොලිස්පතිවරයා එල්ල කරන චෝදනාව ගැන ජනාධිපති මෛත්‍රීපාල සිරිසේන මෙතෙක් කිසිදු පැහැදිලි කිරීමක් කර නොමැත.

ඒ සම්බන්ධයෙන් පොලිස්පති පූජිත් ජයසුන්දර කාරක සභා සාමාජිකයින් හමුවේ දැක්වූ අදහස් මෙසේය.

පූජිත් ජයසුන්දර:

"ඔක්තෝබර් මාසයේ සිට මට ආරක්ෂක මණ්ඩලයට සහභාගි වෙන්න අවශ්‍ය නැහැ කියන උපදේශය මට ලැබුණා."

ප්‍රශ්නය:

"කාගෙන් ද ලැබුණේ? ලිඛිතව ද? වාචිකව ද?"

පූජිත් ජයසුන්දර:

"වාචිකව ලැබුණා. එවකට ආරක්ෂක අමාත්‍යංශයේ ලේකම්තුමා වශයෙන් හිටියේ කපිල වෛද්‍යරත්න මහත්මයා."

"මට දැනුම් දීමක් කරලා තිබුණේ නැහැ එදා. ඒ නිසා මම විමසීමක් කළා, එතුමාගෙන්. සර් අද ආරක්ෂක කවුන්සිලය තියෙනවා නේද කියලා. ඔව් තියෙනවා කිව්වා. මං කිව්වා දැන් හතර හමාරත් පහුවේගන යනවා, මට නම් තවම දැනුම් දුන්නේ නැහැ කියලා. එතකොට මට දැන ගන්න ලැබුණා එතුමාගේ වචනවලින් ම කිව්වොත්, 'Sorry Pujith, I didn't want to embarrass you. As you ask from me this is what happened. HE (His Excellency) told me not to tell you. (සමාවෙන්න පූජිත්. මට ඔබ අපහසුතාවට පත් කිරීමට අවශ්‍ය වුණේ නැහැ. ඔබ අහපු නිසයි කියන්නේ. HE කිව්වා ඔබට කියන්න එපා කියලා)"

ප්‍රශ්නය:

"HE කිව්වේ කවුද?"

පූජිත් ජයසුන්දර:

"ජනාධිපති මෛත්‍රීපාල සිරිසේන මැතිතුමා."

එහිදී තමන් වෙනුවට තමාගේ නියෝජිතයෙකු හෝ ආරක්ෂක මණ්ඩලයට එවන්න දැයි තමන් ආරක්ෂක ලේකම්වරයාගෙන් විමසූ බවත් එහිදී ලේකම්වරයා "අවශ්‍ය වුණොත් දැනුම් දෙන්නම්" යනුවෙන් පිළිතුරු දුන් බවත් පොලිස්පති පූජිත් ජයසුන්දර අනාවරණය කළේය.

ඉන්පසු තමන් යළි ආරක්ෂක කවුන්සිලයට කැඳවනු ලැබුවේ, පාස්කු ඉරු දින ප්‍රහාරයෙන් පසුව 2019 අප්‍රේල් 23 වන දා බව ඔහු සඳහන් කළේය.

එහිදී අමාත්‍ය සරත් ෆොන්සේකා පැවසුවේ, තමන් හමුදාපති ධූරයේ කටයුතු කළ සමයේ ආරක්ෂක කවුන්සිලය නිශ්චිත දිනයක නිශ්චිත වේලාවකට පැවති අතර ඒ සඳහා කිසිවෙකුට ආරාධනා නොකළ බවය.

එහිදී පොලිස්පති පූජිත් ජයසුන්දර පැවසුවේ, තමන් පොලිස්පතිවරයා ලෙස ඊට සහභාගි වන සමයේ ආරක්ෂක කවුන්සිලය නිශ්චිත දිනයකදී නිශ්චිත වේලාවකට නොපැවති බවය.

එහෙයින්, රැස්වීම පිළිබඳව ආරක්ෂක ලේකම් සාමාජිකයින් දැනුවත් කළ බව ඔහු හෙළි කළේය.

"එන්න එපා කිව්වා නම් ඒ ගැන ක්‍රියා නොකළේ ඇයි?"

මේ අතර, තේරීම් කාරක සභාවේ සාමාජිකයින් පොලිස්පති පූජිත් ජයසුන්දරගෙන් විමසුවේ, ආරක්ෂක කවුන්සිලයේ සාමාජිකයෙකු වූ තමන්ට ඊට නොපැමිණෙන ලෙස දැනුම් දුන් පසු ඒ සම්බන්ධයෙන් ක්‍රියාත්මක නොවූයේ ඇයිදැයි යන්නය.

ඊට පිළිතුරු දෙමින් පූජිත් ජයසුන්දර පැවසුවේ, නිල වශයෙන් තමන් ආරක්ෂක ලේකම්වරයා යටතේ සේවය කරන හෙයින් ඔහු කළ දැනුම් දීම භාර ගැනීම හැර කළ හැකි වෙනත් යමක් නොවූ බවය.

පූජිත් ජයසුන්දරට රාජ්‍ය බුද්ධි තොරතුරු සේවයෙන් (SIS) ලැබුණු වාර්තා:

2019.04.18 - කාත්තන්කුඩි බයිසිකලයක් පුපුරුවා හැරීම පිළිබඳව

2019.04.19 - සහරාන් හෂීම්ගේ ඥාතියෙකු පිළිබඳ තොරතුරු

2019.04.20 - සහරාන් හෂීම්ගේ දරු පවුල පිළිබඳ තොරතුරු

මෙම වාර්තාවල ප්‍රහාරයක් පිළිබඳව කිසිදු නිශ්චිත තොරතුරක් පිළිබඳව සඳහන්ව නොතිබූ බව ඔහු පැවසීය.

දුරකතන ඇමතුමක්

මේ අතර, 2019 අප්‍රේල් 20 වන දා එනම් පාස්කු ඉරු දිනට පෙර දින රාත්‍රී 7ත් 8ත් අතර කාලයේදී රාජ්‍ය බුද්ධි තොරතුරු සේවයේ ප්‍රධානියාගෙන් තමන්ට දුරකතන ඇමතුමක් ලැබුණු බව ඔහු අනාවරණය කළේය.

එම දුරකතන ඇමතුමෙන් ඔහුට දැනුම් දී ඇත්තේ, "Tomorrow will be dangerous. Something can be happened," (හෙට දවස භයානක වෙන්න පුළුවන්. මොනව හරි දෙයක් වෙන්න පුළුවන්.) අනතුරු ඇඟවීම බව පොලිස්පතිවරයා පැවසීය.

ඒ අනුව, ඔහු අදාළ අංශ භාර නියෝජ්‍ය පොලිස්පතිවරුන්ට වහා ම ඒ පිළිබඳව දැනුම් දී අනතුරු අඟවා තිබිණි.

යළිත් පසු දින එනම් ප්‍රහාරය එල්ල වූ දින උදෑසන යළිත් රාජ්‍ය බුද්ධි තොරතුරු සේවයේ ප්‍රධානියා තමන්ට දුරකතනයෙන් අමතා "මොනව හරි දෙයක් වෙන්න පුළුවන්," යනුවෙන් දැනුම් දී තිබිණි.

එහෙත්, එය ප්‍රහාර එල්ල වන ස්ථාන ආදී නිශ්චිත තොරතුරු නොමැතිව කළ දැනුම් දීමක් හෙයින් ප්‍රහාර වැළැක්වීමට ක්‍රියාමාර්ග ගැනීමට නොහැකි වූ බව ඔහු දැනුම් දුන්නේය.

ජනපති අමනාපවීමට හේතුව?

ජනාධිපතිවරයා තමන් සමඟ අමනාපයක් ඇතිකර ගැනීමට හේතුව කුමක්දැයි තේරීම් කමිටුව විසින් පොලිස්පතිවරයාගෙන් ඇසූ තවත් පැනයකි.

ඊට පිළිතුරු දුන් පොලිස්පතිවරයා කියා සිටියේ ඒ පිළිබඳව තමන් හරියටම නොදන්නා බවත් එක්තරා පොලිස් නිලධාරියෙකු වෙනත් සේවා ස්ථානයකට මාරු කර යවන ලෙස ජනාධිපතිවරයා ආරක්ෂක ලේකම්වරයා හරහා බලපෑම් කළ අවස්ථාවක දී තමන් ඊට නොසතුට පළ කිරීම අමනාපයට හේතුවක් විය හැකි යැයි තමන් අනුමාන කරන බවත් ය.

කලකට ඉහත දී තරුණයන් 11 දෙනෙකු අතුරුදහන් වීමේ සිද්ධියක් සම්බන්ධයෙන් ආරක්ෂක මාණ්ඩලික ප්‍රධානියාගේ ද නම සම්බන්ධ වී තිබුණු බවත් ස්ථාන මාරුවක් ලබා දෙන ලෙස බලපෑම් කෙරුණේ එම පරීක්ෂණයට අදාළ නිලධාරියෙකුට බවත් පොලිස්පතිවරයා මෙහිදී හෙළිදරව් කළේය.

කියවන්න: