කන්‍යා පටලය හා කන්‍යාභාවය පිළිබඳ විද්‍යාව සහ මිත්‍යාව
ඡායාරූප මූලාශ්‍රය, Prashanti Aswani
බොහෝ රටවල, 'කන්‍යාභාවය පරීක්ෂාව' එය සිදුකරන ආක්‍රමණශීලී ක්‍රමය හේතුවෙන් 'ඇඟිලි දෙකේ පරීක්ෂණය' ලෙස ද හැඳින්වේ
ශතවර්ෂ ගණනාවක් තිස්සේ කන්‍යා පටලය හෙවත් කුමරිච්ඡදය තදබල පරිනිරීක්ෂණයන්ටත්, බොහෝ සිත් පීඩාවන්ටත් මූලය විය. අප ඒ වටා බැඳී ඇති මිත්‍යාවන්ට තිත තබන්නේ කෙසේ ද?
"මම කන්‍යාවක් ද?" අන්තර්ජාලයේ නාඳුනන්නියකගෙන් ආ පණිවුඩයක් සරාස් සරාස්ගේ ඉන්බොක්ස් එක තුළ විය. ඇය විස්තර කළ පරිදි, ඇය "යෝනි සෙල්ෆියක්" ලද ප්‍රථම අවස්ථාව එය යි. එයට පිළිතුරු දිය යුත්තේ කෙසේදැ යි සරාස් දැන නොසිටියා ය.
එකල සරාස් සමාජ මාධ්‍යන්හි අරාබි භාෂාවෙන් පෙම් සබඳතා හා ලිංගික අධ්‍යාපන දැනුම සපයන "ලව් මැටර්ස්" නම් ෆේස්බුක් පේජයේ ඇඩ්මින්වරියක විය. "එයා කිව්වා එයාට මීට කලින් ප්‍රේම සම්බන්ධයක් තිබිලා තියෙනවා, එයා දැන් [වෙනත් අයෙකු සමග] විවාහ ගිවිසගන්න යනවා කියලා. එයාට ඕනේ වෙලා තිබුණේ එයා කන්‍යාවක් ද කියන එක තහවුරු කරගන්න," සරාස් පැහැදිලි කරයි.
මඳකට කතාව නැවතූ ඇය මුහුණ පුළුටුකර ගත්තා ය. "මට මේ වචනේ පෙන්නන්න බෑ: මෆ්තූහා - එයා ඇහුවා එයා දැන් ඒ ජාතියේ කෙනෙක් ද කියලා, එයා ඇහුවා එයාගේ 'කැඩිලා ද' කියලා."
ඇත්තෙන්ම නාඳුන මෙම තරුණිය අසා තිබුණේ සරාස්ට ඇය එවූ පින්තූරයේ ඇගේ කන්‍යා පටලය දැකිය හැකි ද, එසේ හැකි නම්, එයට "හානියක් සිදුව නැතැ" යි පැවසිය හැකි ද යන්න ය.
විවාහයක දී කාන්තාව කන්‍යාවකව සිටීම ඇගේ සමාජය දැඩි සේ අපේක්ෂා කරන අතර, ඇගේ නව ස්වාමි පුරුෂයා මෙය රුධිර වහනයක් හරහා තහවුරුකර ගැනීමට ද බලාපොරොත්තු වේ.
කන්‍යා පටලය කාන්තාවකගේ ලිංගික ඉතිහාසය සම්බන්ධ භෞතික "සාක්ෂි" සපයනබවට වන මෙම විශ්වාසය කන්‍යාභාව පරීක්ෂාවේ පදනම් තර්කය වෙයි.
මෙය මානව හිමිකම් උල්ලංඝනයක් ලෙස සැලකූ ලෝක සෞඛ්‍ය සංවිධානය 2018 දී මෙම සිරිත හෙළා දුටුවේ ය.
මෙවැනි පරීක්ෂාවන් විවිධාකාරයෙන් සිදුවිය හැකි ය; කන්‍යා පටලය හෝ යෝනියේ ලිහිල්භාවය මැනීම වැනි භෞතික පරීක්ෂාවන්ගේ සිට, මංගල රාත්‍රියෙන් පසු ඇඳ ඇතිරිල්ලේ රුධිරය තැවරී ඇත්දැ යි පරීක්ෂා කිරීම - ඇතැම්විට මනාලිය හා මනාලයාගේ පවුල් එම ඇතිරිල්ල පිරික්සා බැලීම දක්වා මෙවන් පරීක්ෂාවන් ඇදී යා හැකි ය.
මේ සම්බන්ධයෙන් කිසිදු විද්‍යාත්මක සාක්ෂියක් නැතත් - "කන්‍යාභාවය" යනු ජීව විද්‍යාත්මක සත්‍යතාවකින් තොර සමාජ නිර්මාණයක් වුවත් - කාන්තාවකගේ ලිංගික හැසිරීම් ඇගේ කයේ ස්ථිර ලකුණු ඇතිකරනබවත්, එම ලකුණු හරහා ඇගේ ලිංගික ඉතිහාසය කියවාගත හැකිබවත්, සෑම කාන්තාවකගේම පළමු ලිංගික එක්වීමේ දී අනිවාර්යයයෙන්ම රුධිරය වහනය වනබවත් ලොව වටා මිලියන ගණනක් ජනයා දිගින් දිගටම විශ්වාස කරති.
මේ විශ්වාසයන් කිසිවක් සත්‍ය නොවනමුත් - ලොව වටා විවිධ ප්‍රජාවන් අතර විවිධ භාෂාවන්ගෙන්, විවිධ ආගම්වල ඉගැන්වීම් ලෙස ද මෙවන් විශ්වාසයන් පවතිනු දක්නට ලැබේ.
මාගේ "Losing It" නම් පොත ලිවීමේ දී, කන්‍යා පටල මිත්‍යාව වටා "සිතියම් විද්‍යාවක්" ගොඩනැගීමට මම උත්සාහ දැරුවෙමි.
සරාස් වැනි තැනැත්තියන් මේ මාතෘකාව අළලා ඇසූ පැනයන් පෙළගස්වමින්, කොහේ දී කා විසින් එම විශ්වාසයන් අනුමත කෙරුනේ ද, ඒවා පැළපදියම්වීමට හේතුවී ඇත්තේ විද්‍යාත්මක පර්යේෂණවල මඳකම ද යන්න ප්‍රස්ථාරගත කිරීම සිදුකෙරුණි.
මෙහිදී මම මෙම මිත්‍යාව බිඳ දමන බොහෝ විද්‍යාත්මක පර්යේෂණයන් සොයාගතිමි. එනමුත්, ඇතැම් වෛද්‍යවරුන් මෙවන් අදහස් අනුමත කරන, බොහෝ ව්‍යවස්ථාදායක ආයතනයන් මේවා පිළිගෙන ඉදිරියට පවත්වාගෙන යන, ලිංගික අධ්‍යාපනයේ දී කන්‍යා පටලය පිළිබඳ නිවැරදි තොරතුරු ඉගැන්වීම බොහෝකොට සම්පූර්ණයෙන්ම නොසලකා හැරෙන ලෝකයක් ද ඒ සමගම මට හමුවිය.
කන්‍යා පටලයන් එකිනෙකට බොහෝසෙයින් වෙනස්විය හැකි ය
ඡායාරූප මූලාශ්‍රය, Prashanti Aswani
අපගේ කන්‍යා පටලය එකිනෙකට විශාල වශයෙන් වෙනස්විය හැකි ය - ඒවා කෙතරම් ප්‍රයෝජන රහිත ද යත්, ඒවා පරිණාමයවූයේ මන්දැ යි අපි තවමත් නොදනිමු
කන්‍යා පටලය යනු යෝනි විවරය ආසන්නයේ පිහිටන කුඩා, පටලමය පටකයකි. බැලූ බැල්මට අරමුණක් නැති කුඩා පටක කැබැල්ලකට මෙතරම් සාවද්‍ය අරමුණක් ආරෝපණයකර තිබීම ඇත්තෙන්ම ඇදහිය නොහැක්කක් මෙන් පෙනෙයි.
කන්‍යා පටලය පිහිටන්නේ කුමක් සඳහා ද යන්න සම්බන්ධයෙන් විද්‍යාත්මක ප්‍රජාව අතර විවාදයන් පවතියි. එය අපගේ ප්‍රාග් ඓතිහාසික ක්ෂීරපායී ස්වරූපයන් දියෙන් ගොඩබිමට පැමිණි සමයෙන් ඉතිරිව ඇති ශේෂයක් ද? එය පිහිටන්නේ ළදරු අවධියේ දී මල ද්‍රව්‍යයන්හි වෙසෙන බැක්ටීරියාවන් දරුවාගේ යෝනියට ඇතුළුවීමෙන් වළක්වාලීමට ද? කිසිවෙකුත් මේවාට පිළිතුරු නොදනියි.
වෙනත් ඇතැම් ජීවී විශේෂයන් තුළ, කන්‍යා පටලයට වඩාත් වැඩි වගකීමක් පැවරී ඇතිබව පෙනෙන්නට තිබේ - උදාහරණයක් ලෙස, ගිනි පිග් සතුන් ලිංගිකව එක්වන සමයට එළැඹෙන විට උන්ගේ කන්‍යා පටලයන් දියවී යන අතර, එසමය අවසානයේ දී ඒවා නැවත වැඩෙයි. නමුත් අපගේ කන්‍යා පටලයන් එවැනි සාටෝප ක්‍රියාවන් සිදුකිරීමෙහිලා අපොහොසත් ය.
බොහෝදෙනා දරන සාවද්‍ය විශ්වාසයක් වන්නේ කන්‍යා පටලය විසින් යෝනිය "මුද්‍රා තැබෙන" බව යි. නමුදු තත්ත්වය එසේ නම්, කාන්තාවගේ මාසික ඔසප්වීම ද සිදුනොවනු ඇතැ යි යන්න ඔවුනට වැටහෙනබවක් ද නොපෙනේ (කාන්තාවන්ගෙන් කුඩා ප්‍රතිශතයක් සැබැවින්ම මෙම ගැටලුවට මුහුණපානා අතර, කන්‍යා පටලය ඉවත් කිරීමේ සැත්කමකින් එයට පිළියම් කළ හැකි ය).
ඒ වෙනුවට, බොහෝ කන්‍යා පටලයන් වලයාකාර හෝ චන්ද්‍රවංකයක හැඩය ගන්නා අතර, එකිනෙකට බොහෝසෙයින් වෙනස් වන ඝනකම් හෝ තුනී ස්වභාවයක් දරයි. මෙය වයසත් සමග වෙනස්කම්වලට භාජනයවීමේ ඉඩක් ඇතිබවත්, ඇතැම් කාන්තාවන්ට උපතින්ම මෙය නොපිහිටනබවත්, අප ලිංගික පරිණතියට පත්වන වයස වන විට එය ස්වාභාවිකවම අතුරුදන්ව ගොස් තිබීමේ වියහැකියාවක් ඇතිබවත් දන්නේ කාන්තාවන්ගෙන් සුළු ප්‍රතිශතයක් පමණි.
ව්‍යා‍යාමයේ යෙදීමේ සිට ස්වයං වින්දනයේ හෝ ලිංගික ක්‍රියාකාරකම්හි නියැලීම දක්වා විවිධාකාරයේ ක්‍රියාකාරකම් බොහොමයකින් එය ඇදී යෑමට හෝ ඉරී යෑමට හැකිවගත් බොහෝදෙනා නොදනිති.
නමුත් කන්‍යා පටල පරීක්ෂාවක් හරහා කාන්තාවකගේ ලිංගික ක්‍රියාකාරකම්හි ඉතිහාසය නිශ්චයකර ගැනීමට හැකි ය යන අදහසෙහි කිසිදු වලංගුභාවයක් ඇතැ යි මින් අදහස් නොවේ.
නිදසුනක් ලෙස, 2004 දී ගර්භනී යෞවනියන් 36 දෙනෙකු අළලා සිදුකරන ලද කුඩා අධ්‍යයනයකින් හෙළි කෙරුණු පරිදි, "පුරුෂ ලිංගයක් යෝනිය තුළට ඇතුළු කළබවට නිශ්චිත සාක්ෂි" වෛද්‍ය කාර්යය මණ්ඩලයට හමුවූයේ ඉන් යෞවනියන් දෙදෙනෙකුගේ පමණකි.
යෞවනෝදයේ පසුවන ලිංගිකව ක්‍රියාකාරී දැරියන් පිරිසක් සහභාගී වූ 2004 දී පළකෙරුණු තවත් අධ්‍යයනයකින් පෙන්වා දුන්නේ, ඔවුන්ගෙන් 52%කගේම පමණ "කන්‍යා පටලයට කිසිදු හඳුනාගත හැකි වෙනසක් සිදුව නැති" බව යි.
ලිංගිකව ක්‍රියාකාරී කාන්තාවකට දෘශ්‍යමාන කන්‍යා පටලයක් නැති අතර, ලිංගිකව අක්‍රීය කාන්තාවන්ට පමණක් අනිවාර්යයයෙන්ම කන්‍යා පටලයක් පිහිටන්නේ ය යන ද්විමය අදහස එනිසා කිසිසේත්ම සත්‍ය නොවේ.
ඇඳ ඇතිරිල්ලේ "ජපන් කොඩිය"
කන්‍යාභාවය මැනීමේ උපක්‍රමයක් ලෙස ලංකාව ද ඇතුළුව ලොව පුරා භාවිතා කෙරෙන ඇඳ ඇතිරිල්ලේ රුධිර පැල්ලම් සෙවීමේ පරීක්ෂාව ද අසත්‍ය දැනුම මත පදනම්වූවකි.
ඇතැම් කන්‍යා පටල ප්‍රථමවරට ඇදීමට ලක්කෙරෙන අවස්ථාව හදිසියේ සිදුවූයේ නම් හෝ, කාන්තාව අවශ්‍ය තරම් ඉහිල්ව, සන්සුන්ව නොසිටියේ නම් හෝ රුධිර වහනයක් ඇතිවීමේ ඉඩක් පැවතිය ද, වඩාත්ම ප්‍රායෝගිකව සිදුවිය හැකි දෙය වන්නේ බලහත්කාරයෙන් ලිංගිකව එක්වීම හෝ යෝනි මාර්ගය ස්නේහනය නොවීම නිසා යෝනි බිත්තියට සිදුවන ඉරීම් හේතුවෙන් රුධිරය වහනයවීම යි.
ඕනෑම වරක ලිංගිකව එක්වන විට රුධිරය වහනය විය හැකිවා හෝ නොවිය හැකි ආකාරයටම, පළමුවර ලිංගිකව එක්වීමේ දී ද රුධිර වහනය සිදුවීමට හෝ නොවීමට හැකි ය.
ලිංගිකව එක්වීමේ දී රුධිරය වහනය වීමට හේතූන් ලෙස නොසන්සුන්බව, කාන්තාව පූර්ණ ලෙස උත්තේජනය වී නොසිටීම හෝ, ආසාදන වැනි තත්ත්වයන් උග්‍ර අතට හැරීම ආදිය ගෙනහැර දක්විය හැකි ය.
එක් ප්‍රසව වෛද්‍යවරියක සිය රැකියා සගයින් 41 දෙනෙකුගෙන් ඔවුන් පළමුවරට ලිංගිකව එක්වූ විට රුධිරය වහනය වී ද, නොවීදැ යි අසමින් සමීක්ෂණයක් සිදුකළ අතර, ඔවුන්ගෙන් 63%ක් ප්‍රකාශ කළේ එසේ රුධිර වහනයක් සිදු නොවූබව යි.
ඡායාරූප මූලාශ්‍රය, Prashanti Aswani
බොහෝ සංස්කෘතීන් තුළ, ඇඳ ඇතිරිල්ල මත රුධිර පැල්ලමක් ඉතිරිවීම කාන්තාවකගේ කන්‍යාභාවය නැතිවීමේ සලකුණකි - නමුත් එක් සමීක්ෂණයකින් හෙළිවූයේ මෙය කාන්තාවන් දසදෙනෙකුගෙන් සයදෙනෙකුටම සිදු නොවන්නක්බව යි
නමුත් දිගින් දිගටම කන්‍යාභාවයට ඉහළ වටිනාකමක් ලබා දෙන, කාන්තාවන්ගේ ලිංගිකත්වය පාලනය කිරීමට උත්සාහ දරනා රටවල මෙම ජීව විද්‍යාත්මක සූක්ෂ්මතාවට කිසිදු අවසරයක් නැත.
තුර්කියේ ඩිච්ලේ විශ්වවිද්‍යාලයය විසින් 2011 දී සිදුකෙරුණු අධ්‍යයනයකින් සොයාගැනුනේ සිසුවියන්ගෙන් 72.1%කුත්, සිසුන්ගෙන් 74.2%කුත් කන්‍යා පටලය යමෙකුගේ කන්‍යාභාවය සංකේතවත් කරතැ යි සිතා සිටිබව යි; සිසුහුගෙන් 30.1%ක් විවාහ මංගල දිනයේ දී "ලේ පැල්ලම් සහිත ඇඳ රෙද්ද" පවුලට පෙනෙන සේ ප්‍රදර්ශනය කළ යුතුයැ යි ප්‍රකාශ කළහ.
මෙය ධනාත්මක ලිංගික සෞඛ්‍යයට ප්‍රවේශවීමට කාන්තාවන්ට ඇති හැකියාව කෙරෙහි ප්‍රබල බලපෑමක් ඇතිකළ හැකි අතරම, ඔවුන් සිය ලිංගික අනන්‍යතාව ගවේශනය කිරීමෙන් වළකා, ලිංගිකත්වය පිළිබඳ කාංසාවක් ඔවුන් තුළ ඇති කරයි.
ඊජිප්තුවේ ගීසාහි දී සිදුකෙරුණු සමාජ අධ්‍යයනයකින් හෙළිවූයේ කන්‍යාභාවය සහ කන්‍යා පටලය පිළිබඳව එරට පැතිර ඇති අදහස් නිසා, අධ්‍යයනයට සහභාගී වූ බොහෝ කාන්තාවන් සිය මංගල රාත්‍රියට පෙර කාංසාව සහ චකිතයත්, මංගල රාත්‍රියේ දී සහ ඉන්පසුව වේදනාව සහ භීතියත් අත්විඳ ඇතිබවකි.
2013 වසරේ සිට ලෙබනන් විශ්වවිද්‍යාල ශිෂ්‍යයන් සම්බන්ධයෙන් සිදුකෙරුණු සමීක්ෂණයක දී, සම්මුඛ පරීක්ෂණයට ලක්වූ කාන්තාවන්ගෙන් 43%කට ආසන්න ප්‍රමාණයක් කියා සිටියේ තම මංගල රාත්‍රියේ දී රුධිරය වැගිරෙනු නැතැ යි යන බිය නිසා තමන් විවාහයට පෙර ලිංගිකව එක් නොවනබව යි.
2017 වසරේ ලෙබනනයේ දී සිදුකෙරුණු තවත් අධ්‍යයනයක් හරහා සම්මුඛ පරීක්ෂණයට ලක්කෙරුණු කාන්තාවන් 416 දෙනෙකුගෙන් 40%ක් පමණම, විවාහය සඳහා තම කන්‍යා පටලය ආරක්ෂාකර ගැනීමේ අරමුණින් ගුද හෝ මුඛ සංසර්ගයේ යෙදුනුබව වාර්තා විය.
මගේ පර්යේෂණයේ දී, ස්වයං වින්දනයේ යෙදීමෙන් සිය කන්‍යා පටලයට හානිවීයැ යි බියට පත්වූ හෝ, එසේ කිරීමෙන් කන්‍යා පටලයට හානිවේයැයි ඇති අධික බිය නිසාවෙන් එම ප්‍රදේශය ඇල්ලීමෙන් පවා වැළකුණු අසංඛ්‍යාත කාන්තාවන්ගේ ඔන්ලයින් පෝස්ටු මට හමුවිය.
වෛද්‍යමය මිත්‍යා
කන්‍යා පටල මිත්‍යාව කාන්තාවන්ගේ ලිංගික යහපැවැත්මට සහ සමානාත්මතාවට පමණක් බලපාන්නක් නොවේ - එය ඔවුන්ට යුක්තිය සඳහා ඇති ප්‍රවේශයට ද බාධාවක් විය හැකි ය.
බරපතල ලිංගික අඩත්තේට්ටමට ලක්වූ කාන්තාවන්ගේ කන්‍යාභාවය අධිකරණ කටයුතු සඳහා පරීක්ෂා කිරීමේ පිළිවෙත පාකිස්ථානය විසින් අහෝසි කෙරුනේ ඉතා මෑතක දී ය; තවත් රටවල් කීපයක් - බොහෝකොටම ආසියාවේ, මැද පෙරදිග, හා උතුරු සහ දකුණු අප්‍රිකාවේ - තවමත් එම පරීක්ෂාවන් සිදුකරයි.
එසේම, ලොව පුරා බොහෝ වෛද්‍යවරු විවාහයට පෙර ලිංගිකව හැසිරී ඇති, එය අනාවරණයවීමෙන් ඇතිවන ප්‍රතිවිපාකයන්ට බියෙන් පසුවන කාන්තාවන් සඳහා, ලාභ උපදවන කන්‍යා පටල අලුත්වැඩියාව ශල්‍යකර්මයක් ලෙස ඉදිරිපත් කරති.
මම පොත ලිවීමෙහි යෙදී සිටිය දී ලන්ඩනයේ ශල්‍යවෛද්‍යවරයෙකු වෙත ඊමේලයකින් ලියා කන්‍යාභාව පරීක්ෂාව පිළිබඳව විමසීමි (මේ, 2022 ජනවාරියේ දී දේශපාලකයින් විසින් එක්සත් රාජධානිය තුළ මෙම ක්‍රියාව නීති විරෝධීබවට පත්කිරීමට වසරකට පෙර ය).
ඔහුගේ සහායකයා මා හා පවසා සිටියේ මට කන්‍යා පටලයක් තිබේ නම්, පවුම් 300ක් (රු. 135 000කට වැඩි මිළක්) ගෙවීම මඟින් හානි නොවූ කන්‍යා පටලයක් ඇතිබවට තහවුරු කෙරෙන වෛද්‍ය වාර්තාවක් ලබාගැනීමට මට හැකිබව යි. මට කන්‍යා පටලයක් නොතිබේ නම්, පවුම් 5400ක් (රු. මිලියන 2.4කට අධික මිළක්) ගෙවීමෙන් කන්‍යා පටලය අලුත්වැඩියා කරනා සැත්කමක් සිදුකරගත හැකි අතර, ඉන්පසු පෙරකී වාර්තාවම මා වෙත ලබාදෙනු ඇත.
එකල එක්සත් රාජධානිය තුළ කන්‍යා පටල අලුත්වැඩියාව තහනම් කිරීමේ නීතිය පාර්ලිමේන්තුව මඟින් සම්මත කිරීමේ ක්‍රියාවලිය සිදුකෙරෙමින් පැවැති නිසා, ඇතැම් ශල්‍යවෛද්‍යවරුන් අවසාන මොහොත දක්වාම එක්සත් රාජධානි භූමිය තුළ මෙම සේවාව ලබාදීමට අදිටන්කර සිටිබව පැහැදිලි ය.
ලන්ඩනයේ එක්තරා ශල්‍ය වෛද්‍යවරයෙකු අන්තර්ජාල මාධ්‍යයන් හරහා තවමත් ප්‍රකාශ කරමින් සිටින්නේ කන්‍යා පටල අලුත්වැඩියාව "ලිංගිකව එක්වීම හෝ දැඩි ශාරීරික ක්‍රියාකාරකම් නිසාවෙන් යෝනියට හානි සිදුවූ කාන්තාවන්ට ප්‍රයෝජනවත්" විය හැකිබව යි (සැබැවින්ම, කන්‍යා පටලයෙන් කිසිදු ජීව විද්‍යාත්මක ඵලප්‍රයෝජනයක් නොමැති නම්, එම ප්‍රදේශයේ සිදුකරන ශල්‍යකර්මයක ප්‍රයෝජන කිම?).
ලොව පුරා සායන වෙබ් අඩවිවල ද වෛද්‍යමය මිත්‍යාවන් යෙහෙන් වැජඹේ. "කන්‍යා පටල අලුත්වැඩියාව සිදුකෙරෙන්නේ රෝගියාට ඇගේ කන්‍යාභාවය නැවත ලබාදීමට යි," එක් ලෙබනන ජාතික ශල්‍යවෛද්‍යවරයෙකු පවසයි. නිව් යෝක්වාසී වෙනත් වෛද්‍යවරයෙකු පවසන්නේ "කන්‍යා පටල අලුත්වැඩියාව යනු කන්‍යා පටලය එහි මුල් 'කන්‍යා' ස්වභාවයට ප්‍රතිෂ්ඨාපනය කිරීම" බව යි.
කන්‍යා පටල මිත්‍යාව අවසන් කරන්නේ කෙසේ ද?
කන්‍යා පටල මිත්‍යාව අළලා සිදුකෙරුණු අධ්‍යයනයන් වෙත සමාජයේ අවධානය යොමුකරවීමත්, කන්‍යාභාවය සම්බන්ධ පරීක්ෂණයන් අනුමත කරන නීතිමය භාවිතයන් වෙනස් කිරීමත්, සෞඛ්‍ය සේවා වෘත්තිකයන් විසින් ජනතාව නොමඟ යෑම වැළැක්වීමත් ආරම්භයක් වනු ඇත.
ගැටලුව වන්නේ මෙවන් අදහස් බොහොමයක් පරම්පරා ගණනාවක් තිස්සේ ජන මනසට කාවැදී තිබීම පමණක් නොව; ඒවා ඊට අදාළ නොවන හෝ අවිද්‍යාත්මක අදහස්වලින් ද සහාය ලැබීම යි.
ඔබ කන්‍යාභාවය පිළිබඳ සංස්කෘතික අදහස විශ්වාස කරන්නේ නම්, ඒ පිටුපස ඇති ලිංගික අසමානතාවට සහාය දක්වන්නේ නම්, ඔබ වෙනත් ආකාරයකට සිතීමට පෙළඹවීම සඳහා සමාජය උඩුයටිකුරු කරවන සමාජයීය වෙනසක් සිදුවිය යුතු ය.
ඇතැමුන් විශ්වාස කරන පරිදි මෙම මිත්‍යාව සහමුලින්ම අවසන්කර දැමීමේ එක් ක්‍රමයක් නම් කන්‍යාපටලයේ නම වෙනස් කිරීම යි. සිංහල මෙන්ම අරාබි සහ චෙක් වැනි බොහෝ භාෂාවන්හි මෙම පටකය "කන්‍යා පටලය" යන අරුත් දෙන වදනකින් හඳුන්වන නිසා, මෙය දක්ෂ අදහසක් සේ පෙනෙයි.
ඡායාරූප මූලාශ්‍රය, Prashanti Aswani
'යෝනි කිරීටය' (vaginal corona) වැනි විකල්ප නාමයක් භාවිතා කිරීම, මේ හා බැඳි වැරදි වැටහීම් වෙනස්කිරීම සහායකි
පර්යේෂණයන් මඟින් හෙළිව ඇත්තේ මෙවන් අදහස් වෙනස් කිරීමෙහිලා කන්‍යා පටලයේ නම වෙනස් කිරීම ඇත්ත වශයෙන්ම සාර්ථක විය හැකිබව යි.
2009 දී, ස්වීඩනයේ ලිංගිකත්ව අධ්‍යයනය පිළිබඳ සම්මේලනය ස්වීඩන භාෂාවෙන් "කන්‍යා පටලය" යන අරුත් දුන් 'මෝඩොම්සිනා' යන වදන, "යෝනි කිරීටය" යන අරුත් දෙන 'ස්ලිඩ්ක්‍රාන්ස්' ලෙස වෙනස් කළේ ය.
ඔවුන් මේ නව යෙදුම සෑම තැනක දීම භාවිතා කිරීම ඇරඹීය; ලිංගික සෞඛ්‍ය සේවාවලින් නිකුත්කරන අත්පත්‍රිකා, පුවත්පත්, ස්වීඩනයේ නිල භාෂා සැලසුම් මණ්ඩලය, සහ ලිංගිකත්ව අධ්‍යයන සම්මේලනයේ සියලු ඉදිරි සන්නිවේදනයන් සඳහා මෙම යෙදුම භාවිතා කෙරිණි.
මේ වෙනස්කමින් වසර 10ක් පමණ ගෙවීගිය තැන, පර්යේෂණයකට සහභාගී වූ සෞඛ්‍ය වෘත්තිකයින්ගෙන් 86%ක්ම සිය සායනයන්හි දීත්, දේශනවල දීත් "යෝනි කිරීටය" යන නව වදන භාවිතා කරනාබැව් පර්යේෂිකා කැරින් මිල්ස් සොයාගත්තා ය.
මේ නව වදන අසා තිබුණේ යෞවනයින්ගෙන් 22%ක් පමණක් වුව ද, කන්‍යා පටලය එහි සාම්ප්‍රදායික පීතෘමූලික අර්ථයෙන් දකින ලක්ෂණ පෙන්වූයේ ඔවුන්ගෙන් ඉතා සුළු පිරිසකි. ඉන් වැඩිදෙනා (නව වදන භාවිතා නොකළ ද) ලිංගිකත්ව අධ්‍යයන සම්මේලනයෙන් නිකුත් කෙරෙන විස්තර පත්‍රිකාවන්හි අඩංගු ලිංගික-ධනාත්මක වාක්ශෛලිය එලෙසින්ම භාවිතා කරන්නන් වූහ. නව වදන දත් සුළුතරයෙන් වැඩි පිරිසක් ද 'මෝඩොම්සිනා' විස්තරකර සිටියේ මිත්‍යාවක් ලෙසිනි.
අනෙකුන් "එවැන්නක් නොපවතින්නේයැ"යි සෘජුවම ප්‍රකාශ කළේ ය. බොහෝ දෙනා පෙන්වා දුන්නේ එය පැරණි අදහසක්, එසේත් නැති නම් තමා අතීතයේ දී හෝ කුඩාකල දී හෝ එය මිත්‍යාවක්බව වෙනෙකෙකු විසින් තමා දැනුවත් වන්නට පෙර හෝ විශ්වාස කළ සංකල්පයක් ලෙස ය.
එක රැයකින් නොකළහැකි නමුත්...
ඉංග්‍රීසි කතාකරන ලෝකයේ බොහෝ ලිංගික අධ්‍යාපනඥයෝ ඉංග්‍රීසිය ද "යෝනි කිරීටය" යන වදනට මාරු වියයුතුයැ යි විශ්වාස කරති. කන්‍යා පටලය සඳහා වන ඉංග්‍රීසි වචනය (hymen) පැමිණෙන්නේ පුරාණ ග්‍රීක දෙවියෙකු වන 'හයිමන්' (විවාහයේ දෙවියා) ගෙනි.
කන්‍යා පටලය වටා බැඳී ඇති මිථ්‍යාවන් එම වචනය මත නොමැකෙන කැළැලක් ඉතිරිකර තිබේ. නමුත් ස්වීඩනය සාර්ථකත්වයට පැමිණියේ ඔවුන් වචනයක් පමණක් වෙනස් කිරීමෙන් නොනැවැතීම නිසාවෙනි; තමා එම වචනය වෙනස් කරන්නේ මන්දැ යි ඔවුහු තරුණයින්ට සහ වෛද්‍ය වෘත්තිකයන්ට පැහැදිලිකර දුන්හ.
ලොව පුරා රජයයන් කන්‍යාභාවය පරීක්ෂා කිරීම හා කන්‍යා පටලය අලුත්වැඩියා කිරීම වැනි පිළිවෙත් තහනම් කිරීමට උනන්දුවක් දක්වනබව දක්නට හැකි බැවින්, මෙම තහනමට බලපෑ හේතූන් පන්ති කාමර සහ දේශන ශාලා වෙත ගෙනයෑම ද නුවණට හුරු ය. එයාකාරයෙන්, මෙම භයානක මිථ්‍යාවන් නැවත කිසිදා මතුවීම මැඬලීමට අපට හැකිවනු ඇත.
මෙම ලිපිය Losing It: Sex Education for the 21st Century ([කන්‍යාබව] අහිමිවීම: 21 වැනි සියවසට ලිංගික අධ්‍යාපනය) නම් පොත ආශ්‍රයෙන් ලියූවකි. එහි රචක, මාධ්‍යවේදිනී සොෆියා ස්මිත් ගේලර් @sophiasgaler යන නමින් ට්විටර් වෙබ් අඩවිය හරහා සම්බන්ධකර ගත හැකි ය.
