අතුරුදහන් කොමිසම යාපන සාක්ෂි විභාගය අරඹයි

Image caption අතුරුදහන් වූවන් වැඩිම ප්‍රමාණය වාර්තා වී තිබෙන්නේ යාපනය දිස්ත්‍රික්කයෙන්

තමාත් දරුවන් දෙදෙනාත් ඉදිරියේ 2009 දී හමුදාවට භාර වූ සිය ස්වාමිපුරුෂයා එක් වතාවක් දැක ගන්නට ලැබුණු නමුත් ඉන් අනතුරුව ඔහු අතුරුදහන් වී සිටින බව එල්ටීටීඊ වෛද්‍ය ඒකකයේ ප්‍රධානී රේගන්ගේ බිරිඳ ප්‍රකාශ කරයි.

උතුරු නැගෙනහිර ප්‍රදේශවල අතුරුදහන් වූවන් පිළිබඳව විමසා බලන ජනාධිපති කොමිෂන් සභාව යාපනයේ සාක්ෂි විමසීම ආරම්භ කළ අවස්ථාවේ සාක්ෂි දෙමිනුයි ඇය ඒ බව කියා සිටියේ.

Image caption එල්ටීටීඊය විසින් සිය 15 හැවිරිදි පුතා පුදුමාතලන්හිදී බලහත්කාරයෙන් බඳවා ගත් බව පියා පවසයි

හමුදාවට භාර වීමෙන් අනතුරුව ඕමන්තේදී ජ්‍යෙෂ්ඨ හමුදා නිලධාරියකු ඔහුගෙන් ප්‍රශ්න කළ බවත් ඉන් අනතුරුව තමන්ට ඔහු දැකගන්නට නොලැබුණු බවත් රේගන් ගේ බිරිඳ තුලසිහා කොමිසම ඉදිරියේ කියා සිටියාය.

සිකුරාදා යාපනයේ සාක්ෂි විභාගය ආරම්භ කළ කොමිසම ලබන දාහත් වැනි දින දක්වා චාවකච්චේරි, කෝපායි සහ යාපනයේදී සාක්ෂි විමසීමට නියමිතයි.

1990 සහ 2009 යන කාලය තුළ උතුරු නැගෙනහිර ප්‍රදේශවලින් පැහැර ගෙන ගිය හෝ අතුරුදහන් වූ හෝ පුද්ගලයන් ගැන සොයා බලන කොමිසමට අතුරුදහන් වූවන් වැඩිම ප්‍රමාණය වාර්තා වී තිබෙන්නේ යාපනය දිස්ත්‍රික්කයෙන් බව කොමිසමේ ලේකම් එච්ඩබ්ලිව් ගුණදාස ප්‍රකාශ කළේය.

එය පැමිණිලි හාර දහසකට ආසන්න සංඛ්‍යාවක්.

අතුරුදහන් වූ සිය සැමියන් හෝ ඥාතීන් ගැන තොරතුරක් සොයා ගැනීමේ අටියෙන් කාන්තාවන්, වියපත් පුරුෂයන් ඇතුළු විශාල පිරිසක් සාක්ෂි දීම පිණිස පැමිණ සිටි බවයි, බීබීසී යේ කොළඹ වාර්තාකරු චාල්ස් හැවිලන්ඩ් යාපනයේ සිට වාර්තා කරන්නේ.

සිය ඥාතීන් අතුරුදහන්වීම සම්බන්ධයෙන් ආණ්ඩුව වගකිවයුතු බව ඇතැම් ඥාතීන් ප්‍රසිද්ධියේම චෝදනා කළ නමුත්, තමන්ට එල්ල වන චෝදනා ආණ්ඩුව ප්‍රතික්ෂේප කරයි.

මේ පුවතට සම්බන්ධ තවත් විස්තර