ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

බොදු බල සේනාවට අධිකරණයෙන් අවවාද

අධිකරණ භූමිය තුල නීතිවේදීන්ට තර්ජනය කිරීමෙන් සහ ගැටුම් ඇති කර ගැනීමෙන් වළකින මෙන් කොටුව මහේස්ත්‍රාත්වරයා බොදු බල සේනා සංවිධානයේ භික්ෂුන් වහන්සේලාට අවවාද කර තිබේ.

ශුද්ධ වූ කුරානයට අපහාස කිරීම සහ ජාතික බල සේනා සංවිධානයේ මාධ්‍ය සාකච්ඡාවට බාධා කිරීම යනාදී චෝදනාවලට අදාළව පැමිණිලි කැඳ වූ අවස්ථාවේදීයි එම සංවිධානයේ ලේකම් ගලගොඩ අත්තේ ඥානසාර හිමි ඇතුළු භික්ෂූන් වහන්සේලාට අධිකරණය විසින් මෙසේ අවවාද කරනු ලැබුවේ.

ඉදිරියේදී මෙවැනි පැමිණිලි ඉදිරිපත් වූවොත් දැඩි ක්‍රියාමාර්ග ගැනීමට සිදු වන බවට මහේස්ත්‍රාත්වරයා අනතරු අඟවා සිටි බවයි අගතියට පත් පාර්ශවය වෙනුවෙන් පෙනී සිටි නීතිවේදි මෛත්‍රී ගුණරත්න මාධ්‍යවලට කියා සිටියේ.

තර්ජනයක්

‘පසුගිය නඩු වාරයේ නඩුව අවසන් වී පිටතට පැමිණි ගලගොඩ අත්තේ ඥානසාර හිමි මා වෙත තර්ජනයක් කළා. ඒ පිළිබඳ මම පොලිසියට පැමිණිල්ලක් කළා. ඒ සම්බන්ධයෙන් පරීක්ෂණයක් පවත්වා වාර්තාවක් ඉදිරිපත් කරන මෙන් මහේස්ත්‍රාත්වරයා පොලිසියට නියම කළා’ යයි නීතිවේදි මෛත්‍රී ගුණරත්න පැවසුවේය.

‘නීතිවේදීන් උසාවියට සහාය වන නිලධාරීන් බව ප්‍රකාශ කල මහේස්ත්‍රාත්වරයා ඕනෑම නීතිවේදියකුට මතයක් දැරීමේ අයිතියක් තිබෙන බව කියා සිටියා.’ යයි නීතිඥ මෛත්‍රී ගුණරත්න වැඩි දුරටත් පැවසීය.

කුරානය

පොලිසිය අධිකරණයට වාර්තාවක් ඉදිරිපත් කරමින් කියා සිටියේ මෙම නඩුවලට අදාළ සිදුවීම් පිළිබඳ දර්ශන ඇතුළත් සංයුක්ත තැටිවල අඩංගු දත්ත වල නිරවද්‍ය භාවය පිළිබඳ සොයා බැලීම සඳහා මොරටුව විශ්ව විද්‍යාලය වෙත යොමු කර වාර්තාවක් ලබා ගැනීමට තීරණය කර ඇති බවයි.

ඒ අනුව අදාළ පැමිණිලි ලබන සැප්තැම්බර් මස පළමු වනදා කැඳවීමට නියම කල මහේස්ත්‍රාත් තිලින ගමගේ එදිනට පරීක්ෂණවල ප්‍රගතිය දැක්වෙන වාර්තාවක් ඉදිරිපත් කරන මෙන් පොලිසියට නියම කළේය.

නඩු විභාගය අවසන් වීමෙන් පසුව අදහස් දැක්වූ බොදු බල සේනා සංවිධානයේ ලේකම් ගලගොඩ අත්තේ ඥානසාර හිමියන් කියා සිටියේ කවර ආකාරයේ බාධක පැමිණියත් කුරානය පිළිබඳ තමා විසින් දක්වන අදහස් නතර නොකරන බවයි.