සංගක්කාර දොන් බ්‍රැඩ්මන්ට ලං වෙයි

Image copyright AFP Getty Images

ශ්‍රී ලංකා ක්‍රිකට් කණ්ඩායමේ සුපිරි පිතිකරු, හිටපු නායක කුමාර් සංගක්කාර තවත් ද්විත්ව ශතකයක් වාර්තා කරමින් ජාත්‍යන්තර ක්‍රිකට් වාර්තා අතර තවත් කඩයිමක් සනිටුහන් කළේය.

පාකිස්තානයට එරෙහිව ගාල්ලේ පැවැත්වෙන ටෙස්ට් තරඟයේ හතරවැනි දිනයේ කුමාර් සංගක්කාර රැස් කළ මුළු ලකුණු සංඛ්‍යාව 221 කි.

ඒ සමඟ ටෙස්ට් ක්‍රිකට් පිටියේ සංගක්කාර වාර්තා කර ඇති ද්විත්ව ශතක සංඛ්‍යාව දහයකි.

ටෙස්ට් ක්‍රිකට් පිටියේ ද්විත්ව ශතක ලාභීන් හැටියට කුමාර් සංගක්කාරට ඉදිරියෙන් දැන් සිටින්නේ ක්‍රිකට් ලෝකයේ අනභිභවනීය ක්‍රීඩකයා ලෙස පුද ලබන දොන් බ්‍රැඩ්මන් පමණි.

දොන් බ්‍රැඩ්මන් ලබා ඇති ටෙස්ට් ක්‍රිකට් ද්විත්ව ශතක සංඛ්‍යාව දොළහකි.

මෙතෙක් එම වාර්තාවට සමීපව සිටි බටහිර ඉන්දීය සුපිරි පිතිකරු බ්‍රයන් ලාරා ද්විත්ව ශතක නවයක් ලබා ඇති අතර ඔහුත් පසු කරමින් දොන් බ්‍රැඩ්මන් කරා ලංවීමට කුමාර් සංගක්කාර සමත්ව සිටියි.

කුමාර් සංගක්කාර විසින් තබන ලද නව වාර්තාව සම්බන්ධයෙන් බීබීසී සංදේශයට අදහස් දක්වමින් ප්‍රවීණ ක්‍රිකට් ක්‍රීඩා විස්තර විචාරක රොෂාන් අබේසිංහ සඳහන් කළේ, ද්විත්ව ශතකයක් වාර්තා කිරීම ක්‍රිකට් ක්‍රීඩකයකුට දුෂ්කර ක්‍රියාවක් වන නමුත් සංගක්කාර ඉතා අලංකාර පිති හරඹයක නිරත වූ බවයි.

මේ පුවතට සම්බන්ධ තවත් විස්තර