ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

පාකිස්ථාන අනාථයන් පිටුවහල් කිරීමට අවසර

ශ්‍රී ලංකාව තුළ රැඳී සිටින පාකිස්ථානු ජාතික සරණාගතයින් පිටුවහල් කිරීම වළක්වාලමින් පනවා තිබූ අතුරු තහනම් නියෝගයක් ඉවතලීමට අභියාචනාධිකරණය තීරණය කරයි.

සිය රටට පිටුවහල් කරනු ලැබුවොත් තම ජීවිතයට අනතුරු සිදු විය හැකි බව පවසමින් පාකිස්ථානු ජාතිකයන් පිරිසක් ඉදිරිපත් කළ පෙත්සමක් විභාග කිරීමෙන් අනතුරුවයි අධිකරණය එම තීන්දුව ප්‍රකාශයට පත් කළේ.

අදාළ තහනම් නියෝගය ඉවත් කරන මෙන් දන්වමින් රජයේ නීතිවේදියා මූලික විරෝධතාව මතු කළ අතර එමගින් ඔහු සඳහන් කර සිටියේ මෙම පුද්ගලයන් වලංගු වීසා බලපත්‍ර නොමැතිව ශ්‍රී ලංකාවේ රැඳී සිටින බවයි.

ශ්‍රී ලංකාවේ රැඳී සිටින පාකිස්ථානු ජාතිකයන්ගෙන් ජාතික ආරක්ෂාවට තර්ජන එල්ල වී ඇති බවත් රජයේ නීතිවේදියා අධිකරණය හමුවේ ප්‍රකාශ කර සිටියේය.

රජයේ නීතිඥවරයා මතු කළ තර්කය සැලකිල්ලට ගත් අධිකරණය, පෙත්සම ප්‍රතික්ෂේප කරන බව තීන්දු කළේය.

මානව හිමිකම්

නමුත් අධිකරණ තීරණය කුමක් වූවත් අදාළ සරණාගතයින්ගේ ජීවිත ආරක්ෂා කිරීමට ශ්‍රී ලංකා රජය බැඳී සිටින බවයි මානව හිමිකම් වෙනුවෙන් පෙනී සිටින නීතිවේදියකු වන නාමල් රාජපක්ෂ පවසන්නේ.

පැමිණිලිකාර පාර්ශවයේ නීතිඥයන් පවසන්නේ පෙත්සම ප්‍රතික්ෂේප වූ නමුත් පාකිස්ථාන සරණාගතයන් සම්බන්ධයෙන් අභියාචනයක් ශ්‍රේෂ්ඨාධිකරණය හමුවේ ගොනු කර ඇති බවයි.

දේශපාලන රැකවරණය පතන පාකිස්ථානු ජාතිකයින් දෙදහසකට ආසන්න පිරිසක් ශ්‍රී ලංකාවේ රැඳී සිටින බව නඩු විභාගයේදී අනාවරණය විය.

රජයේ ප්‍රතිචාරය

අභියාචනාධිකරණ තීරණයත් සමග විදේශ කටයුතු අමාත්‍යංශය හා සාකච්ඡා කිරීමෙන් අනතුරුව සරණාගතයන් සම්බන්ධයෙන් ඉදිරි තීරණයක් ගන්නා බව කැබිනට් ප්‍රකාශක අමාත්‍ය කෙහෙළිය රඹුක්වැල්ල බීබීසීයට පැවසුවේය.

සරණාගතයන් සම්බන්ධයෙන් ශ්‍රී ලංකා රජය අනුගමනය කරමින් සිටින ක්‍රියා පිළිවෙත එක්සත් ජාතීන්ගේ සංවිධානය ඇතුළු අනෙකුත් ජාත්‍යන්තර මානව හිමිකම් ආයතනවල දැඩි විවේචනයට ලක් වූවා නොවේදැයි සංදේශය අමාත්‍යවරයාගෙන් විමසූ අවස්ථාවේ ඔහු පවසා සිටියේ එම මානව හිමිකම් ආයතන ශ්‍රී ලංකාවේ පවතින සියලුම ප්‍රශ්න සම්බන්ධයෙන් වැරදි සහගත තීන්දු ලබා දී ඇති බවයි.