කොමිසමේ පරිවර්තන ගැටළු ඇති බවට චෝදනාවක්

සාක්ෂිකරුවන්ගෙන් ප්‍රශ්න කිරීමේදී පරිවර්තන ගැටළු රාශියක් සිදුව ඇතැයි නගන චෝදනාව අතුරුදහන්වූ පුද්ගලයන් පිළිබඳව තොරතුරු සොයා බැලීම පිණිස ජනාධිපතිවරයා විසින් පත් කරණ ලද විශේෂ කොමිසමේ සභාපති මැක්ස්වල් පරණගම ප්‍රතික්ෂේප කරයි.

ශ්‍රී ලංකාවේ යුද්ධය පැවති කාලය තුළ සහ ඉන් පසු සිදුවූ බවට පැවසෙන අතුරුදහන්වූවන් සම්බන්ධයෙන් සොයා බලන ජනාධිපති කොමිසම සාක්ෂිකරුවන්ගෙන් ප්‍රශ්න කිරීමේදී පරිවර්තන ගැටළු රාශියක් සිදුව ඇතැයි විකල්ප ප්‍රතිපත්ති කේන්ද්‍රය නිකුත් කල ප්‍රකාශනයක සඳහන් වෙයි.

ඉංග්‍රීසි බසින් ප්‍රශ්න අසා එහි දෙමළ පරිවර්තනයේ දී එම දෝෂ සිදුව ඇති බවයි විකල්ප ප්‍රතිපත්ති කේන්ද්‍රය පවසන්නේ.

සාවද්‍ය පිළිතුරු

වැරදි ප්‍රශ්න වලට පිළිතුරු දීමට සිදුවීම නිසා සාක්ෂිකරුවන්ද සාවද්‍ය පිළිතුරු සපයා ඇති බවයි විකල්ප ප්‍රතිපත්ති කේන්ද්‍රයේ විධායක අධ්‍යක්ෂක පාක්‍යසෝති සරවනමුත්තු ප්‍රකාශ කලේ.

මේ චෝදනා ප්‍රතික්ෂේප කරන අතුරුදහන්වූ පුද්ගලයන් පිළිබඳ තොරතුරු සොයා බැලීම පිණිස ජනාධිපතිවරයා විසින් පත් කරණ ලද විශේෂ කොමිසමේ සභාපති මැක්ස්වල් පරණගම පැවසුවේ සිද්ධියක් හෝ දෙකක් වාර්ථාවූ පමණින් සමස්ත ක්‍රියාදාමයම එසේ සිදූවූ බවට නිගමනය නොකළ යුතු බවයි.

පාර්ලිමේන්තුවේ වසර ගණනාවක් භාෂා පරිවර්තකයකු වශයෙන් සේවය කොට විශ්‍රාම ගිය නිලධාරියකුගේ සහ නීති ආධාර අංශයේ නිලධාරියකුගේ සේවය කොමිසමේ පරිවර්තන සඳහා ලබා ගන්නා බවයි සභාපති මැක්ස්වල් පරණගම ප්‍රකාශ කළේ.

පැමිණිලිකරුවන් කරුණු ඉදිරිපත්කිරීමෙන් පසු නීති නිලධාරීන් වෙත යොමු කොට තවදුරටත් ඔවුන්ට ස්වාධීනව තොරතුරු ඉදිරිපත්කිරීමට අවස්ථාව ලබා දෙන බවත් ඔහු පැවසුවේය.

බුද්ධි අංශ නිලධාරීන්

පැමිණිලිකරුවන්ගේ ජයාරූප ගන්නා බවට නැඟුණ චෝදනාවකට පිළිතුරු දෙමින් කොමිසමේ සභාපති මැක්ස්වල් පරණගම ප්‍රකාශ කළේ, බුද්ධි අංශ නිලධාරීන් එක්තරා අවස්ථාවකදී පැමිණ සිටි බවත් ඒ බව දැන ගත් විට ඔවුන් ඉවත් කිරීමට පියවර ගත් බවයි.

මේ පුවතට සම්බන්ධ තවත් විස්තර