ඔබේ දුරකථනයේ හෝ පරිගණකයේ මෙය වාදනය කිරීමට අදාළ මෘදුකාංග නැත

‘අපට අවශ්‍ය අව්‍යාජ විසඳුමක්’ -ආර්. සම්බන්ධන්

ශ්‍රී ලංකාවේ දෙමළ ජනතාවගේ ප්‍රශ්න වලට පිළිගත හැකි සාධාරණ අවංක වූ විසඳුමක් ඉදිරිපත් වේ නම් ඊට එකඟ වන බව දෙමළ ජාතික සන්ධානය පවසයි.

දෙමළ ජාතික සන්ධානය එම අදහස පළ කළේ, ශ්‍රී ලංකාවේ සංචාරයක නිරත වෙමින් සිටින ඉන්දීය විදේශ ඇමතිනී සුෂ්මා ස්වරාජ් සමඟ පැවැත්වූ සාකච්ඡාවක දී.

එම සාකච්ඡාවෙන් අනතුරුව බීබීසී සිංහල සේවයට ප්‍රකාශයක් කළ දෙමළ ජාතික සන්ධානයේ නායක පාර්ලිමේන්තු මන්ත්‍රී ආර්.සම්බන්ධන්, එවැනි අවංක විසඳුමක් ඉදිරිපත් වුනොත් තනි රටක් තුළ දෙමළ ජනයාගේ අයිතිවාසිකම් සහතික කර ගත හැකි බවයි සඳහන් කළේ.

‘පසුගියදා ශ්‍රී ලංකාවේ සිදු වූ ආණ්ඩු විපර්යාශයට තමන් ද දායක වූ බව සහ එම නව පාලනය රට සඳහා උචිත බව’ තමන් ඉන්දීය විදේශ ඇමතිවරියට දැනුම් දුන් බවයි, පාර්ලිමේන්තු මන්ත්‍රී ආර්.සම්බන්ධන් පවසන්නේ.

පවතින ගැටළු

යුද නිලධාරියකු වෙනුවට උතුරේ ආණ්ඩුකාර පදවියට සිවිල් පරිපාලන නිලධාරියකු පත් කරනු ලැබීම සහ පළාත් සභාවට ක්‍රියාත්මක වීමට අවශ්‍ය පරිසරය සැකසීම අගය කරන දෙමළ ජාතික සන්ධානය, යුද සමයේ ඉඩම් අහිමි ජනතාවට ඔවුන්ගේ ඉඩම් යළි ලබා දීම මෙන්ම සිරභාරයේ සිටින දෙමළ තරුණයන් මුදා හැරීමට පියවර ගැනීම පිළිබඳව ද ඉන්දීය විදේශ ඇමතිවරිය සමඟ සාකච්ඡා කළ බවයි පාර්ලිමේන්තු මන්ත්‍රී ආර්.සම්බන්ධන් කියා සිටියේ.

නව ආණ්ඩුව ගනු ලබන යහපත් පියවර තවත් පෙරට ගෙන යා යුතු බව පවසන දෙමළ ජාතික සන්ධානයේ නායකයා සියලු දෙනා එකමුතුව රටේ ප්‍රශ්න වලට විසඳුමක් සොයා ගත යුතු බවත් අවධාරණය කරයි.

ඒ සඳහා ඉන්දියාවේ සහයෝගය ලැබිය යුතුය යන්න දෙමළ ජාතික සන්ධානයේ අදහසයි.

බලය බෙදීම

ශ්‍රී ලංකාවේ බලය බෙදීම සම්බන්ධයෙන් ද ඉන්දීය විදේශ ඇමතිනී සුෂ්මා ස්වරාජ් සමඟ සාකච්ඡා කළ බව සඳහන් කළ දෙමළ ජනතා සන්ධානයේ නායකයා ‘බොරු විසඳුම් නොව සාමය උදා කෙරෙන වැඩ පිළිවෙලක් ඉදිරිපත් කෙරුනොත් තනි රටක් ඇතුළත විසඳුම් මාර්ගයකට යාමට තමන් සූදානම්’ බවයි පවසන්නේ.

අව්‍යාජ වැඩ පිළිවෙලක් නම් ‘රට බෙදීමෙන් තොරව එවැනි සැලැස්මක් භාර ගැනීමට තමන් සූදානම් බවයි' ආර්.සම්බන්ධන් මන්ත්‍රීවරයා වැඩි දුරටත් කියා සිටියේ.

ඉන්දීය ධීවරයන් ශ්‍රී ලංකා මුහුදු තීරයට පිවිසීම නිසා දේශීය මසුන් මරන්නන්ට අත් වන අලාභය පිළිබඳවත් ඉන්දීය විදේශ ඇමැතිවරියට පෙන්වා දුන් බව පවසන පාර්ලිමේන්තු මන්ත්‍රී ආර්.සම්බන්ධන්, සිය රටේ ධීවරයන් සමඟ සාකච්ඡා කොට සුදුසු විසඳුම් මාර්ගයක් කරා අවතීර්ණ වන බව ඇමතිවරිය ප්‍රකාශ කළ බවත් කියා සිටියි.