බැසිල්ගේ මූලික අයිතිවාසිකම් පෙත්සම විභාගයට

Image caption ශ්‍රී ලංකා ශ්‍රේෂ්ඨාධිකරණය

පොලිස් මූල්‍ය අපරාධ විමර්ශන කොට්ඨාසය මගින් තමන් අත් අඩංගුවට ගැනීම නීතියට පටහැණි යයි පවසමින් හිටපු ඇමති බැසිල් රාජපක්ෂ ඇතුළු දිවි නැගුම දෙපාර්තමේන්තුවේ නිලධාරීන් විසින් ඉදිරිපත් කරන ලද මූලික අයිතිවාසිකම් පෙත්සම් විභාග කිරීමට ශ්‍රී ලංකා ශ්‍රේෂ්ඨාධිකරණය තීන්දු කළේය.

එම මූලික අයිතිවාසිකම් පෙත්සම් විභාගයට නොගෙනම ප්‍රතික්ෂේප කරණ මෙන් ඉල්ලා සිටිමින් නීතිපතිවරයා විසින් මතු කරන ලද විරෝධතා බැහැර කරමිනුයි අගවිනිසුරුවරයා ප්‍රමුඛ ත්‍රිපුද්ගල ශ්‍රේෂ්ඨාධිකරණ විනිශ්චය මණ්ඩලය එම තීන්දුව ගත්තේ.

පොලිස් මූල්‍ය අපරාධ විමර්ශන කොට්ඨාශය අගමැතිවරයාගේ ප්‍රධානත්වයෙන් යුත් කැබිනට් අනු කමිටුවක් යටතේ පාලනය වන ආයතනයක් වන හෙයින් අදාළ ආයතනයට දේශපාලන මැදිහත් වීම් පවත්නා බවයි පෙත්සම්කාර බැසිල් රාජපක්ෂ පාර්ශ්වය ඔවුන්ගේ පෙත්සම් මගින් කියා සිටින්නේ.

එබැවින් පොලිස් මූල්‍ය අපරාධ විමර්ශන කොට්ඨාශය මගින් සාධාරණ පරීක්ෂණයක් අපේක්ෂා කල නොහැකි අතර තමන් අත්අඩංගුවට ගැනීම නීති විරෝධී බවට තීන්දුවක් ලබා දෙන ලෙසයි ඔවුහු අධිකරණයෙන් ඉල්ලා සිටිති.

රටේ පොදු නීතිය

Image caption පෙත්සම්කාර බැසිල් රාජපක්ෂ

බැසිල් රාජපක්ෂ ඇතුළු පිරිස අත් අඩංගුවට ගැනීම රටේ පොදු නීතියට අනුව සිදු කර ඇති නිසා එමගින් මූලික අයිතිවාසිකම් කඩවීමක් සිදු නොවන හෙයින් ඉහත කී පෙත්සම් විභාගයට නොගෙනම ප්‍රතික්ෂේප කරන ලෙස රජයේ නීතිවේදියා ඉල්ලා සිටි නමුත් එම ඉල්ලීම ඉවත දැමූ ශ්‍රේෂ්ඨාධිකරණය පෙත්සම් විභාගයට ගැනීමට අවසර දෙමින් ඊට අදාළ කරුණු දක්වන මෙන් පොලිස්පතිවරයා සහ පොලිස් මූල්‍ය අපරාධ විමර්ශන කොට්ඨාශයේ නිලධාරීන්ට නොතීසි නිකුත් කළේය.

තීන්දුව ප්‍රකාශයට පත් කරනු ලැබීමෙන් අනතුරුව බීබීසී සංදේශයට කරුණු දැක්වූ පෙත්සම්කාර බැසිල් රාජපක්ෂ පාර්ශවයේ නීතිවේදී අජිත් ප්‍රසන්න කියා සිටියේ, පොලිස් මූල්‍ය අපරාධ විමර්ශන කොට්ඨාශය නීති විරෝධී බව පවසමින් තම සේවාදායකයන් ඉදිරිපත් කළ පෙත්සම විභාගයට ගැනීමට අවසර දී ඇති නිසා එකී විමර්ශන කොට්ඨාශය තවදුරටත් පවත්වා ගෙන යාම සම්බන්ධයෙන් පොලිස්පතිවරයා සහ නීතිපතිවරයා එක්ව තීරණයක් ගත යුතු බවයි.

ඉහත කී පෙත්සම්වල වගඋත්තර කරුවන් හැටියට අගමැති ප්‍රමුඛ ඇතුළු ඇමති මණ්ඩලය නම් කර ඇතත් අධිකරණය ඔවුන්ට එරෙහිව නොතීසි නිකුත් කිරීමක් සිදු කලේ නැත.