ෆෙඩරල් රාජ්‍යයකට ඉඩ නැහැ - එජාපෙ

Image copyright Ajith P Perera

දෙමළ ජාතික සන්ධානය සිය ප්‍රතිපත්ති ප්‍රකාශනය එලි දක්වමින් ෆෙඩරල් රාජ්‍යයක් ඉල්ලා සිටින නමුත් ඊට එක්සත් ජාතික පෙරමුණ එකඟත්වය පල නොකරන බව නියෝජ්‍ය අමාත්‍ය අජිත් පෙරේරා ප්‍රකාශ කරයි.

මාධ්‍ය හමුවක් අමතමින් ඔහු කියා සිටියේ එක්සත් ජාතික පෙරමුණේ ප්‍රතිපත්ති ප්‍රකාශනයේ ඒකීය රාජ්‍යයක් තුළ උපරිම බලය බෙදීමක් සඳහා ප්‍රතිපාදන සලසා ඇති බවයි.

“මෛත්‍රීපාල සිරිසේන මැතිතුමාගේ ප්‍රතිපත්ති ප්‍රකාශනයේත් අපි කිව්වා ඒකීය රාජ්‍ය ව්‍යුහය කිසිලෙසක වෙනස් කරන්නේ නැහැ කියල ,” ඔහු සඳහන් කළේය.

ප්‍රතිපත්ති ප්‍රකාශනය

දෙමළ ජාතික සන්ධානයේ ප්‍රතිපත්ති ප්‍රකාශනය එළි දක්වන්නට පෙර ඒකීය රාජ්‍ය ව්‍යුහය තුළ බලය විමධ්‍ය ගත කරන බව ප්‍රකාශ කොට ඇති බවයි නියෝජ්‍ය අමාත්‍ය අජිත් පෙරේරා පැවසුවේ.

රටේ සිංහල, දෙමළ, මුස්ලිම් යන සියලු දෙනාට සමගියෙන් යුතුව එකරටක් ලෙස ජීවත්වීමට ඇති අවස්ථාව අහිමි වන්නාවූ කිසිම දේ කට එකඟ නොවන බවයි ඔහු තවදුරටත් ප්‍රකාශ කළේ.

මේ සම්බන්ධයෙන් ප්‍රතිචාරයක් ලබා ගැනීමට දෙමළ ජාතික සන්ධානය සම්බන්ධ කර ගැනීමට ගත් උත්සාහය සාර්ථක නොවීය.