බංග්ලාදේශයේ තුන්දහසක් අත්අඩංගුවට
ඡායාරූප මූලාශ්‍රය, AFP
දේශපාලන ප්‍රතිවාදීන් ඉලක්ක කිරීම සඳහා ඉහත කී පොලිස් මෙහෙයුම යොදා ගන්නා බවටයි විපක්ෂය නියෝජනය කරන බංගලාදේශ ජාතික පක්ෂය ආණ්ඩුවට චෝදනා කර තිබුණේ
බංග්ලාදේශයේ සුළු ආගමික මෙන්ම සුළු ජාතික කණ්ඩායම් සහ අනාගමික ජන ප්‍රජාවට අයත් සාමාජිකයන් ඉලක්කකොට සිදුවන ඝාතන රැල්ල නවතා දැමීමට කටයුතු කරන බවට එරට ජනාධිපතිනී ෂෙයික් හසීනා ප්‍රතිඥාවක් දුන්නාය.
මේ ප්‍රහාරයන් නතර කිරීම සඳහා කළ හැකි ඕනෑම දෙයක් රජය විසින් කරනු ඇති බවයි ඇය ප්‍රකාශ කළේ.
ජනාධිපතිණිය මේ බව ප්‍රකාශ කළේ පුද්ගලයන් 3000 ක වැඩි පිරිසක් අත්අඩංගුවට ගනිමින් ඉස්ලාම්වාදීන්ට එරෙහිව පොලීසිය විසින් මෙහෙයුමක් දියත් කිරීමෙන් දිනකට පසුවයි.
මේ අතර දේශපාලන ප්‍රතිවාදීන් ඉලක්ක කිරීම සඳහා ඉහත කී පොලිස් මෙහෙයුම යොදා ගන්නා බවටයි විපක්ෂය නියෝජනය කරන බංගලාදේශ ජාතික පක්ෂය ආණ්ඩුවට චෝදනා කර තිබුණේ.
"මේකට කාලය ගත වෙන්න පුළුවන්, නමුත් දෙවියන් වහන්සේගේ කැමැත්තට අනුව අපිට පුළුවන් වේවි මේ අපරාධ කරන්නවුන් පාලනය කරන්න" යනුවෙනුයි සෙනසුරාදා පාලක අවාමි ලීග් පක්ෂයේ හමුවක දී ජනාධිපතිනී ෂෙයික් හසීනා වැඩිදුරටත් ප්‍රකාශ කළේ.
මේ ඝාතන රැල්ලේ දී සමලිංගික ක්‍රියාධරයෙකු ද කපා කොටා මරාදමා තිබුණි
"අපරාධකරුවන්ට හැංගෙන්න තැනක් නැහැ. සෑම මිනී මරුවෙකුම නීතිය හමුවට ගෙන එනවා" යනුවෙන්ද ඇය පැවසූවය.
ඉස්ලාම්වාදී සන්නද්ධ කරුවන් අත්අඩංගුවට ගැනීම සඳහා මූලිකත්වය දෙන සතියක කාලයක වැඩසටහනක් පොලීසිය දියත්කර තිබුණද විවේචකයන් පවසන්නේ සාමාන්‍ය අපරාධකරුවන්ද මෙසේ අත්අඩංගුවට ගත් පිරිස අතර සිටින බවයි.
මේ අතර බංග්ලාදේශ ජාතික පක්ෂයේ නායක ෆක්රුල් ඉස්ලාම් ආම්ගීර් පැවසුවේ මෙම පොලිස් මෙහෙයුම මගින් සිය ගණනක් ආණ්ඩු විරෝධී ක්‍රියාධරයන් අත්අඩංගුවට ගෙන ඇති බවයි.
"ඉස්ලාම් සන්නද්ධකරුවන්ට එරෙහිව මෙහෙයුම් කරන මුවාවෙන් සාමාන්‍ය අහිංසක මිනිසුන් අත්අඩංගුවට අරගෙන තියනව" යනුවෙනුයි ඔහු AFP පුවත්සේවයට පැවසුවේ.
එහෙත් බංග්ලාදේශ රජය විසින් ඔහුගේ මෙම චෝදනාව ප්‍රතික්ෂේප කරනු ලැබ තිබේ.
බටහිර බංග්ලාදේශයේ රාජ්ශාහි විශ්වවිද්‍යාලයේ ඉංග්‍රීසි අංශයේ ඒ එෆ් එම් රෙසෞල් කරීම් සිද්දික් නමැති 58 හැවිරිදි මහාචාර්යවරයාද මෙලෙස මරා දමා තිබුණි
"විශාල මෙහෙයුමක් කරන වෙලාවට සාමන්‍යයෙන් මගහැරීම් වලට ඉඩ තියන්නේ නැහැ. විශාල පිරිසක් අත්අඩංගුවට අරන් ඊට පස්සේ ඔවුන් පරීක්ෂාවට ලක් කරනව, මේකෙ ඉලක්ක ගත දේශපාලන අවශ්‍යතාවන් නැහැ. මිනීමැරුම් නැවැත්වීම සඳහා කළ මෙහෙයුමක් පමණයි" යනුවෙනුයි රජයට එරෙහිව නැගෙන චෝදනා වලට පිළිතුරු දෙමින් ලන්ඩනයේ බංග්ලාදේශ මහ කොමසාරිස් කාර්යාලයේ සිටින ප්‍රකාශකයෙක් බීබීසීයට පැවසුවේ.
අනාගමික අන්තර්ජාල මාධ්‍යවේදීන්, විද්වතුන් සහ සමලිංගික ක්‍රියාධරයන් මෙන්ම සුළු ආගමික කණ්ඩායම් වල සාමාජිකයන්ද ඇතුළු හතළිහකට අධික පුද්ගලයන් පිරිසක් බිහිසුණු ලෙස පසුගිය වසර කිහිපය තුල ඝාතනයට ලක්විය.
ජූනි 10 වැනි සිකුරාදා හින්දු ආශ්‍රමයක සේවකයෙකු කපා කොටා මරා දමා තිබුණේ පබ්නා දිස්ත්‍රික්කයේ දී.
එසේම පසුගිය සතියේ දී හින්දු පූජකයකු, කිතුනු වෙළඳසැල් හිමියෙකු සහ ත්‍රස්ත විරෝධී පොලිස් නිලධාරියෙකු ගේ බිරිඳ ඇතුළු ඝාතන සියල්ල ඉස්ලාම්වාදී සන්නද්ධකරුවන් විසින් කළ බවටයි සැක කෙරෙන්නේ.
