රියෝ පැරා ඔලිම්පික්: ආබාධිත ක්‍රීඩකයෙක් මරුට

  • 2016 සැප්තැම්බර් 18
Image copyright Getty Images
Image caption 2012 වසරේ ලන්ඩනයේදී තරඟ වැදුණු අවස්ථාව

රියෝ පැරා ඔලිම්පික් තරඟාවලියේ පාපැදි තරඟයක් අතරතුර සිදු වූ හදිසි අනතුරකින් ඉරාන ජාතික ආබාධිත ක්‍රීඩකයෙක් මරණයට පත් වෙයි.

ඉරානය නියෝජනය කරමින් තරඟ වැදී සිටි 48 හැවිරිදි මෙම ක්‍රීඩකයා හදිසි අනතුරට ලක් වීමෙන් අනතුරුව හෘදයාබාධයකට ලක් වී ඇති බවයි බලධාරීන් නිවේදනය කර සිටියේ.

සිදු වූ හදිසි අනතුර පිළිබඳව පරීක්ෂණයක් ආරම්භ කර ඇති බව ද පැරා ඔලිම්පික් කමිටුව නිවේදනය කළේය.

Image copyright PA
Image caption අවසන් තරඟය

අනතුර සිදු වූ ස්ථානයේ දීම හදිසි වෛද්‍ය ප්‍රතිකාර ලබා දී ඇති අතර ගිලන් රථයකින් රෝහල කරා ගෙන යාමෙන් සුළු වේලාවකට පසු මෙම ක්‍රීඩකයා මිය ගොස් ඇති බව බලධාරීහු පවසති.

බහ්මන් ගොල්බානෙසාඩ් නමැති මෙම ආබාධිත පාපැදි ධාවකයා ඉරානය නියෝජනය කරමින් 2012 දී ලන්ඩන් නුවර පැවති පැරා ඔලිම්පික් තරඟාවලියට ද සහභාගී විය.

ඉරානය සතු දක්‍ෂතම පාපැදි ධාවකයා ලෙස සැලකෙන ඔහු දොළොස් වසක් තිස්සේ පාපැදි ධාවනයේ යෙදී සිටියේය.

එක් දරු පියෙකු වන ඔහු ගේ මරණය වෙනුවෙන් ශෝකය පළ කිරීම සඳහා පැරා ඔලිම්පික් ගම්මානයේ ඔසවා ඇති ඉරාන ධජය අඩ කුඹු කර තිබේ.