පුතින් ඇමෙරිකානු නිලධාරීන් හැටක් නෙරපයි

Image copyright EPA
Image caption වසා දමනු ලැබ ඇති 'පීටර්ස්බර්ග්' නගරයේ පිහිටි එක්සත් ජනපද 'කොන්සල්' කාර්යාලය

ඇමෙරිකානු තානාපති නිලධාරීන් හැටක් (60) රටින් නෙරපා හැරීමට පියවර ගත් රුසියාව 'පීටර්ස්බර්ග්' නගරයේ පිහිටි එක්සත් ජනපද 'කොන්සල්' කාර්යාලය වසා දැමීමට පියවර ගෙන ඇත.

එම පියවර ගනු ලැබ තිබෙන්නේ, ඇමෙරිකා එක්සත් ජනපදය විසින් රුසියාවේ තානාපති නිලධාරීන් කණ්ඩායමක් එරටින් නෙරපා හරිනු ලැබීම සම්බන්ධයෙන් එකට එක කිරීමක් වශයෙනි.

රුසියාවේ කේජීබී රහස් ඔත්තු අංශයේ හිටපු නිලධාරියකු වූ සෙර්ගේයි ස්ක්‍රිපාල් සහ ඔහුගේ දියණිය 'යූල්යා' එක්සත් රාජධානියේ 'සැලිස්බරි නගරයේ දී ගොදුරු වූ විස රසායන ප්‍රහාරය සම්බන්ධයෙන් රුසියාවට ඇඟිල්ල දිගු වූ අතර එක්සත් රාජධානිය, ඇමෙරිකා එක්සත් ජනපදය සහ යුරෝපා හවුලට අයත් රටවල් රැසක් මෙන්ම ඔස්ට්‍රේලියාව වැනි රටවල් විසින් ද රුසියාවේ තානාපති නිලධාරීන් විවිධ සංඛ්‍යා මට්ටමින් එම රටවලින් නෙරපා හැරීමට තීන්දු කරනු ලැබුණි.

Image copyright EPA
Image caption විස ප්‍රහාරයකට ගොදුරු වී සිටින සෙර්ගේයි ස්ක්‍රිපාල් සහ ඔහුගේ දියණිය 'යූල්යා'

ඊට ප්‍රතිචාරය දක්වන රුසියාවත් ඒ රටවල තානාපති නිලධාරීන් පිටමං කරමින් ඇති බව වාර්තා වෙයි.

මේ ප්‍රශ්නයට මැදිහත් වෙමින් සිටින ඒ ඒ රටවල තානාපතිවරුන් නෙරපා හරිනු ලැබීම "සමමිතික මට්ටමින්" සිදු කෙරෙනු ඇතැයි රුසියාවේ විදේශ අමාත්‍යාංශය පවසයි.

'ක්‍රෙම්ලිනය' විසින් ගනු ලැබුණ පියවර සම්බන්ධයෙන් ප්‍රතිචාරය දක්වන ධවල මන්දිරය "එය බලාපොරොත්තු නොවූ ක්‍රියාමාර්ගයක් නොවන" බව කියා සිටියි.

Image copyright AFP
Image caption රුසියාවේ විදේශ ඇමති සෙර්ගේයි ලව්රොෆ්

එසේම "එමගින් රුසියාව සමඟ ඇති සබඳතා තවත් නරක අතට හැරෙනු ඇතැයි" ධවල මන්දිර නිවේදනයක දැක්වෙයි.

සබැඳි පුවත්;

මේ පුවතට සම්බන්ධ තවත් විස්තර